Nehemiya 8 - Chiyawo Bible

Esala akwaŵalanjila ŵandu Malamusi

¹ Lisiku lyandanda lya mwesi wa msano ni jaŵili, ŵandu ŵa ku Isalaeli ŵaliji ali atamilicice m'misi jawo. Ŵandu wosope ŵasongene malo gamo ku Yelusalemu mkati mwa luŵala lulwaliji pasogolo pa Cipata ca Mesi. Ŵanduwo ŵamŵendile Esala, juŵaliji jwakutaga mbopesi soni mwalimu jwa Malamusi kuti ayice najo buku ja Malamusi giŵapele AMBUJE Aisalaeliwo kupitila mwa Mose.*

² Myoyo Esala ŵayice najo buku ja Malamusijo ku msongano wa acalume, acakongwe ni ŵanace ŵiŵapakombolaga kupikanicisya cenene yindu.

³ Kutyocela kundaŵi mpaka musi, Esala ŵaŵalanjile ŵanduwo buku ja Malamusijo nipo ŵanduwo ŵatejele mapikanilo gawo kuti apikanicisye.

⁴ Pandaŵi jeleji Esala ŵaliji ali ajimi pa sanja ja yitela, jiŵataŵile ŵandu ligongo lya msonganowo. Acalume ŵakuyicisyaŵa ŵaliji ali aji ku mkono wakwe wamlyo: Matitiya, Shema, Anaiya, Uliya, Hilikiya ni Maaseya, nipo Pedaya, Mishaele, Malikiya, Hashumu, Hashibadana, Sakaliya ni Meshulamu ŵajimi ku mkono wakwe wamciji.

⁵ Mlembela Esala piŵajimi pa sanjajo, ŵawunukwile buku ŵandu wosope ali mkulola. Ndaŵi jijojo ŵandu ŵala ŵajimi ni kumlolecesyaga.

⁶ Kaneko Esala ŵatite kuti, “Acimbicikwe AMBUJE* Mlungu jwamkulungwa!” Ŵandu wosope ŵanyakwile makono gawo mwinani ni ŵajanjile kuti, “Yiŵe myoyo! Yiŵe myoyo!” Kaneko ŵandu ŵala ŵatindiŵele ni kugundisya ngope syawo pasi ni kwalambila AMBUJE.

⁷ Yili yitendekwe yeleyi ŵandu ŵala ŵajinamukwice nipo ŵajimi m'malo mwawo. Alefi ŵapitaga mkatikati mwa ŵanduwo ni kwakamusya ŵanduwo kuti agapikanicisye cenene Malamusigo. Alefiwo ŵaliji Yeswa, Bani, Shelebiya, Yamini, Akubu, Shabetayi, Hodiya, Maaseya, Kelita, Asaliya, Yosabadi, Hanani, ni Pelaya.

⁸ Alefiwo ŵaŵalasile buku ja Malamusi ga Mlungu mwakupikanika cenene, nipo ŵagagopolele cenene malamusigo kuti ŵandu apikanicisye cenene yigakugopolela gakwe.

⁹ Ŵandu piŵapikene Malamusi, ŵatandite kulila. Myoyo Nehemiya, ŵiŵaliji bwanamkubwa, jwakutaga mbopesi Esala nambo soni juŵaliji mwalimu jwa Malamusi ni Alefi wosope ŵiŵajiganyaga ŵandu ŵatite kuti, “Lelo lili lisiku lyeswela lya AMBUJE Mlungu jwenu. Mkakola canasa nambo soni mkalila.”

¹⁰ Kaneko Nehemiya ŵasalile ŵandu ŵala kuti, “Jawulagani kumangwenu mkalye yakulya yambone ni kumwa yambone yakulyolyopela. Mkagaŵile soni acimjenu ŵikanakola cilicose. Lelo lili lisiku lyeswela lya AMBUJE, myoyo mkaŵa ŵa canasa, pakuti lukondwa lwakusampaga AMBUJE tilucimlimbisya.”

¹¹ Myoyo Alefi ŵajesile mkatikati mwa ŵanduwo ni kwalimbisya mitima ŵanduwo pakwasalila kuti jemanjajo akaŵa ŵa canasa kapena kulila pa lisiku lyeswelalo.

¹² Ŵanduwo piŵapite kumangwawo, ŵasangalele pa kulya ni kumwa ni kugaŵana soni yakulya yawo ni acimjawo ŵiŵaliji ŵakusoŵa, ligongo lyakuti ŵapikanicisye cenene maloŵe ga m'Malamusi gigaŵalanjidwe kwa jemanjajo.

Cindimba ca masakasa

¹³ Kundaŵi kwakwe acimlongola ŵa maŵasa, ŵakutaga mbopesi ni Alefi, ŵasongene kwa Esala kuti alijiganye Malamusi.

¹⁴ Ŵasimene kuti m'buku ja malamusijo mulembedwe kuti Aisalaeli atameje m'masakasa ndaŵi ja cindimba ca masakasa.*

¹⁵ Ŵalijiganyisye soni kuti jemanjajo ajawuleje ku matumbi kukujigala nyambi sya yitela yayikwete masamba gejinji mpela ya mkungusa, nyambi sya citela ca mawuta ga olifi* ni yitela ya migwalangwa kuti ataŵileje masakasa mpela muyalembedwele m'buku ja Malamusi.

¹⁶ Myoyo ŵajile kujigala nyambisyo nipo jwalijose ŵalitaŵile msyene cisakasa penani pa msakasa wa nyumba jakwe, pa luŵala lwakwe, pa luŵala lwa ku Nyumba ja AMBUJE, pa luŵala lwa pa Cipata ca Mesi ni pa luŵala lwa Cipata ca Efelemu.

¹⁷ Ŵandu wosope ŵaŵawusile kutyocela ku ukapolo ŵataŵile masakasa gawo nipo ŵatamaga mwelemo. Kutandilila ndaŵi ja Yeswa mwanace jwa Nuni, mpaka lisiku lyelelo, Aisalaeli ŵaliji mkanatendeje yeleyo mwakuti kwaliji kwana kusangalalila cindimba ca masakasa.

¹⁸ Lisiku lililyose, kutyocela lisiku lyandanda mpaka lisiku lyakumalisya, Esala ŵaŵalangaga buku ja Malamusi ga Mlungu. Ŵandu ŵasangalalile cindimba ca masakasa kwa masiku msano ni gaŵili, nipo pa masiku msano ni gatatu patendekwe msyungu wakuwugalila msonganowo, pakukuya yiyalembedwe m'buku ja Malamusi jila.