Nehemiya 2 - Chiyawo Bible

Nehemiya akwawula ku Yelusalemu

¹ Pa mwesi wa Nisani mcaka ca 20 ca ucimwene wa Alitakisesi, pa ndaŵi jiŵalyaga cakulya ca ligulo mwenyewo, une najigele finyo ni kuja kuwupeleka kwa mwenye. Kutyocela kalakala mwenye ŵaliji mkanajiwone ngope jangu jili ja canasa.

² Myoyo mwenyewo ŵambusisye kuti, “Ana ligongo cici ngope jenu jikuwoneka ja canasa nambo mli mkakulwala? Cine cakwe cikwenela kuti cikumsawusya m'mwejo mu mtima mwenu.” Kaneko une najogwepe,

³ ni najanjile mwenyewo kuti, “Mwenye akole umi welewu mpaka kalakala! Ana ngope jangu tijilecele cici kuwoneka ja canasa pakuti ku msinda kwele kugali malembe ga acinangolo ŵangu kuli masamesamepe, soni yipata ya msindawo ŵayijocile ni moto.”

⁴ Kaneko mwenye ŵambusisye kuti, “Ana sambano mkusaka cici?” Pelepo une napopesile kwa Mlungu,

⁵ ni najanjile mwenyewo kuti, “Naga yili yakwasangalasya wawo mwenye, ni kusalalila une mtima jwakutumicila jwawo, andume kuti njawule ku cilambo ca Yuda ku msinda kugali malembe ga acinangolo ŵangu kuti ngataŵe soni msindawo.”

⁶ Ŵamkwawo mwenye ŵatemi ciŵandika ni mwenyewo, pa ndaŵi jiŵambusyaga une mwenyewo kuti, “Ana masengogo tigakajigale ndaŵi jelewu uli, nambi m'mwejo timkawuje cakaci?” Une nasalile mwenyewo ndaŵi jitingawujile, ni ŵangundile kuti njawule.

⁷ Kaneko naŵendile mwenyewo kuti asalalile une mtima soni ambe yikalata kuti ngapelece kwa acibwanamkubwa ŵa mbali ja pesi cakungapilo lyuŵa kwa Lusulo lwa Yufuleti kuti jemanjajo akangunde kuti ngapite mu dela jawojo mpaka ngayice ku cilambo ca Yuda.

⁸ Naŵendile soni kuti ambe cikalata kuti ngapelece kwa Asafu kapitawo jwakulolela ukwete wa mwenye kuti ŵelewo akambe une yitela yakuti ngalinganyicisye yipata ya pa mapupa gakucinjilicisya Nyumba ja AMBUJE, lipupa lya msinda ni nyumba jitingatameje une. Myoyo mwenye ŵambele yindu yosope yinaŵendileyo pakuti Mlungu jwaliji ni une.

⁹ Mwenye ŵatumisye acakulungwakulungwa ŵa ngondo ni asilikali ŵakwela pa mahaci kuti alongane ni une. Pinayice kwa acibwanamkubwa ŵa dela ja pesi cakungapilo lyuŵa kwa Lusulo lwa Yufuleti, napele jemanjajo yikalata yakutyocela kwa mwenye.

¹⁰ Nambo Sanibalati jwa ku Holoni ni jwamkulungwa jwine jwa ku upande wa ku Amoni lina lyakwe Tobiya yasakalisye mnope piŵapikene kuti mundu jwine ayice kukwatendela Aisalaeli yindu yambone.

¹¹ Myoyo nayice ku Yelusalemu, pigamasile masiku gatatu,

¹² najimwice pakati cilo ni najigele ŵandu ŵane pakuti nganinamsalila jwalijose yiŵasakaga Mlungu kuti nawutendele msinda wa Yelusalemu. Paliji pangali bulu jwine akaŵe junakwesile une pejo.

¹³ Nakopwece ciloco kupitila ku Cipata ca ku Ciŵata, ni kwenda kwawulaga ca ku Cisima ca Cilombo ca m'mesi ni ku Cipata ca Yiswani. Pinajendaga nalolite mapupa ga msinda gigagumwice ni yipata yiyajonasice ni moto yila.

¹⁴ Kaneko napitilisye kwenda mpaka kuja kwika ku Cipata ca Uliŵa ni ku Litamanda lya Mwenye. Nambo paliji pangali litala lyakuti bulu junakwesilejo apite.

¹⁵ Myoyo najesile kupitila ku Ciŵata ca Kidiloni, ndili mkulilolape lipupalyo. Kaneko nawujilile ni kuja kukwinjila soni mu msindamo kupitila pa Cipata ca ku ciŵata cila.

¹⁶ Acakulungwakulungwa ŵala nginamanyilila kunajile ni yinaliji mkutenda pakuti naliji mkininasalile Ayuda, ŵakutaga mbopesi, acimlongola, acakulungwakulungwa ŵala, kapena jwalijose juŵaŵajilwe kuti akamuleje nawo masengogo.

¹⁷ Nambo sambano nasalile jemanjajo kuti, “Alole yisawusyo yitukwete sambano. Msinda wa Yelusalemu usandwice masame soni yipata yakwe yapile ni moto. Kwende tutaŵe soni mapupa ga msinda wa Yelusalemu, kuti tukatendaga soni.”

¹⁸ Nasalile jemanjajo yiŵatesile Mlungu pakungamucisya une, soni maloŵe giŵasalile une mwenye. Ŵanduwo ŵajanjile kuti, “Kwende tutande soni kutaŵa.” Myoyo ŵaliŵicile cile kuti atande masengo gakutaŵa soni.

¹⁹ Nambo pa ndaŵi jele Sanibalati, Tobiya ni Geshemu jwa Ciluya piŵapikene ya nganiji, ŵatandite kutuseka ni kutunyosya uwe acitiji kuti, “Ana cimkutenda jemanja ni cici? Ana mkusaka kumjimucila mwenye?”

²⁰ Une najanjile jemanjajo kuti, “Uwe tuli ŵakutumicila ŵa Mlungu, nipo citutande masengo gakutaŵa soni. Jemanja nganimkola cilicose mu Yelusalemu muno, nipo nganimkola macili gakupocelela malo akuno, soni nganimkola cilicose cakukumbusya ya jemanja mu Yelusalemu muno.”