Numeli 11 - Chiyawo Bible

¹ Ŵandu ŵala ŵatandite kudandawula kwa AMBUJE* ligongo lya yakusawusya yawo. AMBUJE piŵapikene jemanjajo, ŵapile mtima nipo ŵatumisye moto kwa ŵanduwo. Wakolele pasikati pawo nipo wajonasile pakutinisya mbali jimo ja masakasago.

² Ŵandu ŵala ŵamdandawulile Mose* kuti ŵakamucisye, nipo jwalakwe ŵapopesile kwa AMBUJE, nipo moto ula wasimile.

³ Myoyo malogo ŵagakolasile kuti Tabela, ligongo moto wa AMBUJE wakolele pelepo pasikati pawo.

Mose akusagula acimlongola 70

⁴ Ŵapali ŵandu ŵane ŵa cilendo ŵiŵajendaga ni Aisalaeli. Jemanjajo lwakamwile lukowo lwa nyama, nipo atamose Aisalaeli ŵenewo ŵatandite kudandawula kuti: “Bola tukagambe kola nyama!

⁵ Mu Iguputo twasyoŵelele kulya somba sya mitundumitundu sitwasisosaga, nipo nganitusumaga kose. Aganisye mangaka, maticiti, ni anyesi jwa mitundu jitatu jula.

⁶ Nambo sambano macili getu gamasile. Pangali cakulya cilicose nambo mana pega basi lisiku ni lisiku!”

⁷ (Mana galiji mpela mbeju syamnono, mtundu wakwe weswela nambo soni wamti mpela kale.

^8-9 Syagwaga cilo pamo ni mangame pa masakasapo. Kundaŵi kwakwe ŵandu ŵasyungulilaga ni kulokotanyaga, ŵasyagaga kapena kutwa kuti gaŵe utandi, nipo kaneko ŵagatelekaga ni kusemula ni kupanganya tumakeke twamti mpela mikate. Kunong'a kwakwe mpela mikate jewanganye ni mawuta ga olifi.*)

¹⁰ Mose ŵapikene ŵandu ali mkudandawula ali ajimi m'makuga m'milango jawo jakwinjilila m'matenti gawo. Jwalakwe yamsakalisye ligongo AMBUJE ŵapile nawo mtima jemanjajo,

¹¹ nipo ŵatite kwa AMBUJE, “Ligongo cici andendele une yamti myiyi? Ligongo cici ngakusangalasidwa ni une? Wawo ambele une udindo wakwalolela ŵandu wosopeŵa?

¹² Ana unaŵelece jemanjaji ni une, kuti wawojo asalileje kuti naleleje jemanjaji ni kwajigala kwawula nawo ku cilambo ciŵatesile wawojo cilanga* ni acinangolo ŵawo?

¹³ Une mpaka najipate kwapi nyama jampaka jakwanile ŵele ŵandu wosopeŵa? Jemanjaji akwamba kundilila une ni kuŵendaga nyama.

¹⁴ Une jikape ngaŵa mkupakombola kwasamalila ŵandu wosopeŵa, yindupile mnope.

¹⁵ Naga mutandendele une ni mwelemu, conde andendele canasa nipo agambe kumbulaga sambano jino, kuti une ngayiwona soni yakusawusyayo.”

¹⁶ AMBUJE ŵatite kwa Mose, “Ŵasonganye acalume ŵakucimbicika 70 ŵakumanyika mpela ŵakwalongolela ŵandu, myice nawo kwa une ku tenti jangu jakusimanilana, ni ŵasalile kuti akajime pasogolo pa wawojo.

¹⁷ Une tinjituluka ni kuŵeceta ni m'mwejo pelepo, nipo tinjijigala msimu unawupelece kwa m'mwejo ni kuwupeleka kwa jemanjajo. Kaneko jemanjajo tacipakombola kumkamucisya m'mwejo kuwunyakula udindo wa ŵele ŵanduŵa, nipo m'mwejo mkawunyakula udindowo jikape.

¹⁸ Sambano ŵasalile ŵanduwo kuti, ‘Aliŵambasye jemanja acimsyene, pakuŵa malaŵi tacikola nyama jakulya. AMBUJE ŵampikene jemanja mli mkulila ni kutiji mkusosa mkakole nyama ni kutiga bola pimwaliji ku Iguputo kula. Sambano AMBUJE tacimpa jemanja nyama, nipo jemanja timcilya.

¹⁹ Jemanja timcilya nyamajo ngaŵa lisiku limope kapena gaŵili, kapena msano, kapena 10, kapena 20,

²⁰ nambo kwa mwesi wosope wene, mpaka tijimpesye ni kukopoka mumbula, mpaka kwalwasya. Ayi tiyicitendekwa ligongo jemanja mwakanile AMBUJE ŵali apano pasikati penu nipo jemanja mdandawile kwa ŵelewo kuti ngimkinimtyoka ku Iguputo.’ ”

²¹ Mose ŵatite kwa AMBUJE, “Une apano ngwalongolela ŵandu 600,000, nipo wawo akuti tacapa jemanjajo nyama jakwanila kwa mwesi umo?

²² Ana tacawulajila ng'ombe ni ngondolo syasijinji kuti syakwane jemanjaji? Ana somba syosope sya m'nyasa mpaka syakwanile jemanjaji?”

²³ AMBUJE ŵajanjile kuti, “Ana macili ga une gana mbesi? M'mwejo pangakaŵapa timciyiwona yimbecete une naga tiyicitendekwa kapena iyayi!”

²⁴ Myoyo Mose ŵakopwece pasa ni kwasalila ŵandu yiŵaŵecete AMBUJE. Jwalakwe ŵasonganyisye acakulungwa ŵakulongolela 70 ŵaŵisile kusyungulila tenti.

²⁵ Kaneko AMBUJE ŵatulwice mwiwunde ni ŵaŵecete kwa jwalakwe. AMBUJE ŵajigele msimu uŵampele Mose ni kuwupeleka kwa acakulungwa ŵakulongolela 70. Msimu piŵayice pa jemanjajo, ŵatandite kuŵeceta mwakwesya maloŵe mpela ŵakulocesya, nambo ngaŵa kwa ndaŵi jelewu.

²⁶ Ŵaŵili ŵa acakulungwa ŵakulongolela msano ni ŵaŵiliwo, Elidadi ni Medadi, ŵagambile kutama m'masakasa pemo nipo nginakopoka kuja ku tenti. Msimu ŵayice pa jemanjajo m'masakasa pemo, nipo nombe nawo ŵatandite kuŵeceta mwakwesya maloŵe mpela ŵakulocesya.

²⁷ Mcanda jwawutwice kuja pasa kukumsalila Mose yiŵatendaga Elidadi ni Medadi.

²⁸ Kaneko Yoswa mwanace jwa Nuni, juŵaliji jwakumkamucisya Mose kutandila ali jwamnondi, ŵaŵecete ni ŵatite kwa Mose, “Mbuje gwangu ŵalekasye jemanjajo!”

²⁹ Mose ŵajanjile kuti, “Ana akutenda wiwu ni jemanjajo ligongo lya une? Ninganonyele AMBUJE ali apelece msimu ŵawo kwa ŵandu ŵakwe wosope ni kwaŵecetesya mwakwesya maloŵe mpela ŵakulocesya!”

³⁰ Kaneko Mose ni acakulungwa ŵakulongolela 70 ŵa Aisalaeli ŵala ŵawujile ku masakasa.

AMBUJE akutumisya yuti

³¹ Mwakusisimucisya AMBUJE ŵatumisye mbungo jijayicisye yuti kutyocela ku nyasa, yiyagulukaga mwinani mwangakwana mita jimo kutyocela pasi. Yatusile pa masakasa ni pa malo gosope kugasyungulila masakasago ku mbali syosope syene.

³² Myoyo lisiku lyosope lyenelyo, cilo cosope, ni lisiku linelyo mpela masiku gaŵili, ŵandu masengo gawo galiji gakukamula yuti, pangali juŵakamwile yangakwana makilogalamu 1,000. Jemanjajo ŵayijanice kuti yijumule kusyungulila pa masakasa posopepo.

³³ Nyama jili ciŵela jejinji jakuti alyeje jemanjajo, AMBUJE ŵapile mtima ni ŵanduwo nipo ŵatumicisye yisawusyo pasikati pawo.

³⁴ Gele malogo ŵagakolasile kuti, Kibuloti Hatafa (kugopolela kuti, “Malembe ga ŵa mitulo”), ligongo pelepo ŵasicile ŵandu ŵa lukowo ŵala.

³⁵ Kutyocela pelepo ŵanduwo ŵajile ku Haseloti, kuŵataŵile masakasa.