Nehemiya 6 - Chiyawo Bible

Amagongo ŵamswambile Nehemiya

¹ Sanibalati, Tobiya, Geshemu ni amagongo ŵetu ŵane ŵapikene kuti une masile kutaŵa lipupa, soni kuti pangali malo gegumuce gasigele, atamose kuti twaliji mkanitutaŵilile matanga pa yipatayo.

² Myoyo Sanibalati ni Geshemu ŵatumisye utenga kwa une wakuti, une njawule ngawonegane nawo jemanjajo pa musi wine m'Ciŵata ca Ono. Nambo une namanyilile kuti welewo waliji unami, jemanjajo ŵasakaga kuswamba une.

³ Une natumisye ŵa mitenga kuti ajawule akasalile jemanjajo kuti, “Une ndili pa masengo gekulungwa akuno, soni ngayikomboleka kuti ndyoce akuno ni yice kweleko. Ngangusaka kuti masengo gajime, ni yice kweleko kukuwonegana ni jemanja.”

⁴ Jemanjajo ŵatumisye kwa une utenga uwowo kakwana kacece, nambo ndaŵi jilijose najangaga mwakulandana.

⁵ Pambesi pakwe Sanibalati ŵamtumile jwamasengo jwakwe kwa une ni cikalata cangamata.

⁶ Mu cikalatamo ŵalembile kuti: “Sikati ja mitundu jine ja ŵanduŵa, pakupikanika ngani, soni Geshemu akuŵecetaga kuti, ŵalakwe pamo ni Ayuda akusaka kujijimucila boma. Ali ni ligongo lyakwe akutaŵa lipupa. Wawo akusaka kuti taŵe mwenye jwawo mpela muyikupikanicilamu.

⁷ Wawo aŵisile soni ŵakulocesya ku Yelusalemu kuti ajenesyeje kuti wawo ni mwenye jwa ku Yuda. Mwenye jwa ku Pelesiya tayipikane yeleyi, sambano kwende tutame pampepe kuti tuŵecetane nganiji.”

⁸ Kaneko natumisye maloŵe kwa Sanibalati gakwajanga kuti, “Yosope yimkuŵecetayi yili ya unami, yeleyi mgambile kuyiganisya mwasyene.”

⁹ Jemanjajo ŵagambaga kusaka kutujogoya uwe kuti tulece masengo. Nambo une namŵendile Mlungu kuti ambe macili!

¹⁰ Pandaŵi jelejo najile kukunguluka kwa Shemaya mwanace jwa Delaya, mwanace jwa Mehetabele ŵele pa ndaŵiji nganakopokaga m'nyumba mwakwe, ni ŵasalile une kuti, “Kwende tujawule tukajuŵe m'Nyumba ja AMBUJE nipo tukawugale matanga gakwe pakuti jemanjajo akwisa kukumwulaga m'mwejo, cilo cino.”

¹¹ Nambo une najanjile kuti, “Ana mundu mpela une mpaka njawule kukuŵa kuti ngulupusye umi wangu? Unetu ngaŵa mkutenda yeleyo.”

¹² Kaneko namanyilile kuti Mlungu nganamtuma Shemaya kuti aŵecete yeleyi, nambo kuti ŵelewo akumbecetela une ligongo lyakuti Tobiya ni Sanibalati ŵapele ŵelewo mbiya

¹³ ni cakulinga cakuti anjogoye une ni ndende ulemwa, kuti jemanjajo asakacisye une mbili jangu ni kunyosya une.

¹⁴ Napopesile kuti, “AMBUJE Mlungu, akumbucile yatesile Tobiya ni Sanibalati, nipo ŵape jemanjajo cilango. Akumbucile soni yiŵatendaga jwakulocesya* jwamkongwe Nowadiya ni ŵakulocesya ŵane wosope ŵiŵasakaga kunjogoya une.”

Kumalisya kwa masengo

¹⁵ Pa lisiku lya 25 lya mwesi wa Eluli,* lipupa lila ŵalimalisisye kutaŵa nipo lyajigele masiku 52.

¹⁶ Amagongo ŵetu wosope ŵakuŵandikana nawo piŵapikene yeleyi, ŵatesile woga ni soni syakwe ligongo ŵamanyilile kuti masengogo gatendekwe ni cikamucisyo ca Mlungu.

¹⁷ Ndaŵi josope jeneji acimlongola ŵa ku Yuda ŵaŵele ali mkulembelana yikalata ni Tobiya.

¹⁸ Ŵandu ŵajinji ŵa ku Yuda ŵapikangananaga ni Tobiya pa ligongo lyakuti ŵelewo ŵaliji mkamwini jwa Shekaniya mwanace jwa Ala. Ligongo line lyaliji lyakuti Yehohanani mwanace jwa Tobiya ŵamlombile mwanace jwamkongwe jwa Meshulamu mwanace jwa Belekiya.

¹⁹ Ŵandu ŵaŵecetaga ya yitendo yambone ya Tobiya une ndili papopo, soni ŵamjuwulilaga yosope yinaŵecetega une. Myoyo Tobiya ŵapitilisye kutumisya yikalata yakunjogoya une.