Numeli 15 - Chiyawo Bible

Malamusi gakwamba Mbopesi

¹ AMBUJE* ŵampele Mose*

² malamusi aga kuti ŵasalile Aisalaeli kuti akagasunje mcilambo ciŵatiji akape jemanjajo.

³ Ng'ombe syamkambako, ngondolo, kapena mbusi komboleka kusipeleka kwa AMBUJE mpela mbopesi syakutinisya kapena mpela mbopesi jakwanilisya malumbilo kapena mpela mbopesi ja mtendele kapena mpela mbopesi ja ndaŵi sya pakutenda yindimba ya pakupopela, liwungo lya mbopesi sya yele yakulyayi likusaŵa lyakusangalasya kwa AMBUJE.

^4-5 Wosope ŵene ŵakupeleka ngondolo kapena mbusi kwa AMBUJE mpela mbopesi syakutinisya ajigaleje pa nyama jilijose utandi wakwana kilogalamu jimo wakuwanganya ni mawuta ga olifi* gakwana lita jimo mpela mbopesi ja mbeju sya songolo, pamo ni finyo jwakana lita jimo.

⁶ Naga ngondolo ali ajipelece mpela mbopesi, apeleceje soni utandi wa makilogalamu gaŵili wakuwanganya ni mawuta ga olifi gakwana lita jimo ni litika mpela mbopesi ja mbeju sya songolo,

⁷ yeleyi apeleceje pamo ni finyo jwakwana lita jimo ni litika. Liwungo lya syele mbopesisi likusaŵa lyakusangalasya kwa AMBUJE.

⁸ Pati acipelekaga ng'ombe jamkambako kwa AMBUJE, mpela mbopesi jakutinisya kapena mpela mbopesi jakugumbalicisya malumbilo kapena mpela mbopesi ja mkamulano,*

⁹ apeleceje soni pampepe ni ng'ombejo cakupeleka ca yakulya cakwana makilogalamu gatatu wakuwanganya ni malita gaŵili ga mawuta ga olifi,

¹⁰ apeleceje pamo ni finyo jwakwana malita gaŵili. Liwungo lya jele mbopesiji likusaŵa lyakwasangalasya AMBUJE.

¹¹ Yele ni yitacipelekaga pamo ni ng'ombe jamkambako jilijose, ngondolo jilijose, kapena mbusi jilijose.

¹² Pati acipelekaga yinyama yakupunda cinyama cimo mbopesi syakupeleka nasyo pamosyo tacisijonjecesya mwakuŵajilana ni muyitupile yinyamayo.

¹³ Aisalaeli wosope ŵa mcilambomo taciŵajilwa kutenda yeleyi naga acipelekaga mbopesi sya yakulya, liwungo lyakusangalasya kwa AMBUJE.

¹⁴ Nipo naga ndaŵi jilijose acalendo ŵakutama pasikati pawo, kanga ŵangakaŵa kanga ŵakutamilicika mpaka kalakala, kusosaga kupeleka mbopesi ja yakulya, ja liwungo lyakwasangalasya AMBUJE, nombe nawo asunje malamusi gagogo.

¹⁵ Pakuŵa kwa ndaŵi syosope sya pasogolo, gele malamusiga ngasigacenga kwa jemanja Aisalaeli ni acalendo ŵakutama pasikati penu kwa mipago josope. Jemanja pamo ni acalendowo ali ŵakulandana pameso pa AMBUJE,

¹⁶ Pa ligongo lya kwele kulandanaku, malamusiga ni misyunguji ayisunje jemanja ni acalendo ŵakwe.

¹⁷ AMBUJE ŵamsalile Mose kuti,

¹⁸ “Ŵasalile ŵandu ŵa ku Isalaeli kuti akasunje misyungu aji pitakajinjile mcilambo citingape jemanjajo.”

¹⁹ Pitakalyeje yakulya yiliyose yitakalimeje kweleko, akasalasyeje pambali yineyo mpela mituka jakusosekwa ja AMBUJE.

²⁰ Pakulinganya mkate, mtanda wandanda wa mkate wandanda wakupanganyidwa kutyocela ku mbeju sya songolo sya sambano awupeleceje kwa AMBUJE mpela mtuka wakusoseka. Welewu tawupelece mpela mwakupelecela mituka jakusosekwa jakupanganya pakukosola tiligu.

²¹ Kwa ndaŵi syosope sya msogolo, mituka jakusosekwaji ajipeleceje kwa AMBUJE jakutyocela ku mikate jakujipanganya ku mipago josope.

²² Nambo mwine mundu jwine alepele kusunga mwangamanyilila gane mwa malamusi giŵapelece AMBUJE kwa Mose.

²³ Nipo mwine m'msogolomo ŵandu tacilepela kutenda yosope yene yiŵayilamwile AMBUJE kupitila mwa Mose.

²⁴ Naga kulemweceka kwatendece ligongo lya ungamanyilila wa ŵanduwo, taciŵajilwa kupeleka ng'ombe ja mkambako mpela mbopesi jakutinisya, liwungo lyakwe lyakwasangalasya AMBUJE, pamo ni mbopesi ja utandi ni ja finyo. Pakonjecesya yeleyo, akuŵajilwa kukupeleka mbusi ja mkambako mpela mbopesi ja ulemwa.*

²⁵ Jwakutaga mbopesi tacitenda msyungu wa kuliswejesya m'malo mwa ŵandu wosope, nipo tacakululucila AMBUJE, ligongo yakulemwayo nginatenda mwakumanyilila nipo ŵayicisye mbopesi jawo ja ulemwa mpela mbopesi ja yakulya kukupeleka kwa AMBUJE.

²⁶ Likuga lyosope lya Aisalaeli ni acalendo ŵakutama pasikati pawo tacakululucila, ligongo jwalijose ŵatesile nawo yakulemwecekayo.

²⁷ Naga mundu jumo akutenda ulemwa mwangamanyilila, tacipeleka mbusi jamkolo ja caka cimo mpela mbopesi ja ulemwa.

²⁸ Jwakutaga mbopesi tacitenda msyungu wakuliswejesya kuti amswejesye mundujo ku ulemwa wakwe, nipo tacimkululucila.

²⁹ Lyele lilamusili litendeceje kwa wosope ŵatesile ulemwa mwangamanyilila, kanga acimsyene cilambo Aisalaeli kapena acalendo ŵakutama nawo.

³⁰ Nambo mundu jwalijose jwakutenda ulemwa mele, kanga ali msyene jwa cilamboco kapena mlendo, atesile ulemwa wakusisyana ni AMBUJE pangapikanila malamusi gawo, nipo tacimwulaga,

³¹ ligongo jwalakwe akanile yiŵaŵecete AMBUJE nipo akasile limo mwa malamusi gawo mwa mele, taciliwulasya msyene.

Mundu jwele jumkanasunga lisiku lyakupumula lya Ayuda

³² Lisiku line, Aisalaeli piŵaliji ali mcipululu mula, mundu jwine ŵamsimene ali mkulokotanya sasu syakukolecesya moto pa lisiku lyakupumula lya Ayuda.

³³ Ŵamjigele kuja najo kwa Mose, Aloni* ni likuga lyosope lya ŵandu,

³⁴ nipo ŵamwugalile, ligongo yaliji mkaniyimanyice yakutenda najo.

³⁵ Kaneko AMBUJE ŵatite kwa Mose, “Mundujo akuŵajilwa kuti awulajidwe, likuga lyosope lya ŵandu limsome ni maganga kusa kwa masakasa.”

³⁶ Myoyo likuga lyosope lya ŵandu lyamjigele kukopoka najo kusa kwa masakasa ni kuja kukumsoma maganga mpaka kuwa, mpela muŵalamulile AMBUJE.

Malamusi ga mbonji

³⁷ AMBUJE ŵamlamwile Mose

³⁸ kuti ŵasalile Aisalaeli ayi: “Apanganyeje mbonji pandumba pa yakuwala yawo ni kuŵika lukonji lwa buluwu pa mbonji jilijose. Jemanja atendeje yeleyi kwa ndaŵi syosope sya msogolo ku mipago josope.

³⁹ Mbonjisyo tisiciŵa yimanyisyo yawo, ndaŵi jilijose jakusiwona tacigakumbucila malamusi gangu ni kugapikanilaga, ni myoyo jemanja ngisatyoka kose kwa une ni kukuya yakusosa ya mitima jawo ya ulemwa.

⁴⁰ Mbonjisyo tisicakumbusya jemanja kuti asunje malamusi gangu gosope, nipo taciŵa ŵangune kusyesyene.

⁴¹ Une ndili AMBUJE Mlungu ŵawo, junakopwesye jemanja ku cilambo ca Iguputo kuti m'mbe Mlungu jwenu. Une ndili AMBUJE.”