Numeli 1 - Chiyawo Bible

Kuŵalanjidwa kwandanda kwa Aisalaeli

¹ Lisiku lyandanda lya mwesi waŵili mcaka caŵili Aisalaeli ali atyosile mcilambo ca Iguputo, AMBUJE* ŵaŵecete kwa Mose* juŵaliji mu citenti cakusimanilana mcipululu ca Sinayi. Ŵatite kuti,

² “M'mwejo ni Aloni* mwaŵalanje ŵandu ŵa Aisalaeli mwa maŵele gawo ni maŵasa gawo. Mlembe mena ga acalume wosope

³ ŵakwanile yaka 20 kapena kupunda pelepo, ŵali ŵakuŵajilwa kuputa ngondo.

⁴ Mwusye ku mtundu uliwose mwenye jumo jwa liŵasalyo kuti amkamucisye.”

^5-16 Aŵa ni acalume, ŵakulongolela ngosyo syawo, ŵiŵasagwile kutyocela m'maŵasa kuti akamucisye pa masengoga: Lukosyo Mwenye Lubeni Elisuli mwanace jwa Sheduwele Simiyoni Shelumiyele mwanace jwa Sulishadayi Yuda Nashoni mwanace jwa Aminadabu Isakala Netanele mwanace jwa Suwala Sebuloni Eliyabu mwanace jwa Heloni Efelemu Elishama mwanace jwa Amihudi Manase Gamaliele mwanace jwa Pedasuli Benjamini Abidani mwanace jwa Gidiyoni Dani Ahiyesa mwanace jwa Amishadayi Asha Pagiyele mwanace jwa Okilani Gadi Eliyasafu mwanace jwa Deuweli Nafutali Ahila mwanace jwa Enani

Lukosyo Mwenye

¹⁷ Ni cikamucisyo ca acalumeŵa 12, Mose ni Aloni

¹⁸ ŵaliŵilasile likuga lya ŵandu lyosope lyene pa lisiku lyandanda lya mwesi waŵili nipo ŵalembile ŵandu wosope ŵene mena gawo pakukuya maŵasa ni maŵele gawo. Mena ga acalume wosope ŵa yaka 20 kapena kupunda ŵagalembile ni kugaŵalanga,

¹⁹ mpela muŵalamulile AMBUJE. Mose ŵalembile ŵanduwo mcipululu ca Sinayi.

^20-46 Acalume ŵa yaka 20 kapena kupunda ŵiŵaliji ŵakuŵajilwa pa masengo gakuputa ngondo ŵalembile mena malinga ni maŵele ni maŵasa gawo, kutandila lukosyo lwa Lubeni, mwanace jwandanda jwa Yakobo.* Wosope ŵene winji wakwe waliji awu: Lukosyo Ciŵalanjilo Lubeni 46,500 Simiyoni 59,300 Gadi 45,650 Yuda 74,600 Isakala 54,400 Sebuloni 57,400 Efelemu 40,500 Manase 32,200 Benjamini 35,400 Dani 62,700 Asha 41,500 Nafutali 53,400 Ciŵalanjilo cosope caliji: 603,550

Lukosyo Ciŵalanjilo

⁴⁷ Nambo Alefi nganalembedwa mena gawo mpela ŵandu ŵane,

⁴⁸ ligongo AMBUJE ŵamsalile Mose kuti,

⁴⁹ “Pimkwaŵalanga acalume ŵakuŵajilwa kuputa ngondo, mkasimwapwatikanya ni lukosyo lwa Alefi.

⁵⁰ M'malo mwakwe, Alefi akole udindo ŵakulolela citenti cangu jakusimanilana ni yida yakwe yosope. Tacijinyakula ni yida yakwe, kutumicila mwelemo, ni kutaŵa masakasa gawo mwakujisyungulila.

⁵¹ Pakusama pa masakasa genu, Alefi tacicicuŵa citentico ni kuja kucitaŵa soni ku malo gasambano gamasakasa galigose. Jwalijose jwakwisa ciŵandika ni citentijo taciwulajidwa.

⁵² Aisalaeli ŵane wosope tacitaŵa masakasa gawo, likuga ni likuga, mundu jwalijose ni likuga lyakwe soni tacitaŵa pakuŵandikana ni mbendela jakwe.

⁵³ Nambo Alefi tacitaŵa masakasa kusyungulila citentico kuti acilondeleje, kuti pakapagwa jwalijose jwakuciŵandicila ni kundendesya ukali kuti nalijonanje likuga lya Aisalaeli.”

⁵⁴ Myoyo ŵandu ŵa ku Isalaeli ŵatesile yosope yene yiŵalamwile AMBUJE kwa Mose.