Nehemiya 4 - Chiyawo Bible

Amagongo ŵa Nehemiya pa masengo gakwe

¹ Sanibalati piŵapikene kuti tukutaŵa soni lipupa, ŵatumbile nipo ŵatandite kwanyosya Ayuda.

² Ŵaŵecete pameso pa acalongo acimjakwe ni pameso pa likuga lya asilikali ŵa ngondo ŵa ku Samaliya ni kwawusya kuti, “Ana Ayuda ŵangali mateŵa akutenda cici? Ana asimicisye m'mitima mwawo kuti akusaka kutaŵa soni msindawu? Ana jemanjaji akuganisya kuti tataŵe soni lipupa ni kupeleka mbopesi pa lisiku limpepe? Ana maganga gitataŵilego talokotanyeje geŵawuce ni motoga?”

³ Pandaŵi jelejo Tobiya jwa ku Amoni ŵajimi pambali pa Sanibalati ni ŵatite kuti, “Alole lipupa lyakutaŵalyo, atamose likule kuti likwele pelepo, lipupalyo mpaka ligwe!”

⁴ Nambo une napopesile kuti, “AMBUJE* Mlungu jwetu, apikane mwakutunyocesya uwe. Apikane mapopelo getu, soni ŵakunde kuti maloŵe gakunyosyago gawujilile acimsyene. Ŵalece kuti asumulidwe katundu jwawo josope soni ajigalidwe kwawula ku ukapolo ku cilambo ca cilendo.

⁵ Akakululucila ulemwa wawo, soni akaliŵalila yangalumbana yatesile jemanjajo pameso pa wawo pakuti atunyosisye uwe ŵatukutaŵa nyumba pameso pa wawo.”

⁶ Myoyo twamasile kutaŵa lipupa lyosope mpaka hafu ja msingu wakwe ligongo lyakuti ŵandu ŵakamwile masengogo mwakulipeleka.

⁷ Nambo Sanibalati, Tobiya, Aluya, Aamoni ni Aashidodi piŵapikene kuti masengo gakutaŵa soni lipupa lya msinda wa Yelusalemu gakwendelecela kwawula msogolo, nambo soni kuti malo gegumucegumuce gala agalinganyisye, jemanjajo ŵatumbile mnope,

⁸ mwakuti ŵatesile mtemela wakuti atandisye njojo ni kuputa ngondo ni ŵandu ŵa mu msinda wa Yelusalemu.

⁹ Nambo uwe twapopesile kwa Mlungu jwetu, soni twaŵisile acilonda ŵakuti atucinjilicisyeje uwe kwa amagongo ŵetuwo cilo ni musi.

¹⁰ Pandaŵi jeleji Ayuda ŵakwete nyimbo nipo ŵajijimbaga acitiji kuti: “Macili ga ŵakunyakula katundu gamasile; katundu jwakuti anyakulidwe ali jwamjinji. Ana citutaŵe camtuli lelo jino?”

¹¹ Amagongo ŵetu ŵaŵecetaga soni kuti uwe ngasitwawona jemanjajo kapena kumanyilila kandu mpaka jemanjajo ali ayice pasikati petu kukutuwulaga uwe ni kugalekasya masengo getu.

¹² Nambo kaŵilikaŵili Ayuda ŵiŵatamaga ciŵandika ni amagongo ŵetuwo ŵayikaga kukutukalamusya uwe ya mtemela uŵatupanganyicisye uwe amagongo ŵetuwo kuti jemanjajo taciyika kutyocela kulikose kwakusatama.

¹³ Myoyo natumisye ŵandu kuti akalondeleje lipupa palipose pilyaliji mkinilimale kutaŵidwa mbali jineji ali anyakwile mawupanga, mapanga ni mawukunje.

¹⁴ Nambo pinaweni kuti ŵanduwo akudandawula, nasalile jemanjajo pamo ni acimlongola ni acakulungwa ŵakulamulila kuti, “Mkasimwajogopa amagongo ŵetuŵa. Mkumbucile kuti AMBUJE ali ŵamacili nambo soni ŵakogoya, sambano mwaputile ngondo acalongo acimjenu, ŵanace ŵenu, aciŵamkwenu, ni nyumba syenu!”

¹⁵ Amagongo ŵetu piŵapikene kuti uwe tucimanyi cakulinga cawo, ŵamanyilile kuti Mlungu ŵalepelesye jemanjajo yiŵalangene kuti atende. Kaneko uwe wosope twawujile ku masengo getu gakutaŵa soni lipupa.

¹⁶ Kutyocela pa lisiku lyelelo mpaka msogolo mwakwe, hafu ja ŵandu ŵamasengo ŵangu ŵakamulaga masengo nipo hafu jine ja ŵanduwo ŵalondelaga ali awete yakuwala ya cisyano, mbali jineji ali anyakwile mapanga, yakucijila ni mawukunje, nipo acimlongola ŵa ku Yuda ŵalimbisye mitima ŵandu ŵiŵataŵaga lipupalyo.

¹⁷ Ŵandu ŵiŵanyakulaga yindu yakutaŵila ŵala, ŵakamulaga masengo ni ligasa limo nipo mbali jineji ŵaliji ali anyakwile cida cakuputila ngondo,

¹⁸ nipo jwalijose juŵakamulaga masengo gakutaŵa soni lipupalyo ŵaliji ali ataŵilile upanga mciwunu mwakwe pa ndaŵi jiŵataŵagajo. Mundu juŵagombaga lipenga ŵatamaga ni une ndaŵi syosope.

¹⁹ Nasalile ŵandu pamo ni acimlongola ni acakulungwakulungwa kuti, “Masengoga gali gekulungwa, mwakuti uweji tutalikangene jwine ni mjakwe.

²⁰ Naga mkupikana kusona kwa lipenga, myiceje mwacitema kukusongana kutuli uwe kuno. Mlungu jwetu tacituputila uwe ngondo.”

²¹ Myoyo twakamwile masengo, nipo hafu jine ja ŵanduwo janyakwile mapanga kutandilila kumasikusiku mpaka ligulo.

²² Pandaŵi jeleji nasalile soni acikapitawo kuti jemanjajo pamo ni ŵamasengo ŵawo agone mu Yelusalemu, kuti atulondeleje uwe ndaŵi ja cilo. Myoyo ŵalondelaga msindawo ndaŵi ja cilo nipo ndaŵi ja musi ŵakamulaga masengo.

²³ Une, pamo ni acimjangu, ŵamasengo ŵangu, atamose ŵandu ŵakunjinjilicisya une nganituwulaga yakuwala yetu pakugona cilo; nipo mundu jwalijose jwasungaga cida cakwe ca ngondo pambali pakwe.