Numeli 19 - Chiyawo Bible

Liwu lya ng'ombe jecejewu

¹ AMBUJE* ŵalamwile Mose* ni Aloni*

² kuti ŵasalile Aisalaeli malamusi aga. Ayice najo ng'ombe jecejewu kwa Mose ni Aloni jangali liŵasi jimkanajikamulisye masengo,

³ nipo tacijipeleka kwa Eliyesa jwakutaga mbopesi. Tacijikoposya kusa kwa masakasa nipo tacijiwulaga pameso pakwe.

⁴ Kaneko Eliyesa tacijigala jine mwa miasi jakwe nipo tacijimisa ni cala cakwe kasano ni kaŵili mbali ja kumeso kwa tentijo.

⁵ Nyama josope jamtundu, kutandila lipende, nyama jakwe, miasi, ni matumbo gakwe, ayitinisye pameso pa jwakutaga mbopesijo.

⁶ Kaneko jwakutaga mbopesijo ajigale citela ca mkungusa, liwupulu lya hisope,* ni kanguwo kakacejewu ni kuyiponya m'motomo.

⁷ Panyuma pakwe, jwakutaga mbopesijo acape yakuwala yakwe ni ajoje cilu cosope, nipo kaneko akukomboleka kwinjila ku masakasa, nambo taciŵa jwangaswejela malinga ni msyungu mpaka ligulo.

⁸ Mundu juŵatinisye ng'ombe jula nombe najo akuŵajilwa kucapa yakuwala yakwe nipo ajoje, nambo nombe najo taciŵa jwangaswejela mpaka ligulo.

⁹ Kaneko mundu jwali jwamswela mwa msyungu tacikokola liwu lya ng'ombe lila ni kuliŵika pa malo gamaswela kusa kwa masakasa, kutacilisalasya kuti likuga lya Aisalaeli tilipanganyicisye masengo pakugalinganya mesi kuti gaswejele kutyosya yakusakala mpela mwa msyungu. Wele msyunguwu taciwutendaga pakutyosya ulemwa.*

¹⁰ Mundu juŵakokosile liwu jula akuŵajilwa kucapa yakuwala yakwe, nambo taciŵa jwangaswejela mpaka ligulo. Lilamusili lili lyakusosekwa mpaka kalakala kwa Aisalaeli ni kwa acalendo ŵakwe ŵakutama pasikati penu.

Lilamusi lya kuwukwaya mtembo

¹¹ Jwalijose jwakukwaya mtembo ali jwangaswejela kwa masiku msano ni gaŵili mpela mwa msyungu.

¹² Akuŵajilwa kuliswejesya msyenejo ni mesi gakuliswejecesya lisiku lyatatu soni ni lisiku lya msano ni gaŵili, nipo taciŵa ali aswejele. Nambo naga ngakuliswejesya msyene pa masiku gelega lyatatu ni lya msano ni gaŵili, ngasaswejela kose.

¹³ Jwalijose jwakukwaya mtembo ni ngaliswejesya msyene taciŵa ali jwangaswejela, ligongo nginajoga mesi gakumswejesya gewanganye ni liwu. Jwelejo akusakasya tenti ja AMBUJE, nipo ngasamŵalanjila mpela jumo jwa ŵandu ŵa Mlungu.

¹⁴ Naga mundu jwine akuwa mu tenti, jwalijose jwali mutentimo pa ndaŵi jakuwajo kapena akwinjila mwelemo taciŵa jwangaswejela kwa masiku msano ni gaŵili.

¹⁵ Ciŵiga cilicose ni mpika ya mu tentimo yayili yangali yakuwunicila yikuŵaga nombe nayo yangaswejesedwa.

¹⁶ Naga mundu jwine akumkwaya mundu jwawulajidwe kapena kuwa mwakuwila ŵandu ŵane wosope, kapena naga jwine akukwaya liwupa lya mundu kapena lilembe, akuŵa jwamsakale kwa masiku msano ni gaŵili.

¹⁷ Kusosa kutyosya wele ungaswejelawo, liwu lya ng'ombe jecejewu jiŵajitinisye kuti jityosye ulemwa jila tacilijigala ni kulitaga mu mpika, ni konjecesyamo mesi.

¹⁸ Pandanda, mundu jwali jwamswejele ajigale liwupulu lya hisope, aliloŵece m'mesimo, nipo ajimisile tentijo, ni yosope yene yayili mwelemo, ni ŵandu ŵiŵaliji pelepo. Kaŵiliko, mundu jwine jwali jwamswejele am'misile mesigo mundu juŵakamwile liwupa lya mundulyo kapena mtembo kapena lilembe.

¹⁹ Pa lisiku lyatatu ni pa lisiku lyamsano ni gaŵili mundu jwali jwamswejele jula tacim'misila mesi gala mundu jwangaswejelajo. Pa lisiku lyamsano ni gaŵili tacimswejesya mundu jula ali acapile kala yakuwala yakwe soni ali ajosile kala nipo akusaŵa jwamswejele lyuŵa lili likapile.

²⁰ Jwalijose jwali jwangaswejela mwa msyungu nipo ngakuliswejesya msyene akuŵa jwangaswejela, ligongo nginam'misila mesi gakumswejesya. Jwalakwejo akujisakasya tenti ja AMBUJE nipo ngisamŵalanjila mpela jumo jwa ŵandu ŵa Mlungu.

²¹ Jemanja mlisunje lyele lilamusili mpaka kalakala. Mundu jwakumisila mesi gakuswejesya nombe najo akuŵajilwa kucapa yakuwala yakwe, nipo mundu jwakukwaya mesi gakucapilago taciŵa jwangaswejela mpaka ligulo,

²² cilicose cakucikwaya mundu jwangaswejelajo cili cangaswejela nipo soni jwalijose jwakucikwaya cinduco akuŵa jwangaswejela mpaka ligulo.