Numeli 16 - Chiyawo Bible

Kwimucila kwa Kola, Datani ni Abilamu

^1-2 Kola mwanace jwa Isala, jwa mwiŵasa lya Kohati, ŵawujimucile ni kusisyana nawo umlongola wa Mose.* Ŵandu ŵatatu ŵa lukosyo lwa Lubeni ŵiŵaliji ku mbali jwakwe ŵaliji Datani ni Abilamu, ŵanace ŵa Eliyabu, ni Oni mwanace jwa Peleti pamo ni Aisalaeli ŵane ŵakwana 250, ŵakulongolela ŵakumanyika cenenepe ŵakusagulidwa ni likuga lya ŵandu.

³ Jemanjajo ŵasongene pamo pameso pa Mose ni Aloni* ni ŵatite kuti, “Jemanja mpundile macili mnope! Ŵandu wosope ŵa likugali ali ŵa AMBUJE* nipo soni AMBUJE ali ni uwe wosope. Ligongo cici sambano wawo Mose, akulikwesya jikape pasikati pa likuga lya AMBUJE?”

⁴ Mose piŵapikene yeleyi, ŵaligwisisye pasi ni ŵapopesile.

⁵ Kaneko ŵatite kwa Kola ni ŵakumkuya ŵakwe, “Malaŵi kundaŵi AMBUJE tacitulosya kuti jwali jwa ŵelewo nduni, jwalakwe tacitendesya kuti jwali jwakwe, kwamba kuti jwamsagwile kuti aŵe jwakutaga mbopesi jwakwe, tacija kumtumicila ku malo gakupelecela mbopesi.

^6-7 Malaŵi m'mwejo ni ŵakumkuya ŵenu timjigale mbale syakututumicisya ubani,* timŵice makala ga moto ni ubani mwelemo, ni timyijigale kwawula nawo motowo ku malo gakupelecela mbopesi. Kaneko tuciyiwona kuti nduni mwa uwe jwamsagwile AMBUJE. Jemanja Alefi ni ŵampundile macili mnope!”

⁸ Mose ŵapitilisye kuŵeceta kwa Kola. “Apikane jemanja Alefi!

⁹ Ana akuganisya kuti ciŵele cindu camnono kuti Mlungu ŵa Aisalaeli ŵasagwile jemanja pasikati pa likuga lya ŵandu, kuti jemanja apakomboleje kuŵandikana nawo, kupanganya masengo gawo mu tenti ja AMBUJE, ni kutumicila ku likuga lya ŵandu ni kwapanganyicisya masengo jemanjajo?

¹⁰ Jwalakwe ŵakundile jemanja ni Alefi ŵane wosope kuti mkole wele ucimbicimbiwu nipo sambano mkulinga kuti mjigale ni udindo wa ŵakutaga mbopesi soni!

¹¹ Pakudandawula mwakusisyana ni Aloni, kuŵeletu kwajimucila AMBUJE kusyesyene kwakutenda jemanja ni ŵakwakuya ŵawowo.”

¹² Kaneko Mose ŵaŵilasisye Datani ni Abilamu, nambo jemanjajo ŵatite kuti, “Uwe ngatuyika!

¹³ Ana nganipakwanila kuti wawojo ŵatukopwesye mcilambo ca Iguputo ca cajila kuti atuwulaje mcipululu muno? Ni sambano aŵeje soni bwana jwa uwe?

¹⁴ Wawo nditu nginatuyicisya uwe mcilambo ca cajila kapena kutupa uwe migunda ni migunda ja mpeleya mpela jetu, nipo sambano akwamba kusosa kutulambusya. Uwe ngatuyika!”

¹⁵ Mose ŵapile mtima ni ŵatite kwa AMBUJE, “Ana tasipocele mbopesi silisyose sitapelece aŵa ŵanduŵa? Une ngininamlemwecesya jwalijose jwa jemanjaji, Nganinjigala atamose jumo jwa acibulu ŵawo.”

¹⁶ Mose ŵatite kwa Kola, “Wawojo ni ŵandu ŵawo 250 ŵakwakuyawo akusosekwa ayice ku tenti jakusimanilana ni AMBUJE malaŵi, nombe nawo Aloni taciŵa soni kukoko.

¹⁷ Jwalijose jwa jemanja tajigale mbale jakutaga moto, taŵicemo ubani mwelemo, ni kuja kukujipeleka ku malo gakupelecela mbopesi.”

¹⁸ Myoyo mundu jwalijose ŵajigele mbale jakwe jakutaga moto, ŵatasile mwelemo makala gamoto ni ubani mwelemo, ni ŵajimi pa mlango pa tenti pamo ni Mose ni Aloni.

¹⁹ Kaneko Kola ŵalisonganyisye likuga lyosope lya ŵandu, ni ŵajimi ali mkulolegana ni Mose ni Aloni pa mlango pa tenti. Mwakusisimucisya lilanguka lyakunyesimila lyakulosya kuti AMBUJE ŵaliji papopo lyawonece kwa likuga lyosope lya ŵandu lila,

²⁰ nipo AMBUJE ŵatite kwa Mose ni Aloni,

²¹ “Jimani kunyuma kwa ŵele ŵanduŵa, nipo tinajonanje pangakaŵapa.”

²² Nambo Mose ni Aloni ŵajineme pasi mpaka ngope syawo syagundile litaka ni ŵatite, “O Mlungu, ŵawo ni ndanda ja umi wosope. Ana naga mundu jumo atesile ulemwa,* akapyaga mtima ni likuga lya ŵandu lyosope lyene?”

²³ AMBUJE ŵatite kwa Mose,

²⁴ “Mwasalile ŵandu wosope ŵene atyoce ku matenti ga Kola, Datani, ni Abilamu.”

²⁵ Kaneko Mose, juŵamkuyisye acakulungwa ŵa Aisalaeli ŵajawile kwa Datani ni Abilamu.

²⁶ Jwalakwejo ŵatite kwa ŵandu ŵala, “Ajime kwakutalicila ni matenti ga aŵa ŵandu ŵakusakalaŵa nipo akasakamula cindu cilicose cacili cawo. Nimkaŵa, konasika nawo yalumo ligongo lya ulemwa wawo wosope.”

²⁷ Myoyo ŵandu ŵala ŵatyosile ku matenti ga Kola, Datani, ni Abilamu. Datani ni Abilamu ŵakopwece pasa ni ŵajimi pa mlango wa matenti gawo, pamo ni aciŵamkwawo.

²⁸ Mose ŵatite kwa ŵandu ŵala, “Amu ni mutacimanyilila jemanja kuti AMBUJE andumisye une kuti ndende ayi yindu yosopeyi nipo kuti nganinayitenda une yeleyi mwa kusosa kwangu.

²⁹ Naga aŵa ŵanduŵa akuwa mpela mwakuwila ŵandu wosope, Mlungu ngapa cilango, ni kuti AMBUJE nginanduma une.

³⁰ Nambo naga AMBUJE akutenda yimkaniyitendeceje, nipo litaka likuwuguka ni kumilwa jemanjaji ni yosope yakwete, mwakuti ni tatitimile ali ŵa umi kwawula ku cilambo ca ŵandu ŵawe, jemanja tacimanyilila kuti aŵa ŵanduŵa ŵakanile AMBUJE.”

³¹ Piŵagambile kumalisya kuŵeceta pa malo piŵaliji Datani ni Abilamu pakasice ni kuwuguka

³² nipo pamisile jemanjajo ni maŵasa gawo gakwe, pamo ni wosope ŵiŵamkuyaga Kola ni katundu jwawo.

³³ Myoyo ŵajawile kucilambo ca ŵawe ali mkumilwa ŵa umi, pamo ni katundu jwawo jwakwe. Litakalyo lyasilile ni nganawoneka soni.

³⁴ Ŵandu wosope ŵa Aisalaeli ŵiŵaliji pelepo ŵatisile piŵakupikene kulila kwawo. Ŵagumisile kuti, “Kwende tutile! Litakali nimkaŵa kutumila ni uwe ŵakwe soni!”

³⁵ Kaneko AMBUJE ŵatumisye moto wuwakolele ni kwajoca ŵandu 250 ŵiŵapelece ubani wakututumisya ŵala.

Mbale syakututumicisya ubani

³⁶ Kaneko AMBUJE ŵatite kwa Mose,

³⁷ “Mumsalile mwanace jwa Aloni ŵakutaga mbopesi, Eliyesa kuti atyosye mbale sya moto sya bulonsi sisigalile ŵandu ali atinice ni motosyo, ni kugamwalamwacisya kulikose makala gagali mumbale sya motosyo, ligongo mbale sya motosyo sili syakusagulidwa.

³⁸ Syasandwice syakusagulidwa piŵasipelece kwa AMBUJE pa malo gakupelecela mbopesi. Myoyo asijigale mbale sya ŵandu ŵaŵawulajidwe ligongo lya ulemwa wawo, asijongole ni nyundo kuti siŵe syakwepepala, ni asilinganye siŵe cakuwunicila pa malo gakupelecela mbopesi. Ticiciŵa cimanyisyo cakwakalamusya ŵandu ŵa Aisalaeli.”

³⁹ Myoyo Eliyesa jwakutaga mbopesi ŵajigele mbale syakutaga motosyo ni ŵasijongwele ni nyundo kuti siŵe mbale syakwepepala kuti apanganyicisye cakuwunicila pa malo gakupelecela mbopesi.

⁴⁰ Aci caliji cimanyisyo cakwakalamusya Aisalaeli kuti jwalijose jwamkanaŵa cisukulu ca Aloni akayika kumalo gakupelecela mbopesi kukututumisya ubani wa AMBUJE, nimkaŵa konasika mpela Kola ni ŵandu ŵakwe. Yosope yeneyi yatendece mpela muŵamlamulile AMBUJE Eliyesa kupitila mwa Mose.

Aloni akwakulupusya ŵandu

⁴¹ Kundaŵi kwakwe likuga lyosope lya ŵandu lyadandawile mwakusisyana ni Mose ni Aloni nipo ŵatite kuti, “Jemanja awuleje ŵane mwa ŵandu ŵa Ambuje.”

⁴² Panyuma pakusongana kuti ŵajimucile Mose ni Aloni, jemanjajo ŵagalawucile ku tenti ni ŵaliweni liwunde lili mkujiwunicila tentijo nipo soni lilanguka lyakunyesimila kulosya kuti AMBUJE ŵaliji papopo lyawonece.

⁴³ Mose ni Aloni ŵajawile ni kuja kwima pasogolo pa tenti,

⁴⁴ nipo AMBUJE ŵatite kwa Mose,

⁴⁵ “Ajime kunyuma kwa aŵa ŵanduŵa, nipo tinajonanje papopo palipo!” Ŵandu ŵaŵiliwo ŵajineme pasi mpaka ngope syawo kugunda litaka,

⁴⁶ nipo Mose ŵatite kwa Aloni, “Mjigale mbale jenu jakutaga motojo, ni mŵicemo makala gamoto ga kumalo gakupelecela mbopesi, ni mŵice ubani pa makalapo. Kaneko mjanguye nago kwa ŵanduwo ni atende msyungu wakwaswejesya jemanjaji. Ajanguye! Pakuŵa AMBUJE apile mtima kala nipo yisawusyo yitandite kala.”

⁴⁷ Aloni ŵapikanile, ni ŵajigele mbale jawo jakutaga moto ni ŵawutucile pasikati ja ŵandu ŵiŵasongenewo. Piŵayiweni kuti mlili waliji uli utandite kala, ŵatasile ubani pa makala gamoto ni kutenda msyungu wakwaswejesya ŵanduwo.

⁴⁸ Msyunguwo walekasisye yisawusyo yila, ni ŵagambile kwima pasikati ja ŵacijumi ni ŵawe.

⁴⁹ Winji wa ŵandu ŵiŵawile piŵaŵalasile waliji 14,700, ngaŵalanjila ŵele ŵiŵawile pa ndaŵi jiŵajimucile Kola.

⁵⁰ Piyalesile yisawusyo, Aloni ŵawujile kwa Mose pa mlango wa tenti.