Numeli 12 - Chiyawo Bible

Miliyamu akupegwa cilango

¹ Mose* ŵalombele jwamkongwe jwa mtundu wa ci Kushi, nipo Miliyamu ni Aloni* ŵamsisisye.

² Jemanjajo ŵatite kuti, “Ana AMBUJE* aŵecete kupitila mwa Mosepe basi? Nginaŵeceta soni kupitila mwa uwe ŵakwe?” AMBUJE ŵapikene yiŵaŵeceteyo.

³ Mose ŵaliji mundu jwakulinandiya, kumpunda mundu jwalijose pa cilambo capasi.

⁴ Mwakusisimucisya AMBUJE ŵatite kwa Mose, Aloni ni Miliyamu, “Ngusosa jemanja wosope ŵatatu myice ku citenti cakusimanilana ni une.” Jemanjajo ŵajawile,

⁵ nipo AMBUJE ŵatulwice mu cipilala ca liwunde, ŵajimi pa mlango wakwinjilila mu citenti, ni ŵaŵilasile kuti, “Aloni! Miliyamu!” Ŵaŵili ŵala ŵajawile pasogolo,

⁶ nipo AMBUJE ŵaŵecete ni une acitiji kuti, “Sambano mpikane yitimbecete! Naga apali ŵakulocesya pasikati penu, une ngisinalilosya namsyene kwa jemanjajo kupitila m'mesomkulola, nipo ngusimbecetaga kwa jemanjajo mu sagamisi.

⁷ Ayi yili yakulekangana ni pinguŵeceta ni jwakutumicila jwangu Mose, namŵilasile jwalakwe kuŵa jwamkulungwa jwa ŵandu ŵangu Aisalaeli.

⁸ Myoyo ngusimbecetaga ni jwalakwe pameso ni pameso, mwakupikanika nipo ngaŵa mwa yitagu, jwalakwe ambweni mumbelele une! Nambi uli jemanja kusisyana ni jwamasengo jwangu?”

⁹ AMBUJE ŵapile mtima ni jemanjajo, nipo piŵatyokaga jwalakwe

¹⁰ nombe nalyo liwundelyo lyatyosile pa citenti. Mwakusisimucila lipende lya Miliyamu lyasandwice kuŵa lya matana nipo lyeswela mpela matalila. Aloni piŵayiweni yiyatendece kwa Miliyamuwo,

¹¹ ŵaŵecete kwa Mose kuti, “Conde, Mbujegwangu, akasatulagasya ni kutupa cilango ligongo lya ulemwa* wetu ututesile ligongo lyakuloŵela kwetu.

¹² Akakunda kuti Miliyamu aŵe mpela cindu cicapagwile cili cewe kala cana mnowu wejonasice.”

¹³ Myoyo Mose ŵakwesisye maloŵe gakwe kwa AMBUJE acitiji, “O Mlungu, ŵaposye Miliyamu!”

¹⁴ AMBUJE ŵajanjile kuti, “Yikaŵe kuti baba ŵenu ŵasunile mata pa ngope jenu, mkatesile soni kwa masiku msano ni gaŵili. Myoyo ŵawugalile kusa kwa masakasa kwa cijuma cimo, panyuma pakwe ŵamjinjisye soni.”

¹⁵ Miliyamu ŵamkopwesye pasa pa masakasa kwa masiku msano ni gaŵili, nipo ŵandu nginajenda ulendo mpaka piŵamjigele soni ni kumjinjisya.

¹⁶ Kaneko ŵatyosile ku Haseloti ni kuja kutaŵa masakasa mcipululu ca Palani.