Numeli 20 - Chiyawo Bible

Yakutendekwa ku Kadeshi

¹ Pa mwesi wandanda, mpingo wosope wa Aisalaeli ŵayice ku cipululu ca Sini ni kutaŵa masakasa ku Kadeshi. Miliyamu ŵawilile kweleko nipo ŵamsicile kukoko.

² Kuŵataŵile masakasako kwaliji kwangali mesi, myoyo ŵandu ŵasongene ni kwasyungulila Mose* ni Aloni*

³ nipo ŵadandawile kuti: “Yikaliji yambone tukawile ku meso kwa tenti ja AMBUJE* yalumo ni Aisalaeli acimjetu.

⁴ Ligongo cici atujigalile akuno ku cipululu kuno? Kwamba kusosa kuti uwe tuwile akuno ni yinyama yetuyi eti?

⁵ Ligongo cici watujigele kutukoposya ku Iguputo ni kutuyicisya akuno kwakutesya canasa kwangali cindu campaka ticicimela? Kwangali tiligu, kwangali nguju, kwangali finyo, kwangali yisogosi yecejewu yakulandana ni ma aposi. Kwangali atamose mesi gakumwa!”

⁶ Mose ni Aloni ŵatyosile kwa ŵanduwo nipo ŵajimi pa mlango wa tenti. Ŵajineme mpaka ngope syawo kugunda litaka, nipo lilanguka lyakunyesimila lyakulosya kuti AMBUJE ŵaliji papopo lyawonece kwa jemanjajo.

⁷ AMBUJE ŵatite kwa Mose,

⁸ “Jigalani simbo jijili pasogolo pa Libokosi lya Cilanga, nipo kaneko m'mwejo ni Aloni mwusonganye mpingo wosopewo. Mŵecete kwa lwala luli pelepo, pasogolo pa ŵandu wosopewo nipo mesi tigaciwulika mulwalamo. Mu lyele litalali timcakopocesya mesi mulwalamo ŵandu ni yinyama yawo kuti amwe.”

⁹ Mose ŵajawile ni kujigala simbo jila, mpela muŵamlamulile AMBUJE.

¹⁰ Jwalakwe ni Aloni ŵasonganyisye mpingo wosope wene pasogolo pa lwalalo, nipo Mose ŵatite kuti, “Apikane, jemanja ŵandu ŵakwimucila! Ana uwe tutende kumkopocesya mesi mu lwalamu?”

¹¹ Kaneko Mose ŵanyakwile simbo jila ni kuputa lwala lula kaŵili ni simbojo, nipo lusulo lwalukulungwa lwa mesi lwawulice, ŵandu wosope ŵamwele pamo ni yinyama yakwe.

¹² Nambo AMBUJE ŵatite kwa Mose ni Aloni, “Ligongo lyakuti mkanile kukulupilila macili gangu gamaswela pameso pa mpingo wa Aisalaeli, ngasimwalongolela soni pakwajinjisya cilambo cinaŵisile cilanga* kuti tinjipeleka kwa jemanjajo.”

¹³ Ayi yatendece ku Meliba, kuŵadandawile ŵandu ŵa ku Isalaeli mwakusisyana ni AMBUJE nipo jwalakwe ŵalilosisye kuti ali jwamswela mwamacili gakwe pakwapa mesi gakumwa.

Mwenye jwa ku Edomu akwakanya Aisalaeli kupitila mcilambo mwakwe

¹⁴ Mose ŵatumisye ŵamitenga kutyocela ku Kadeshi kwawula ku Edomu. Jemanjajo ŵamsalile mwenyejo kuti, “Awu ni mtenga wakutyocela kwa acalongo acimjawo ŵa lukosyo lwa Isalaeli. Wawojo akumanyilila cenenepe yakusawusya yitusimangene nayo,

¹⁵ muŵajawulile acinangolo ŵetu ku Iguputo, kutwatemi kwa yaka yejinji. Aiguputo ŵasawisye acinangolo ŵetu ni uwe ŵakwe,

¹⁶ nipo uwe twalisile kwa AMBUJE kuti atukamucisye. Jwalakwe ŵakupikene kulila kwetu ni ŵatumisye lilayika, lilyatukopwesye ku Iguputo. Sambano tuli akuno ku Kadeshi, msinda uwuli kumalile ni dela jawo.

¹⁷ Conde atukunde kuti tupitile mcilambo mwawo. Uwe pamo ni yilangwa yetu ngatupitila m'migunda jawo kapena m'migunda ja finyo iyayi, nambo mu msewupe basi. Nipo ngasitumwa mesi ga m'yisima yawo. Tutugambeje kwenda mu msewupe mpaka tuli tukopwece dela jawo.”

¹⁸ Nambo ŵandu ŵa ku Edomu ŵajanjile kuti, “Uwe ngatukwakunda jemanja kuti apitile mcilambo mwetu! Naga agambe kulinga, uwe tutwakape ni upanga.”

¹⁹ Aisalaeli ŵasalile kuti, “Uwe citugambeje kupita mu msewupe basi, nipo naga tukumwa mesi gawo kapena yilangwa yetu, tucilipila, tukwamba kusosa kupita basi.”

²⁰ Aedomu ŵawilisye kuŵeceta kuti, “Uwe tukukana!” Papopo Aedomu ŵajawile ni asilikali ŵajinji ni ŵamacili kuja kukwatanda Aisalaeli.

²¹ Mwamti Aedomu nganiŵakunda Aisalaeli kupitila mdela mwawo. Myoyo Aisalaeli ŵawujile ni kuja kupita litala line.

Ciwa ca Aloni

²² Kaneko mpingo wosope wa Aisalaeli watyosile ku Kadeshi nipo ŵayice ku Litumbi lya Holi.

²³ Litumbilyo lyaliji malile ga cilambo ca Edomu, nipo AMBUJE ŵaŵecete kwa Mose ni Aloni kuti,

²⁴ “Aloni ngaja kwinjila ku cilambo cinatesile cilanga kuti tinjipeleka kwa Aisalaeli, tawe, ligongo jemanja wosope ŵaŵili nganimpikanila lilamusi lyangu ku Meliba.

²⁵ Mwajigale Aloni ni mwanace jwawo Eliyesa mkwele nawo ku Litumbi lya Holi.

²⁶ Kweleko mkawule Aloni mikanjo jawo jakupelecela mbopesi ni mkawece Eliyesa. Aloni takawile kukoko.”

²⁷ Mose ŵatesile yiŵamlamwile AMBUJE. Wosope ŵene ŵatatu ŵakwesile Litumbi lya Holi mpingo wosope uli mkulola.

²⁸ Piŵayice petumbipo Mose ŵamwusile Aloni yakuwala ya mbopesi ni kum'weca Eliyesa. Aloni ŵawilile penani pa litumbi pepo nipo Mose ni Eliyesa ŵatulwice litumbilyo.

²⁹ Mpingo wosope piŵapikene kuti Aloni ŵajasice, Aisalaeli wosope ŵalisile malilo gakwe kwa masiku 30.