Nehemiya 9 - Chiyawo Bible

Ŵandu akwiticisya ulemwa wawo

¹ Pa lisiku lya 24 lya mwesi uwowo, ŵandu ŵa ku Isalaeli ŵasongene malo gamo kuti alijime yakulya, nipo ŵawete yisaka ni kulitaga mataka mu mtwe mwawo kulosya canasa ligongo lya ulemwa wawo.

² Jemanjajo nganawanganicilana ni ŵandu ŵa mitundu jine,* pa ndaŵi jiŵajimi ni kwiticisya ulemwa wawo, nambo soni pa ulemwa uŵatesile acinangolo ŵawo.

³ Ŵanduwo ŵajimi papopo ni kupikanila maloŵe ga m'buku ja Malamusi ga AMBUJE Mlungu jwawo kwa ma awala gatatu, kaneko kwa ma awala gane soni gatatu, ŵanduwo ŵajiticisyaga ulemwa wawo ni kwalambila AMBUJE Mlungu.

⁴ Japali Sanja ja Alefi, nipo pa sanjapo pajimi Yeswa, Bani, Kadimiyele, Shebaniya, Buni, Shelebiya, Bani ni Kenani. Jemanjaji ŵapopelaga mwakwesya maloŵe kwa AMBUJE Mlungu jwawo.

⁵ Alefi ŵakuyicisyaŵa mpela Yeswa, Kadimiyele, Bani, Hashabineya, Shelebiya, Hodiya, Shebaniya, ni Petahiya ŵasalile ŵanduwo kuti: “Mjime kuti mwalumbe AMBUJE Mlungu jwenu; mwalumbeje ŵalakwejo mpaka kalakala! Jwalijose alilumbe lina lyakwe lya ucimbicimbi, lyele ŵandu ngaŵa mkulikombola kulicimbicisya ni kulilumba mwakwanila.”

Lipopelo lyakwiticisya kulemwa

⁶ Ŵandu ŵa ku Isalaeli ŵapopesile lipopelo ali: “Wawo jikape ali AMBUJE; wawo ŵapanganyisye kwinani ni ndondwa, wawo ŵapanganyisye cilambo capasi, nyasa soni ŵayipele umi yosope yakutama pa cilambopo. Yosope yakwinani yikusiyatindiŵalila ni kwalumba ŵalakwe.

⁷ AMBUJE, wawo ni ŵaŵamsagwile Abulamu nipo ŵalakwe ŵalongolele ŵelewo kwakoposya kutyocela ku Ulu ku Babiloniya; wawo ŵasindile lina lya ŵelewo kuŵa Abulahamu.*

⁸ Wawo ŵaweni kuti ŵelewo ŵaliji ŵakulupicika, nipo ŵatesile nawo cilanga* cakuti wawo taciyipa yisukulu yakwe cilambo cakutama Akenani, cilambo ca Ahiti, ca Aamoli, ca Apelesi, ca Ayebusi ni cilambo ca Agiligashi. Wawo atesile mwa cilanga cawo, pakuti wawojo ali ŵaswela.

⁹ “Wawo ŵakuweni kulaga kwa acinangolo ŵetu ku cilambo ca Iguputo; soni ŵakupikene kulila kwawo pa Nyasa Jecejewu.

¹⁰ Wawo ŵatesile yakumasya lunda ni yakusimonjesya pameso pa Mwenye jwa ku Iguputo, pameso pa ŵamasengo ŵakwe ni ŵandu ŵa mcilambomo, pakutipo wawo ŵayimanyi muŵalagacisye jemanjajo acinangolo ŵetu. Ali ni ligongo lyakwe mbili ja wawo jajenele posepose mpela mujiŵelele masiku agano.

¹¹ Wawo ŵagaŵenye nyasa katikati, ŵandu ŵawo ali mkulola nipo ŵanduwo ŵajombwece pejumu katikati ja nyasajo. Wawo ŵatendekasisye kuti amagongowo amilwe m'mesi, mpela mulikusatendela liganga m'mesi.

¹² Ndaŵi ja musi wawo ŵalongolelaga Aisalaeli ni liwunde, nipo ndaŵi ja cilo ŵalongolelaga jemanjajo pakwamulicila ni moto

¹³ Wawo ŵatulwice Mwitumbi lya Sinayi kutyocela kwinani ŵaŵecete ni ŵandu ŵawo ni kwapa malamusi ni majiganyo gakupikanika cenene.

¹⁴ Wawo ŵajiganyisye jemanjajo kuti alicimbicisyeje lisiku lyakupumula* ligongo lili lyeswela, soni ŵapele jemanjajo malamusi gawo kupitila mwa Mose* jwakutumicila jwawo.

¹⁵ “Pandaŵi jiŵaliji ni sala, wawo ŵapele jemanjajo mkate ŵakutyocela kwinani kuti alye, soni ŵapele jemanjajo mesi gakutyocela mu lwala pa ndaŵi jijakwete njota. Wawo ŵalamwile soni jemanjajo kuti akasumule cilambo ciŵatesile cilanga kuti tiŵape jemanjajo.

¹⁶ Nambo acinangolo ŵetuwo ŵalikwesisye ni kumusya mitima jawo nipo ŵakanile kugapikanila malamusi ga wawo.

¹⁷ Jemanjajo nganapikanila; ŵaliŵalile yosope yiŵatesile ŵalakwe; soni ŵaliŵalile yakusimonjesya yiŵatesile wawo pasikati pa jemanjajo. Ŵajumwisye mitima jawo nipo ŵalisagulile acimsyene mlongola kuti ŵalongolele jemanjajo pa kuwujila soni ku Iguputo ku cilambo ca ukapolo cila. Nambo wawo ali Mlungu jwakululuka; jwambone mtima, jwa cinonyelo, soni jwakulisinga mtima. Cinonyelo ca wawo cili cangamala, pakuti wawo nganiŵaleka jikape jemanjajo.

¹⁸ Atamose kuti jemanjajo ŵalipanganyicisye acimsyene kang'ombe kakusepa ni kutiga kuti, jwelejo ni Mlungu jwetu juŵatukopwesye uwe kutyocela ku cilambo ca Iguputo! Jemanjajo aŵele ali mkwanyosya ŵalakwe!

¹⁹ Nambo ŵalakwe nganiŵaleka jemanjajo jikape mcipululu mula, pakuti canasa cawo cili cekulungwa. Wawo ŵapitilisye kwalongolela jemanjajo ni liwunde ndaŵi ja musi soni ndaŵi ja cilo wawo ŵalongolelaga ni moto.

²⁰ Ligongo lya umbone mtima wa wawo, wawo ŵasalile jemanjajo yakwenela kutenda; soni wawo ŵapele jemanjajo cakulya ca mana ni kwapa soni mesi kuti amweje.

²¹ Kwa yaka yakwana makumi mcece 40 wawo ŵasamalile mu cipululu mula, soni pa ndaŵi jesopejo nganasoŵa cilicose, yakuwala yawo nganiyimala, soni sajo syawo nganisiyimba.

²² “Wawo ŵapele jemanjajo macili gakuti ayipunde yilambo yine ni mitundu jine ja ŵandu, ŵasumwile soni cilambo ca Mwenye Sihoni jwa ku Heshiboni ni cilambo ca Mwenye Ogi jwa ku Bashani.

²³ Wawo ŵapele jemanjajo yisukulu yejinji mpela ndondwa kwinani, ni kwakunda jemanjajo kuti ajinjile mcilambo cele wawo ŵalangene ni acinangolo ŵa jemanjajo kuti tacipocela kuti ciŵe cawocawope.

²⁴ Myoyo jemanjajo ŵajinjile ni kutamilicika mcilambomo. Wawo ŵapundile ŵandu ŵaŵatamaga kweleko. Wawo ŵapele ŵanduwo macili gakwatenda mpela muŵasacilaga jemanjajo ni ŵandu ni ayimwene ŵa ku Kenani.

²⁵ Jemanjajo ŵasumwile misinda jakulimbangana, migunda ja cajila, nyumba syegumbale ni katundu jwambone, yisima yesole kala, yitela ya mawuta ga olifi,* yitela ya yisogosi, ni migunda ja mipeleya. Jemanjajo ŵalyaga ni kwikuta nipo ŵajimbele, ŵasangalele ni yindu yosope yambone yiŵapele wawo jemanjajo.

²⁶ “Nambo jemanjajo ŵajimucile soni nganiŵapikanila wawo, ŵawuleje ŵakulocesya ŵa wawo, ŵiŵakalamusyaga jemanjajo ni kwasalila kuti awujile soni kwa wawo. Ŵatesile yindu yakusakala ni kulinyosya lina lya wawo.

²⁷ Ali ni ligongo lyakwe ŵalakwe ŵapelece jemanjajo myala mwa amagongo ŵawo ni kuti alamulilidwe ni jemanjajo. Pandaŵi jiŵaliji pa yipwetesi ŵalolaga kwa wawo kuti ŵakamucisye jemanjajo, nipo wawo ŵajangaga jemanjajo kwinani kwali wawoko. Ligongo lya canasa ca wawo cekulungwa wawo ŵatumicisye jemanjajo acimlongola ŵiŵakulupwisye jemanjajo kwa amagongo ŵawo.

²⁸ Pandaŵi ja mtendele, ŵapitilisye kutenda ulemwa, nambo wawo ŵakundile amagongo ŵa jemanjajo kuti ŵapunde soni. Nambo pa ndaŵi jiŵayikaga kwa wawo ni kupesya ulemwa wawo ni kwaŵenda wawo kuti ŵakulupusye jemanjajo, wawo ŵapikanaga, nipo ndaŵi ni ndaŵi ŵawo aŵele ali mkwakulupusya jemanjajo ligongo lya canasa ca wawo.

²⁹ Wawo ŵakalamwisye jemanjajo kuti atande soni kugakuya malamusi ga wawo, nambo jemanjajo ŵalikwesyaga ni kuleka kugakuya malamusi ga wawo gele gali gakupeleka umi kwa mundu jwakugakuyajo. Ŵajumwisye mitima jawo ni kupitilisya kutenda ulemwa.

³⁰ Wawo ŵapimilile kwa yaka yejinji mwakuti ŵakalamwisye jemanjajo kupitila mwa ŵakulocesya ŵawo, nambo jemanjajo nganapikanila, myoyo wawo ŵakundile jemanjajo kuti apundidwe ni yilambo yine.

³¹ Nambo ligongo lya cinonyelo ca wawo, wawo nganiŵaleka jemanjajo jikape kapena kwajonanga. Wawo ali Mlungu jwambone mtima ni jwa canasa!

³² “AMBUJE Mlungu, wawo ali ŵakulungwa, ŵakogoya ni ŵamacili! Wawo akusasunga cilanga cawo mwakulupicika. Conde akumbucile yisawusyo yosope ya ŵandu ŵawo, acayimwene, acimlongola, ŵakutaga mbopesi, ŵakulocesya, acinangolo ŵetu, ni ŵandu wosope, kutyocela ndaŵi ja acayimwene ŵa ku Asiliya mpaka sambano jino.

³³ Nambo wawo aŵele ŵakulungama pakutupa uwe cilango; atesile nowe mwakulupicika, atamose kuti uweji twatesile ulemwa.

³⁴ Ayimwene ŵetu, acimlongola ŵetu, ŵakutaga mbopesi ŵetu ni acinangolo ŵetu nganasunga Malamusi ga wawo. Nganagapikanila malamusi ni kusamalila maloŵe gakwakalamusya jemanjajo.

³⁵ Wawo ŵapele upile jemanjajo pakwapa cilambo cekulungwa ca cajila, nambo ŵakanile kwatumicila wawo kapena kuleka ulemwa.

³⁶ Sambano uwe tuli acikapolo lelo jino, mcilambo aci ciŵapele acinangolo ŵetu kuti alyeje mbeju syambone syakulimidwa mwelemo.

³⁷ Mbeju syele sikusasogola mcilamboco sikusajawula kwa mwenye juŵamŵisile wawo kuti atulamulileje ligongo lya ulemwa wetu. Kulaga kwetu kuli kwekulungwa ligongo ayimwenewo akusatenda cilicose cakusaka kwa uwe ni ku yilangwa yetu.”

Ŵandu akutenda Cilanga ca kulemba

³⁸ Ŵandu ŵala ŵatesile cilanga ca kulemba nipo acakulungwakulungwa ŵetu, Alefi ni ŵakutaga mbopesi ŵadindile cidindo ca cilangaco.