Numeli 14 - Chiyawo Bible

Ŵandu akudandawula

¹ Aisalaeli piŵapikene maloŵe ga ŵandu 12 ŵiŵajile kukusonda mwa asili cilambo ca Kenani ŵala, ŵacesisye kulila cilo cosope cene.

² Jemanjajo ŵadandawile mwakusisyana najo Mose* ni Aloni,* nipo ŵatite kuti, “Kukaliji cenene kuwila mu Iguputo kapena mcipululu munomuno!

³ Ligongo cici AMBUJE* akutujigalila uwe mu cele cilamboco? Uwe tacija kutuwulaga ku ngondo, nipo aciŵamkwetu ni ŵanace ŵetu tacakamula. Ana ngamkaniyiŵa cenene kuti tuwujile ku Iguputo?”

⁴ Myoyo ŵasalilene jwine ni mjakwe kuti, “Kwende tusagule jwakulongolela nipo tuwujileje ku Iguputo!”

⁵ Kaneko Mose ni Aloni ŵajinamile pasi pasogolo pa ŵandu wosope ŵene.

⁶ Nipo Yoswa mwanace jwa Nuni ni Kalebu mwanace jwa Yefune, ŵaŵili mwa ŵakusondawo, ŵapapwile yakuwala yawo mwa canasa

⁷ ni ŵatite kwa ŵandu ŵala, “Cilambo citwasondile mwa asili cili cakupunda kusalala.

⁸ Naga AMBUJE akusangalala ni uwe, tacitujigalila kweleko ni kuja kupeleka cilambo cakusicila soni cacajilaco kwa uwe.

⁹ Akasiŵajimucila ni kusisyana ni AMBUJE soni akasiŵajogopa ŵandu ŵakutama kweleko. Tucapunda jemanjajo mwangasawusya. AMBUJE ali pamo ni uwe nipo ajipundile milungu jijacinjilicisyaga jemanjajo, myoyo akusajogopa.”

¹⁰ Likuga lyosope lya ŵandu lyaliji mkwajogoya kuti tilyawulaje pakwasoma jemanjajo ni maganga, nambo mwakusisimucisya ŵanduwo ŵaliweni lilanguka lyakunyesimila lyakulosya lumbili ni kuti AMBUJE ŵaliji papopo lilimkuwoneka penani pa tenti.

Mose akwapopelela ŵandu

¹¹ AMBUJE ŵatite kwa Mose, “Ana ŵele ŵanduŵa tacingana une mpaka cakaci? Tacikana kukulupilila mwa une mpaka cakaci, atamose une mbanganyisye yakumasya lunda yejinji pa sikati pawo?

¹² Une tinjitumisya yisawusyo ni kwajonanga jemanjaji, nambo tinjimtenda m'mwejo kuŵa atati ŵa mtundu uwuli wawukulungwa ni wamacili kupunda mwaŵelele jemanjajo.”

¹³ Nambo Mose ŵatite kwa AMBUJE, “Wawo ŵakopwesye ŵele ŵanduŵa mu Iguputo ni macili gawo. Pitacipikana Aiguputo yiŵatendele wawojo ŵandu wawo,

¹⁴ jemanjajo tacasalila ŵandu ŵakutama mcilambo amuno. Ŵele ŵanduŵa apikene kala kuti, wawojo, AMBUJE, ali pamo ni uwe, soni kuti wawojo akusawonekaga naga liwunde lijimi penani petu, nipo kuti wawojo akusatulongolela mcipilala ca liwunde musi nipo mcipilala ca moto naga cili cilo.

¹⁵ Sambano naga akwawulaga ŵandu ŵawo wosopeŵa, mitundu jijapikene ya kupikanika kwawo tijiciti kuti,

¹⁶ wawo ŵawuleje ŵandu ŵawo mcipululu ligongo nginapakombola kuti ŵajigale ni kwajinjisya mcilambo ciŵatesile cilanga* kuti tacapa jemanjajo.

¹⁷ Myoyo AMBUJE, sambano une ngupopela kuti, atulosye macili gawo nipo ayitende yindu yiŵatesile cilanga yila piŵatiji kuti,

¹⁸ ‘Une, AMBUJE, jwangapya mtima mwacitema, nipo ngusaŵa jwa cinonyelo cekulungwa ni cikulupi ni kukululucila ulemwa* ni kwimucila. Nambo tinjapa cilango ŵanace ni yisukulu mpaka ku mpago watatu ni wamcece ligongo lya ulemwa wa acinangolo ŵawo.’

¹⁹ Nipo sambano, AMBUJE, mpela mwa ukulungwa wa cinonyelo cawo cangacenga, akululuce ulemwa wa aŵa ŵanduŵa, ngwaŵenda, mpela aŵele mkwakululucila kutandila piŵatyosile ku Iguputo.”

²⁰ AMBUJE ŵajanjile kuti, “Tinjakululucila, mpela yimtite m'mwejo pakuŵenda.

²¹ Nambo nguŵika cilanga kuti pakuŵa ndili jwa umi nipo soni pakuŵa ngusimanika ni kugumbala pa cilambo capasi,

²² pangali jwalijose jwa jemanjaji jutaciŵa umi kuti akajinjile aco cilamboco. Jemanjaji aliweni lilanguka lyakunyesimila lyakulosya lumbili kuti une mbali nipo ayiweni yakumasya lunda yinayitesile mu Iguputo ni mcipululu, nambo jemanjaji akulinga kupilila kwangu ndaŵi ni ndaŵi nipo akanile kumbikanila.

²³ Ngisajinjila mcilambo cinatesile cilanga kwa acinangolo ŵawo. Pangali jwalijose jwa jemanjajo jwanganile une jutacicijinjila.

²⁴ Nambo ligongo Kalebu jwamasengo jwangu akwete msimu wine nipo aŵele jwakulupicika, tinjimjinjisya mcilambo ciŵasondile mwa asilico, nipo ticiciŵa ca yisukulu yakwe.

²⁵ Cilambo cakutama sambano jino Aamaleki ni Akenani mu yiŵata yakwe. Malaŵi tawujile ni kwawula mcipululu ku mbali ja Nyasa Jecejewu.”*

AMBUJE akwapa cilango ŵandu ligongo lyakudandawula kwawo

²⁶ AMBUJE ŵatite kwa Mose ni Aloni,

²⁷ “Ana kalingwa soni mpaka cakaci aŵa ŵandu ŵakusakalaŵa tacidandawula mwakusisyana ni une? Mbesile ni kupikana yele yakudandawulayi!

²⁸ Sambano kwanga kwakwe ni aku, ŵasalile kuti: ‘Une ngulumbila kuti pakuŵapo une ndili jwa umi, tinjimtendela m'mwejo yimŵendileyo. Une, AMBUJE, mbecete.

²⁹ Jemanja timciwa nipo mitembo jenu tijiciŵa palipose mcipululu muno. Ligongo adandawile mwakusisyana ni une, pangali jwa jemanja jwapundile yaka 20 jutacijinjila mu cele cilamboco.

³⁰ Une naŵisile cilanga cakuti jemanja tacitama kweleko, nambo pangali jumo jwa jemanja jutacitamako, nambo Kalebu ni Yoswape basi.

³¹ Jemanja ŵatite kuti tacakamula ŵanace ŵawo, nambo une tinjayicisya mcilambo ciŵacikanile jemanja, nipo ticiciŵa kumangwawo.

³² Jemanja timciwila mcipululu munomuno,

³³ timcijenda mcipululu kwa yaka 40, timcilaga ligongo lya ungakulupicika wa jemanja, mpaka jwakumalicisya jwa jemanja ali awile.

³⁴ Jemanja tacilaga ligongo lya ulemwa uŵatesile kwa yaka 40, caka cimo m'malo mwa lisiku limo mwa masiku 40 giŵajigele pakwendela cilamboco. Jemanja tacikumanyilila kugopolela kwakwe kwakusisyana ni une!

³⁵ Ngulumbila kuti tinjitenda ayi kwa jemanja ŵandu ŵakusakala ŵimsongene pamo kusisyana ni une. Wosope ŵene ŵa jemanjaji taciwila mcipululu munomuno. Une, AMBUJE, mbecete.’ ”

^36-37 Acalume ŵiŵatumisye Mose kuja kwendela cilambo ŵayicisye maloŵe ga unami gakucisakasya cilamboco gigatendesye ŵandu ŵala kuti adandawule mwakusisyana ni AMBUJE. Nipo myoyo AMBUJE ŵatumicisye cilwele cakogoya, cicawuleje ŵandu.

³⁸ Mwa ŵandu ŵakusonda cilambo 12 ŵala Yoswa ni Kalebupe basi ni ŵiŵakulupwice.

Kulinga kwandanda kuti asumule cilambo

³⁹ Mose piŵasalile Aisalaeli yiŵatite AMBUJE, ŵalisile kwakogoya mwa canasa.

⁴⁰ Ali alaŵile kundaŵi kwakwe ŵawutandite ulendo kuja kukusumula cilambo ca kwitumbi ku Kenani, jemanjajo ŵatite kuti, “Uwe tuli cile sambano kwawula ku malo giŵatusalile AMBUJE. Tukwiticisya kuti tutesile ulemwa kusyesyene.”

⁴¹ Nambo Mose ŵatite kuti, “Nambi ligongo cici ngakwapikanila AMBUJE sambano? Jemanjatu ngasapunda kose!

⁴² Akajawula. AMBUJE nginaŵa pamo ni jemanja, nipo amagongo ŵenu takapunde pa ngondo.

⁴³ Pitakatande kumenyana ni Aamaleki ni Akenani, jemanja takawe ku ngondo kukoko, AMBUJE ngisaŵa ni jemanja, ligongo akanile kwakuya.”

⁴⁴ Nambo ŵakanilile kwawula pakwela litumbi ni kwinjila mcilambomo, atamose Libokosi lya Cilanga kapena Mose nginatyoka pa masakasapo.

⁴⁵ Kaneko Aamaleki ni Akenani ŵiŵatamaga kweleko ŵatandite ni kwapunda jemanjajo, nipo ŵatopwesye mpaka kuja kwika nawo ku msinda wa Holoma.