Numeli 22 - Chiyawo Bible

Mwenye jwa ku Mowabu akumŵilanga Balamu

¹ Aisalaeli ŵajesile ulendo ni kuja kutaŵa masakasa gawo m'malambo ga Mowabu kungopoko lyuŵa kwa Lusulo lwa Yolodani mwakulolegana ni msinda wa Yeliko.

² Balaki mwanace jwa Sipola mwenye jwa ku Mowabu, piŵapikene yiŵayitesile Aisalaeli pa Aamoli ni muŵatupile Aisalaeliwo,

³ jwalakwe pamo ni ŵandu ŵakwe wosope ŵatesile woga.

⁴ Ŵandu ŵa ku Mowabu ŵasalile acakulungwa ŵa ku Midiyani kuti, “Lyele likugali tilibudule yosope yene yiyitusyungulile uweyi, mpela mujikubudulila ng'ombe manyasi ga mopo mu mgunda.”

⁵ Myoyo Mwenye Balaki ŵatumisye ŵamitenga kukumŵilanga Balamu mwanace jwa Bewoli, juŵaliji ku Petoli ciŵandika ni Lusulo lwa Yufuleti ku cilambo ca Amawu. Mtenga uŵamjigalile kutyocela kwa Balaki waliji wakuti: “Ngusosa wawojo amanyilile kuti mtundu wosope wene uyice kutyocela ku Iguputo. Ŵandu ŵakwe ali mkubalalicila kulikose kusosa kusumula cilambo cetu.

⁶ Winji wakwe akutupunda uwe, myoyo ayice kuti angamucisye pakwalwesa jemanjaji m'malo mwangu. Kaneka mwine tucipakombola kwapunda ni kwatoposya mcilambo mwangu. Une ngumanyilila cenenepe kuti naga wawojo apelece upile, ŵandu akusakolaga upile, nambo soni naga alwesisye ŵandu akusalwesekaga.”

⁷ Myoyo acakulungwa ŵa Amowabu ni Amidiyani ŵajawile kwa Balamu ali ajigele malipilo. Ŵampele malipilo pa masengo gakulwesago, ni ŵamsalile utenga wa Balaki ula.

⁸ Balamu ŵasalile kuti, “Agone kunokuno lelo, nipo malaŵi tinjalondecesya yitasalile AMBUJE.”* Myoyo acakulungwa ŵa ku Mowabu ŵagonile kwa Balamu.

⁹ Mlungu ŵayice kwa Balamu ni ŵawusisye kuti, “Ana aŵa ŵandu ŵali ni m'mweŵa ŵani?”

¹⁰ Jwalakwe ŵajanjile kuti, “Mwenye Balaki jwa ku Mowabu ŵatumisye jemanjaji kukusalila une kuti,

¹¹ ‘Ŵandu ŵakutyocela ku Iguputo agumbele mcilambo cosopeci. Jwalakwe akusosa kuti une nalwese m'malo mwa jwalakwe, kuti jwalakwe apakombole kwaputa ni kwatoposya mcilambo mwakwe.’ ”

¹² Mlungu ŵamsalile Balamu kuti, “Mkajawula nawo aŵa ŵanduŵa, nipo mkasimwalwesa ŵandu ŵa lukosyo lwa Isalaeli, ligongo une napele upile jemanjajo.”

¹³ Kundaŵi kwakwe, Balamu ŵajawile kwa ŵamitenga ŵa Balaki ni ŵasalile kuti, “Awujileje kumangwawo, AMBUJE anganyisye kuti tulongane ni jemanja.”

¹⁴ Myoyo ŵawujile kwa Balaki kukumsalila kuti, Balamu akanile kulongana ni uwe.

¹⁵ Kaneko Balaki ŵatumisye acakulungwa ŵajinji, ŵakucimbicika kupunda ŵandandawo.

¹⁶ Ŵajawile kwa Balamu kukumsalila mtenga wakutyocela kwa Balaki wakuti: “Conde pakapagwa cindu cine cilicose cakwalekasya wawojo kuti ayice kwa une.

¹⁷ Une tinjapa wawojo cipanje cejinji ni kwatendela cilicose citacisala. Conde ayice kuti ŵalwese aŵa ŵanduŵa m'malo mwangu.”

¹⁸ Nambo Balamu ŵajanjile kuti, “Atamose Balaki akambe silifa* ni golidi* josope jwali ku nyumba jawo jwa ucimwene, une ngamkaninyosya pangapikanila lilamusi lya AMBUJE Mlungu jwangu atamose mu kacindu kakupunda kunandipa mnope.

¹⁹ Nambope agone, mpela muŵatendele ŵane ŵala, kuti ndole naga pana cine cilicose cakuti asalile AMBUJE kapena iyayi.”

²⁰ Cele ciloco AMBUJE ŵayice kwa Balamu ni ŵatite kuti, “Naga aŵa ŵanduŵa ayice kukumŵilanga kuti mlonganeje nawo, jawulani nawo, nambo mkatende yitingamsalile une peyo.”

²¹ Myoyo kundaŵi kwakwe Balamu piŵajimwice ŵaŵisile sadulo pa bulu jwakwe ni kulongana nawo acakulungwa ŵa ku Mowabuwo.

Balamu ni bulu jwakwe

²² Mlungu ŵapile mtima ligongo Balamu ŵaliji mkwawula, ni piŵajendaga Balamu pa bulu jwakwe myoyo, ali mkulongana ni ŵamasengo ŵakwe ŵaŵili, lilayika lya AMBUJE lyajimi pa msewu kumwugalila litala.

²³ Bulu piŵaliweni lilayika lili lijimi pelepo lyenyakule upanga, bulujo jwalesile msewu ni kupitila m'migunda. Pelepo Balamu ŵamputile bulujo ni kumwucisya mu msewu.

²⁴ Kaneko lilayika lila lyajimi pambakamiko pa msewu pipaliji lipupa lya maganga ali lisi ni ali lyakwe pasikati pa migunda ja mpeleya.

²⁵ Bulu jula piŵaliweni lilayikalyo, ŵajesile mwakukuluma ni lipupalyo ni kulutwinyicisya lusajo lwa Balamu kwipupako. Apa soni Balamu ŵamputile bulujo.

²⁶ Lilayikalyo lyajesile kwawula pasogolo, ni lyajimi pambakamiko pipaliji pangali soni malo gakuti ni kupitila kumlyo kapena kumciji.

²⁷ Aji ndaŵiji, bulu piŵaliweni lilayikalyo, ŵagonile pasi. Balamu ŵapile mtima ni kutanda kumputa bulu jula ni simbo jakwe.

²⁸ Kaneko AMBUJE ŵampele bulu macili gakuŵecetela, ni ŵatite kwa Balamu, “Ana une ndesile cici kwa wawojo? Ligongo cici ambutile kele katatuka?”

²⁹ Balamu ŵajanjile kuti, “Ligongo mundoŵesye une. Ngakole upanga ningamwuleje m'mwejo.”

³⁰ Bulu ŵajanjile kuti, “Ana ngaŵa bulu julajula jwaŵele ali mkukwela wawojo pa umi wawo wosope? Cakaci cinatendele wawojo yamti myiyi?” Jwalakwe ŵajanjile kuti, “Pangali.”

³¹ Kaneko AMBUJE ŵamwugwile Balamu m'meso kuti aliwone lilayika lilyajimi pelepo ni upanga wakwe m'myala. Papopo Balamu ŵajinamisye ngope jakwe ni ŵaligwisisye pasi.

³² Lilayikalyo lyamwusisye Balamu kuti, “Ligongo cici mumputile bulu jwenu katatu kose camti myiyi? Une mbice kukumwugalila m'mwejo litala, ligongo nginimŵajilwa kuwutenda wele ulendowu.

³³ Bulu jwenutu ŵambweni une ni kupitila kumbali katatu. Jukaŵe kuti nganambona ningamwuleje m'mwejo ni kumleka bulujo.”

³⁴ Balamu ŵajanjile kuti, “Une ndesile ulemwa.* Nginimanyilila kuti wawojo ajimi mu msewu kukusisya une, nambo sambano naga akuganisya kuti cili cakulemwa kuti une mbitilisye ulendowu, timbujile kwawula kumusi.”

³⁵ Nambo lilayika lyatite kuti, “Jawulagani nawo ŵanduŵa, nambo mŵecete yele peyo yitinimsalile kuti mŵecete.” Myoyo Balamu ŵapitilisye kwawula nawo ŵanduwo.

Balaki akumcingamila Balamu

³⁶ Balaki piŵapikene kuti Balamu ali akwisa, ŵajawile kukumcingamila ku msinda wa Ali uwaliji ciŵandika ni Lusulo lwa Alinoni, kumalile kusyesyene kwa Mowabu.

³⁷ Balaki ŵamwusisye kuti, “Ligongo cici wawo nganayika ndili naŵilasile ndaŵi jandanda? Mwine ŵaganisisye kuti nganipakombola kwapa mtuka wakwanila?”

³⁸ Balamu ŵajanjile kuti, “Mbicetu ni une. Nambotu sambano, ana ngwete macili gakuti mbecete cindu cilicose? Ngamba kupakombolatu kuŵeceta yele peyo yasalile Mlungu kuti mbecete.”

³⁹ Myoyo Balamu ŵajawile ni Balaki ku msinda wa Husoti.

⁴⁰ Kweleko Balaki ŵawuleje ng'ombe ni ngondolo sya mbopesi nipo ŵapele Balamu ni acakulungwa ŵiŵaliji nawo ŵala jine mwa nyamajo.

Kulocesya kwandanda kwa Balamu

⁴¹ Kundaŵi kwakwe Balaki ŵamjigele Balamu kwawula najo ku matumbi ga Bamoti Baala, kweleko Balamujo ŵapakombwele kugawona masakasa gosope ga Aisalaeli mpaka kumbesi kwakwe.