Numeli 10 - Chiyawo Bible

Malipenga ga silifa

¹ AMBUJE* ŵatite kwa Mose* kuti,

² “Mpanganye malipenga gaŵili ga silifa* gitagombeje pakwaŵilanga ŵandu kuti asongane nambo soni pakusama pa masakasa.

³ Pamti agombile malipenga gosope gaŵili pa ndaŵi jimo, likuga lyosope lya ŵandu lisonganeje kumsyungulila m'mwejo pa mlango wakwinjilila mu citenti cakusimanilana ni une.

⁴ Nambo naga lipikanice lipenga limope, ni kuti acakulungwa ŵakulongolela ŵa maŵele ni ŵitasongane kumsyungulila m'mwejo.

⁵ Pamti kupikanice gomba kwa ndaŵi jejipi, mitundu jijataŵile masakasa kungopoko lyuŵa tijicisama.

⁶ Pamti kupikanice gomba kwa ndaŵi jejipi kaŵili, mitundu jijataŵile masakasa kum'mwela tijicisama. Myoyo gomba kwa ndaŵi jejipi tikucipikanika pakugatyosya masakasa,

⁷ nambo pakusosa kuliŵilanga likuga lya ŵandu pamo, kugomba kwa ndaŵi jajilewu tikucipikanika.

⁸ Malipenga tagombeje yisukulu ya Aloni,* ŵele ŵali ŵakutaga mbopesi. “Lilamusili mlitendeje ndaŵi syosope sya msogolo.

⁹ Pamkwawula ku ngondo mcilambo mwenu, kukulicinjilicisya kwa amagongo ŵenu ŵamtandite jemanja, mgombeje malipenga ga cimanyisyo ca ngondo. Une AMBUJE Mlungu jwenu, tinjimkamucisya ni kumkulupusya kwa amagongo ŵenu.

¹⁰ Nambo soni pa ndaŵi sya cisangalalo pa yindimba yenu ya masiku gandanda ga miesi ni yindimba yenu yine ya ndaŵi sya mapopelo jemanja mgombeje malipengago pakupeleka mbopesi syakutinisya ni sya mkamulano. Kaneko une tinjimkamucisya. Une ndili AMBUJE Mlungu jwenu.”

Aisalaeli akutyosya masakasa

¹¹ Pa lisiku lya 20 lya mwesi mu caka caŵili ali atyosile ŵandu ku Iguputo, liwunde lilyaliji penani pa tenti jakusimanganilana ni AMBUJE lyakwesile,

¹² nipo Aisalaeli ŵawutandite ulendo wawo wakutyoka ku cipululu ca Sinayi. Liwundelyo lyayice kukutamilicika mcipululu ca Palani.

¹³ AMBUJE piŵalamwile kupitila mwa Mose, jemanjajo ŵatandite kwenda,

¹⁴ nipo ndaŵi jilijose jiŵatyokaga, ŵaliji mkukuya mndandanda uwowo. Ŵele ŵiŵakuyaga mbendela ja likuga liŵalongolelaga ŵa lukosyo lwa Yuda ni ŵiŵatandite kutyoka pandanda, mpela mwa makuga gawo, nipo Nashoni mwanace jwa Aminadabu ni juŵalongolelaga.

¹⁵ Netanele mwanace jwa Suwala ni juŵalongolelaga lukosyo lwa Isakala,

¹⁶ nipo Eliyabu mwanace jwa Heloni ni juŵalulongolelaga lukosyo lwa Sebuloni.

¹⁷ Kaneko ŵajigwisyaga Tenti, nipo maŵele ga Geleshoni ni Melali, ŵiŵajinyakwile ŵawutandaga ulendo.

¹⁸ Ŵakuya ŵakwe ŵaliji ŵele ŵiŵakuyaga mbendela ja likuga liŵalilongolele ŵa lukosyo lwa Lubeni ŵawutandaga ulendo, mpela mwa makuga gawo, nipo Elisuli mwanace jwa Sheduwele ni juŵalongolelaga.

¹⁹ Shelumiyele mwanace jwa Sulishadayi ni juŵalongolelaga lukosyo lwa Simiyoni,

²⁰ nipo Eliyasafu mwanace jwa Deuweli ni juŵaliji jwakulongolela lukosyo lwa Gadi.

²¹ Kaneko liŵasa lya Alefi ŵa Kohati ni ŵiŵajawulaga pa ulendo, ali anyakwile yindu yakusagulidwa. Pandaŵi jiŵayikaga ku masakasa gane, tentijo ŵaliji ali ajitaŵile soni.

²² Ŵakuyicisya pelepo ŵaliji ŵa likuga lilyakuyaga mbendela ja lukosyo lwa Efelemu ŵawutandaga ulendo, mpela mwa makuga gawo, nipo jwakulongolela likugalyo ŵaliji Elishama mwanace jwa Amihudi.

²³ Gamaliele mwanace jwa Pedasuli ni juŵalongolelaga lukosyo lwa Manase.

²⁴ Abidani mwanace jwa Gidiyoni ni juŵalongolelaga lukosyo lwa Benjamini.

²⁵ Pakumalicisya, ŵele ŵiŵakuyaga mbendela ja likuga liŵalilongolelaga ŵa lukosyo lwa Dani, ni ŵiŵaliji mpela ŵakulondela kunyuma kwa makuga gosope gene, nombe nawo ŵawutandaga ulendo mpela mwa makuga gawo, nipo Ahiyesa mwanace jwa Amishadayi ni juŵaliji mlongola jwawo.

²⁶ Pagiyele mwanace jwa Okilani ni juŵaliji jwakulongolela jwa lukosyo lwa Asha,

²⁷ nipo Ahila mwanace jwa Enani ni juŵalongolelaga lukosyo lwa Nafutali.

²⁸ Awu ni mndandanda wa wende wa Aisalaeli, mwa makuga gawo, piŵapaswile masakasa ni kwawulaga pa ulendo.

²⁹ Mose ŵaŵecete kwa Hobabu mlambagwawo mwanace jwa Yetelo m'Midiyani, kuti, “Uwe tusigele panandi kuwutanda ulendo wakwawula ku malo giŵatusalile AMBUJE kuti tacigapeleka kwa uwe. Jwalakwe ŵaŵisile cilanga* kuti tacapa Aisalaeli yindu yambone, myoyo kwende tulonganeje, nipo tucigaŵana ni m'mwejo yindu yamboneyo.”

³⁰ Hobabu ŵajanjile kuti, “Iyayi, une nguwujila kucilambo ca kumangwetu.”

³¹ Mose ŵamdandawulile kuti, “Conde mkatuleka uwe. M'mwejo mkumanyilila kwa mpaka uwe tutaŵe masakasa getu mcipululu muno nipo m'mwejo mkukomboleka kuŵa mlongola jwetu.

³² Naga akwika pamo ni uwe, tucigaŵana ni m'mwejo upile wosope wene utapelece AMBUJE kwa uwe.”

Ŵandu akunyakuka pa ulendo

³³ Ŵandu piŵatyosile pa Litumbi lya Sinayi, litumbi lyeswela, ŵajesile kwa masiku gatatu. Ndaŵi syosope Libokosi lya Cilanga lyalongolelaga ŵanduwo kuti akagapate malo gakuti ŵandu ŵala akapumulepo.

³⁴ Piŵatyokaga pa masakasa galigosego, liwunde lya AMBUJE lyaliji penani pawo musi.

³⁵ Naga Libokosi lya Cilanga litandite kwenda, Mose ŵaŵecetaga kuti, “Ajimuce, AMBUJE, ŵapwilinganye amagongo ŵawo nipo ŵajogoye kuti atile ŵele ŵakwaŵenga wawojo!”

³⁶ Nipo naga liwunde lijimi, jwalakwe ŵatiji kuti, “Awujile, AMBUJE, kwa Aisalaeli ŵangaŵalanjikaŵa.”