Numeli 18 - Chiyawo Bible

Masengo ga ŵakutaga mbopesi ni Alefi

¹ AMBUJE* ŵatite kwa Aloni,* “M'mwejo, ni Alefi mkuŵajilwa kulaga ligongo lya ulemwa* uliwose wakwayana ni pakutumicila mu tenti jakusimanilana, nambo m'mwejo ni ŵanace ŵenu timcilaga ligongo lya kupanganya masengo ga ŵakutaga mbopesi.

² Myice nawo acalongo acimjenu, ŵa lukosyo lwa Lefi, kuti apanganyeje pamo ni m'mwejo masengo ni kumkamucisya pakupanganya masengo ku tenti m'mwejo ni ŵanace ŵenu.

³ Akusosekwa kukwanilisya masengo gawo kwa m'mwejo ni ma udindo gawo ga ku tenti, nambo ngamkwenela kuyiŵandicila yindu yakusagulidwa ku Malo Geswela ni malo gakupelecela mbopesi. Naga akutenda, wosope ni m'mwejo ŵakwe tacimwulaga.

⁴ Jemanjajo tacipanganya masengo ni m'mwejo ni kukwanilisya ma udindo gawo ga masengo gosope mu tenti, nambo mundu jwangaŵajilwa akapanganya masengo ni wawojo.

⁵ M'mwejo ni ŵanace ŵenu mkwenela kukwanilisya ma udindo gawo ga ku Malo Geswela ni malo gakupelecela mbopesi, myoyo ngasimbya soni mtima kwapila Aisalaeli.

⁶ Une ni junamsagwile acalongo acimjenu Alefi pasikati pa Aisalaeli mpela mtuka kwa m'mwejo. Jemanjajo ali ŵakulipeleka kwa une, myoyo tacipakombola kutenda masengo gawo mu tenti.

⁷ Nambo m'mwejo ni timcikwanilisya ma udindo gosope ga ŵakutaga mbopesi ŵakusakwayana ni malo gakupelecela mbopesi ni yele yayili ku Cipinda Ceswela Mnope. Ayi yinduyi yiŵele udindo wawo, ligongo une napele wawojo mtuka wa ŵakutaga mbopesi. Mundu jwalijose jwangaŵajilwa jwakwika ni kuyiŵandicila yindu yakusagulidwa tacimwulaga.”

Mbuwa ja ŵakutaga mbopesi

⁸ AMBUJE ŵatite kwa Aloni, “Mkumbucile kuti une ngumpa m'mwejo yakupeleka yakusosekwa yakumbanganyicisya uneji yimkaniyiŵa mbopesi syakutinisya. Nguyipeleka kwa m'mwejo ni kwa yisukulu yenu mpela mbali ja m'mwejo mpaka kalakala.

⁹ Ya mbopesi syakusagulidwa mnope syangatinisya pa malo gakupelecela mbopesi, ni asi syakumŵajila m'mwejo: mbopesi sya mbeju sya songolo, mbopesi sya ulemwa, ni mbopesi syakulipila magambo. Cilicose cakucipeleka kwa une mpela mbopesi jakusagulidwa jili ja m'mwejo ni ŵanace ŵenu.

¹⁰ M'mwejo mlyeje yele yinduyi m'malo gakusagulidwa, nipo mlyeje acalumepe basi, myitendeje yakusagulidwa.

¹¹ “Pakonjecesya, yakupeleka yambone yiliyose yakuyipeleka Aisalaeli kwa une tiyiciŵa ya wawojo. Une nguyipeleka kwa wawojo, ŵanace ŵawo, ni ŵacakongwe kwa ndaŵi syosope sya msogolo. Mundu jwalijose jwa mwiŵasa mwawo jwali jwamswejele mpela mwa misyungu akukomboleka kuyilya.

¹² “Une ngwapa wawojo yakupunda kusalala yosope yandanda kugowola yakusapelekaga Aisalaeli kwa une caka cilicose: mawuta ga olifi,* finyo, ni yimanga.

¹³ Yosopeyo yili ya wawojo. Mundu jwalijose jwa mwiŵasa mwawo jwali jwamswejele mpela mwa misyungu akukomboleka kulya.

¹⁴ “Cilicose mu Isalaeli cacipelece kuŵa ca une cili ca wawojo.

¹⁵ “Mwanace jwalijose jwandanda kupagwa kapena cinyama cakucipeleka Aisalaeli kwa une cili ca wawojo. Nambo akuŵajilwa kumwombola mwanace jwandanda kupagwa jwalijose, nipo akuŵajilwa soni kuwombola cinyama cilicose candanda kupagwa cicili cangaswejela mpela mwa msyungu.

¹⁶ Ŵanace ŵa msingu wakwana mwesi umo tacawombola pa mtengo wa mbiya sya masilifa* msano, malinga ni mtengo wakwenela.

¹⁷ Nambo ŵanace ŵandanda kupagwa ŵa ng'ombe, ngondolo, ni mbusi akasiŵawombola, ŵelewo ali ŵangune nipo ŵapelece ku mbopesi. Akusulileje miasi jakwe pa malo gakupelecela mbopesi ni kutinisya mawuta gakwe mpela mbopesi ja yakulya, jajikwete liwungo lyakusangalasya une.

¹⁸ Nyama jakwejo jiŵe ja m'mwejo, mpela cidali ni lukongolo lwa ku mlyo lwa kunyuma lwa mbopesi jambone.

¹⁹ “Une ngupeleka kwa m'mwejo, kwa ŵanace ŵenu ŵacalume, ni kwa ŵanace ŵenu ŵacakongwe kwa mpaka kalakala, yakusonjesya yosope yakusapelekaga kwa une Aisalaeli. Aci cili cilanga* cangapasuka cindesile ni m'mwejo pamo ni yisukulu yenu.”

²⁰ AMBUJE ŵatite kwa Aloni, “M'mwejo ngasimpocela katundu kapena cilambo cilicose mu Isalaeli kuŵa cenucenupe. Une ndili AMBUJE, nipo tinjimpa cilicose cicikumsoŵa.”

Yakupocela ya Alefi

²¹ AMBUJE ŵaŵecete ni une acitiji kuti, “Mbelece kwa Alefi calikumi* cilicose cakusapelekaga Aisalaeli kwa une. Gelega ni malipilo ga masengo gawo gakutenda pakusamalila tenti jakusimanilana ni une.

²² Aisalaeli ŵane wosope akaŵandicila soni ku tenti kogopa kuliwulagasya.

²³ Kutandila sambano mpaka msogolo Alefipe basi ni ŵitasamalileje tenti nipo udindo wosope wene uli m'myala mwawo. Lyele lilamusili lili mpaka kalakala likwakwaya soni wosope ŵali yisukulu yenu. Alefi ngasakola katundu jwawojwawope mpaka kalakala mu Isalaeli,

²⁴ ligongo napele jemanjajo calikumi cakusapelekaga Aisalaeli kwa une mpela yakusonga yawo kuŵa mpela katundu jwawo. Ni ligongo lyakwe nasalile jemanjajo kuti akusakola katundu kapena cilambo cawocawope mu Isalaeli.”

Yakuŵajilwa kupeleka Alefi

²⁵ AMBUJE ŵamlamwile Mose* kuti,

²⁶ aŵecete kwa Alefi maloŵe gakuti: “Pati apocele kwa Aisalaeli calikumi cakupeleka AMBUJE kwa jemanja mpela katundu jwawo, jemanja mkuŵajilwa kupeleka calikumi ca yeleyo mpela yakusonga ya kwa AMBUJE.

²⁷ Ayi yakusongayi tiyiciŵa yakulandana ni yakupeleka ya mundu jwakulima tiligu jwandanda kukomala ni finyo jwandanda kwiwula.

²⁸ Mwa lyele litalali jemanja soni timcipeleka yamsonjemsonje yayili ya kwa AMBUJE kutyocela ku cilicose calikumi cakucipocela kwa Aisalaeli. Jemanja timcipeleka yamsonjemsonje ya kwa AMBUJEYI kwa Aloni jwambopesi.

²⁹ Apeleceje yakupunda kusalala mnope mwa yakupocelayo.

³⁰ Pati apelece yakupunda kusalala mnopeyo, asalasye yakusigalayo, mpela mwakusalacisya jwakulima yakusigala ali apelece yakupeleka yakwe.

³¹ Jemanja ni maŵasa genu mlyeje yisigeleyo kulikoseko, ligongo yiŵele malipilo genu ga masengo ga mu tenti.

³² Ngasimkola magambo galigose pitimcilyapo, bola naga mli mpelece kwa AMBUJE yambone mnopeyo. Nambo mlolecesyeje kuti akasajisakasyaga mituka jakusagulidwa ja Aisalaeli pakulya mituka jilijose mkanimpelece kwa AMBUJE mituka jambonejo, naga mkutenda, timciwulajidwa.”