Nehemiya 3 - Chiyawo Bible

Akutaŵa soni mapupa ga msinda wa Yelusalemu

¹ Amu ni muŵataŵile lipupa lya msinda wa Yelusalemu. Eliyashibu jwamkulungwa jwa ŵakutaga mbopesi* pamo ni ŵakutaga mbopesi acimjakwe ŵatandite kukamula masengo nipo ŵataŵile Cipata ca Ngondolo, cele ciŵacipelece kwa AMBUJE* nipo kaneko ŵaŵisile matanga gakwe. Lipupa liŵalipelece kwa AMBUJE lyajile kwika ku Sanja ja Licila, mpaka ku Sanja ja Hananele.

² Ŵandu ŵa ku Yeliko ŵataŵile mbali jine ja lipupalyo, nipo Sakuli mwanace jwa Imuli ŵataŵile mbali jine ja lipupalyo mwakuŵandikana ni mbali jijakwejo.

³ Ŵandu ŵa mwiŵasa lya Hasena ŵataŵile Cipata ca Somba. Jemanjajo ŵaŵisile migomba, ni kuŵicilila matanga ni yakuwugalila yakwe, soni ŵaŵisile mipiciko.

⁴ Melemoti mwanace jwa Uliya soni cisukulu ca Hakosi, ŵataŵile mbali jine ja lipupalyo. Meshulamu mwanace jwa Belekiya, soni juŵaliji cisukulu ca Meshesabelo, ŵataŵile mbali jine ja lipupalyo nipo Sadoki mwanace jwa Baana nombe nawo ŵataŵile mbali jine ja lipupalyo.

⁵ Ŵandu ŵa ku Tekowa ŵataŵile mbali jine ja lipupalyo, nambo acimlongola ŵawo ŵakanile kukamula masengo giŵapegwile ni acakulungwakulungwa ŵawo.

⁶ Yoiyada mwanace jwa Paseya ni Meshulamu mwanace jwa Besodeya ŵalinganyisye Cipata Cakala. Ŵaŵisile migomba jakwe ni kuŵicilila matanga soni ŵaŵisile mipiciko jakwe.

⁷ Melatiya jwa ku Gibiyoni, Yadoni jwa ku Melonoti, ni ŵandu ŵa ku Gibiyoni ni ku Misipa ŵataŵile mbali jine ja lipupalyo mpaka ku nyumba ja bwanamkubwa jwa pesi kungapilo lyuŵa kwa Lusulo lwa Yufuleti.

⁸ Usiyele mwanace jwa Halaiya, jumo jwa amisili ŵakusyana golidi,* ŵataŵile mbali jine ja lipupalyo. Hananiya, jwakupanganya mawuta gakununjila ŵataŵile mbali jine ja lipupalyo, mpaka kuja kwika ku Lipupa Lyetambasukuce.

⁹ Lefayiya mwanace jwa Huli, juŵalamulilaga hafu ja mbali ja Yelusalemu ŵataŵile mbali jimo ja lipupalyo.

¹⁰ Yedaya mwanace jwa Halumafu ŵataŵile mbali jine ja lipupalyo, jijaliji ciŵandika ni nyumba jakwe. Kaneko Hatushi mwanace jwa Hashabineya ŵataŵile mbali jine ja lipupalyo.

¹¹ Malikiya mwanace jwa Halimu, kwisa soni Hashubu mwanace jwa Pahati Mowabu ŵataŵile mbali jimo ja lipupalyo pamo ni Sanja ja Ufuni.

¹² Shalumu mwanace jwa Haloheshi, juŵalamulilaga hafu jine ja dela ja Yelusalemu, ŵataŵile mbali jine ja lipupalyo mwakukamusyana ni ŵanace ŵakwe ŵacakongwe.

¹³ Hanuni pamo ni ŵandu ŵiŵatamaga mu msinda wa Sanowa ŵalinganyisye soni Cipata ca ku ciŵata. Ŵaŵisile matanga ni kuŵika mipiciko, ni kutaŵa soni lipupa, lyele ulewu wakwe waliji mamita 400 mpaka kuja kwika ku Cipata ca Yiswani.

¹⁴ Malikiya mwanace jwa Lekabu juŵalamulilaga ku dela ja Betehakelemu, ŵalinganyisye soni Cipata ca Yiswani, ni kuŵicilila matanga ni mipiciko jakwe.

¹⁵ Shalumu mwanace jwa Kolihose, juŵalamulilaga ku dela ja ku Misipa, ŵalinganyisye soni Cipata ca Uliŵa. Ŵalinganyisye soni cipataco ni kuŵika msakasa wakwe, matanga ni mipiciko jakwe. Ŵataŵile soni lipupa lya Litamanda lya Sela ciŵandika ni mgunda wa mwenye, mpaka kuja kwika ku masitepe gakutulucila pakukopoka mu msinda wa Daudi.

¹⁶ Nehemiya mwanace jwa Asibuki, juŵalamulilaga hafu ja dela ja Beti Suli, ŵataŵile mbali jimo ja lipupalyo mpaka kuja kwika ku malo gakulolegana ni malembe ga Daudi, ni kuja kwika ku litamanda, ni ku nyumba ja asilikali.

Alefi ŵaŵakamulaga masengo gakutaŵa soni lipupa

¹⁷ Alefi ŵakuyicisyaŵa ŵataŵile mbali syejinji sya lipupa: Lehumu mwanace jwa Bani ŵataŵile mbali jine ja lipupalyo; Hashabiya, juŵalamulilaga hafu ja mbali ja Keyila, nombe nawo ŵataŵile mbali jine ja lipupalyo m'malo mwa ŵandu ŵa ku dela jakwe.

¹⁸ Bafayi mwanace jwa Henadadi, juŵalamulilaga hafu ja dela jine ja Keyila ŵataŵile mbali jine ja lipupalyo.

¹⁹ Esele mwanace jwa Yeswa, juŵalamulilaga ku Misipa, ŵataŵile mbali jine ja lipupalyo jakulolegana ni ku malo gakusunjila yida ya ngondo, mpaka kuja kwika pa ndumba ja lipupalyo.

²⁰ Baluki mwanace jwa Sabayi ŵataŵile mbali jine ja lipupalyo mpaka kuja kwika pa mlango wakwinjilila ku nyumba ja Eliyashibu jwamkulungwa jwa ŵakutaga mbopesi.

²¹ Melemoti, mwanace jwa Uliya soni ŵiŵaliji cisukulu ca Hakosi, ŵataŵile mbali jine ja lipupalyo, mpaka ku mbesi kwa nyumba ja Eliyashibu.

Ŵakutaga mbopesi ŵaŵakamulaga masengo gakutaŵa soni lipupa

²² Ŵakutaga mbopesi ŵakuyicisyaŵa ŵataŵile mbali syejinji sya lipupa: Ŵakutaga mbopesi ŵakutyocela ku dela jakusyungulila msinda wa Yelusalemu ŵataŵile mbali jine ja lipupalyo.

²³ Benjamini ni Hashubu ŵataŵile mbali jine ja lipupalyo, jijaliji ku meso kwa nyumba syawo; Asaliya, mwanace jwa Maaseya soni ŵiŵaliji cisukulu ca Ananiya ŵataŵile mbali jine ja lipupalyo, jijaliji ku meso kwa nyumba jawo.

²⁴ Binuyi mwanace jwa Henadadi ŵataŵile mbali jine ja lipupalyo, kutyocela ku nyumba ja Asaliya mpaka pa ndumba ja lipupa.

²⁵ Palali mwanace jwa Usayi ŵataŵile mbali jine ja lipupalyo ni sanja ja nyumba ja penani ja mwenye ciŵandika ni ku luŵala lwa alonda. Kaneko Pedaya mwanace jwa Paloshi ŵataŵile mbali jine ja lipupalyo,

²⁶ mpaka kuja kwika ciŵandika ni ku Cipata ca Mesi ni ku sanja jakucinjilicisya Nyumba ja AMBUJE jila.

Amisili ŵane ŵiŵataŵile nawo lipupa

²⁷ Ŵandu ŵa ku Tekowa ŵataŵile soni mbali jine ja lipupalyo, mbali jeleji jaliji jaŵili kwa jemanjajo. Ŵataŵile mbali jine jakulolegana ni sanja jekulungwa mpaka kuja kwika ciŵandika ni lipupa lya ku Ofele.

²⁸ Ŵakutaga mbopesi ŵane ŵataŵile soni lipupa kutyocela pa Cipata ca Haci, jwalijose ŵataŵaga lipupa mwakulolegana ni nyumba jakwe.

²⁹ Sadoki mwanace jwa Imeli, ŵataŵile soni mbali jine ja lipupa mwakulolegana ni nyumba jakwe. Shemaya mwanace jwa Shekaniya juŵalolelaga Cipata ca ku Ngopoko Lyuŵa, ŵataŵile mbali jine ja lipupalyo.

³⁰ Hananiya mwanace jwa Shelemiya, ni Hanuni mwanace jwa msano ni jumo jwa Salafu, ŵataŵile soni mbali jine ja lipupalyo, jeleji jaliji mbali jaŵili. Meshulamu mwanace jwa Belekiya ŵataŵile soni mbali jine ja lipupalyo mwakulolegana ni nyumba jakwe.

³¹ Malikiya, fundi jwakusyana golidi, ŵataŵile soni mbali jine mpaka kuja kwika ku nyumba ja ŵakutumicila ku Nyumba ja AMBUJE soni ku nyumba ja ŵandu ŵa malonda, jele jijalolegene ni Cipata ca Mikifadi mpaka ku Nyumba ja AMBUJE, ciŵandika ni cipinda capenani pa ndumba ja kumpoto cakungopoko lyuŵa kwa lipupa.

³² Afundi ŵakusyana yisyano ya golidi ni ŵa malonda ŵataŵile soni mbali jakumalisya, kutyocela pa cipinda ca pandumba mpaka kuja kwika pa Cipata ca Ngondolo.