Numeli 13 - Chiyawo Bible

Ŵakusonda mwa asili

¹ AMBUJE* ŵatite kwa Mose* kuti,

² “Msagule jumo mwa ŵakulongolelaŵa jwalijose kutyocela ku mitundu 12 ni mwatumisye mpela ŵakusonda mwa asili kukusonda mwa asili cilambo ca Kenani, cingucipeleka kwa Aisalaeli.”

^3-15 Mose ŵapikanile nipo ŵatumisye acakulungwawo kutyocela ku cipululu ca Palani. Aga ni mena gawo: Lukosyo Mwenye Lubeni Shamuwa mwanace jwa Sakuli Simiyoni Shafati mwanace jwa Holi Yuda Kalebu mwanace jwa Yefune Isakala Igali mwanace jwa Yosefe Efelemu Hosheya mwanace jwa Nuni Benjamini Paliti mwanace jwa Lafu Sebuloni Gadiyeli mwanace jwa Sodi Manase Gadi mwanace jwa Susi Dani Amiyele mwanace jwa Gemali Asha Setuli mwanace jwa Mikaele Nafutali Nahibi mwanace jwa Fofisi Gadi Geuyeli mwanace jwa Maki

Lukosyo Mwenye

¹⁶ Ŵeleŵa ni ŵakusonda mwa asili ŵiŵatumisidwe ni Mose kukusonda mwa asili cilambo ca Kenani. Mose ŵamkolasile Hosheya mwanace jwa Nuni lina lyakuti Yoswa.

¹⁷ Mose piŵatumisyaga kuti ajawuleje, ŵasalile kuti, “Pakutyocela apano ajawule kumpoto kwa cilamboco ni akacijinjile kuja ku mbali ja kum'mwela ni akapelenganye mpaka ku cilambo ca matumbi ga Kenani.

¹⁸ Akalolecesye kuti ana cili cilambo ca mtunduci, ana mwana ŵandu ŵalingwa ŵakutama mwelemo, nipo macili gawo gali gamtuli.

¹⁹ Akalolecesye naga cilamboco cili cambone kapena camtega nipo soni kuti ana ŵandu ŵakwe akutama m'matawuni gakulanguka kapena m'misinda jana mapupa.

²⁰ Akalolecesye naga litaka lyakwe lyana cajila kapena soni naga cilamboco cana yitela. Nipo akaja kuliŵalila kwika nayo yisogosi yakusapanda kweleko.” (Jaliji ndaŵi jiyatandaga kwiwula yisogosi ya mpeleya).

²¹ Myoyo acalumewo ŵajile kumpoto kuja kwendelela cilambo cila kutyocela ku cipululu ca Sini kum'mwela ulendo mpaka ku Lehobu, kuŵandicila ku Mpata wa Hamati kumpoto.

²² Ŵatandite kwawula ku mbali ja kum'mwela kwa cilamboco ni ŵayice ku Hebuloni, kugatamaga maŵele ga Ahimani, Sheshayi, ni Talimai yisukulu ya mtundu wa ŵandu ŵakulungwakulungwa ŵakolanjidwa Anakimu. (Hebuloni ali ataŵile papite yaka msano ni yiŵili mkinataŵe Sowani mu Iguputo).

²³ Jemanjajo ŵayice ku Ciŵata ca Eshikolo, nipo ŵakatile lunyambi pelepo lulwakwete cisagwa ca mpeleya mwakuti ŵakamusyangene acalume ŵaŵili tucinyakula cisagwaco pa citela jwine pasogolo jwine kunyuma. Jemanjajo ŵajigele soni yisogosi ya pomugalaneti ni nguju.

²⁴ (Gele malogo gakolanjidwe kuti, Ciŵata ca Eshikolo ligongo lyacisagwa ca mpeleya ciŵacikatile Aisalaeli pelepo).

²⁵ Ali ajendele cilambo cila kwa masiku 40, ŵakusonda ŵala ŵawujile

²⁶ kwa Mose, Aloni* ni likuga lyosope lya Aisalaeli ku Kadeshi mcipululu ca Palani. Ŵalondesye yosope yiŵayiweni nipo ŵalosisye yisogosi yiŵayice nayoyo.

²⁷ Jemanjajo ŵatite kwa Mose, “Uwe tusondile mwa asili cilambo cila ni tuciweni kuti cakusicila soni cana cajila, ayi ni yine mwa yisogosi yakwe.

²⁸ Nambo ŵandu ŵakutama kweleko ali ŵamacili, nipo misinda jawo jili jajikulungwa mnope soni jana mapupa gakwe. Cakupunda kusakala ni aci, twayiweni yisukulu ya Aanaki kweleko.

²⁹ Amaleki akutama mbali ja kum'mwela kwa cilamboco, Ahiti, Ayebusi, ni Aamoli akutama ku cilambo ca ku matumbi, nipo Akenani akutama ciŵandika ni Nyasa ja Mediteleniyani ni mungulugulu Lusulo lwa Yolodani.”

³⁰ Nambo Kalebu ŵatondweye ŵandu ŵiŵadandawulaga mwakusisyana ni Mose, ni ŵatite kuti, “Kwende tukatande sambano jino nipo tukacijigale cilamboco, tuli ŵakulimba mnope mwakuti tutukacisumule cenenepe.”

³¹ Nambo ŵandu ŵiŵalongene ni Kalebu ŵala ŵatite kuti, “Iyayi, uwe nganitukola macili gakuja kukwatanda jemanjajo, pakuŵapo ŵandu ŵakwe ali ŵamacili kutupunda uwe.”

³² Myoyo jemanjajo ŵajenesye ngani ja unami pasikati pa Aisalaeli jakwamba cilambo ciŵacisondile mwa asili. Ŵaŵecetaga kuti, “Cilamboco cangasogola atamose yakulya yakwanila yakwalisya ŵandu ŵakutama kweleko. Jwalijose jutwam'weni jwaliji jwamlewu,

³³ nipo soni twaweni ŵandu ŵakulungwakulungwa kweleko, yisukulu ya Aanaki. Uwe twagambile kuŵa mpela yitete, nipo amu ni mutuwoneceleje uwe kwa jemanjajo.”