Nehemiya 13 - Chiyawo Bible

Kulilekanganya ni ŵandu ŵa mitundu jine

¹ Pa lisiku lyelelo ŵaŵalasile Malamusi lya Mose ŵandu wosope alimkupikana, kaneko ŵagasimene maloŵe gakuti, “Mundu jwa mtundu wa Aamoni kapena m'Mowabu akasajinjila mu msongano wa ŵandu ŵa Mlungu.

² Ayi yaliji myiyi ligongo lyakuti ŵandu ŵa ku Amoni ni ku Mowabu nganapeleka yakulya ni mesi kwa Aisalaeli pa ndaŵi jiŵatyocelaga ku Iguputo. Nambo m'malo mwakwe ŵapele mbiya Balamu ni kwasalila kuti ŵalwesye jemanjajo, nambo Mlungu jwetu ŵagagalawisye malwesogo kuŵa upile.”

³ Ŵandu ŵa ku Isalaeliwo piŵapikene kuŵalanga kwa lilamusiko, jemanjajo ŵatyosisye ŵandu wosope ŵa cilendo ŵiŵatamaga sikati jawo.

Nehemiya ŵakolosisye ndamo jakusakala

⁴ Ayi mkaniyitendece, jwakutaga mbopesi Eliyashibu ŵaliji ali asagulidwe kuti aloleleje yipinda yakusunjila katundu m'Nyumba ja AMBUJE. Ligongo lyakupikanganana ni Tobiya,

⁵ ŵelewo ŵalinganyicisye Tobiya cipinda cekulungwa cele kala ŵasunjilagamo yakupeleka ya utandi, ubani,* yida ya ku kicini, mituka ja ŵakutaga mbopesi, yakupeleka ya calikumi* ya yakulya finyo ni mawuta ga olifi,* yiyapelecedwaga kwa Alefi, ŵandu ŵakwimba nyimbo, acilonda ŵa ku Nyumba ja AMBUJE ni mituka ja ŵakutaga mbopesi kuti akamulisyeje masengo.

⁶ Yeleyi piyaliji mkutendeka une nginimba ku Yelusalemu, ligongo mu caka ca 32 Alitakisesi piŵaliji mwenye jwa ku Babiloni,* une napite kwa mwenyewo kukunguluka. Jili jipite ndaŵi naŵendile mwenye kuti njawuleje

⁷ nipo une nawujile ku Yelusalemu, kunasimene cileŵi cele ciŵatesile Eliyashibu pakumlinganyicisya Tobiya cipinda mkati mwa Nyumba ja AMBUJE.

⁸ Une napile mtima nipo najasile kusa katundu josope jwa Tobiya jujwaliji mcipindamo.

⁹ Kaneko nalamwile kuti aswejesye mu yipindamo pamo ni yida ya ku kicini ya m'Nyumba ja AMBUJE, yakupeleka ya utandi ni ubani.

¹⁰ Nasimene soni kuti Alefi nganiŵapaga mbuwa ja yakulya yiŵaŵajilene kupocela. Myoyo Alefiwo, pamo ni ŵakwimba nyimbo ŵiŵakamulaga masengo ku Nyumba ja AMBUJE ali atisile nipo jwalijose jwapite ku mgunda wakwe.

¹¹ Myoyo najamwice acakulungwakulungwa ŵala ni kwawusya kuti, “Ana ligongo cici ajilesile Nyumba ja AMBUJE camti myiyi?” Kaneko nasongenye ŵandu ŵala ni kwawucisya soni pa masengo giŵakamulaga.

¹² Pinatesile yeleyi, Ayuda ŵatandite soni kwika ni cakupeleka ca calikumi ca tiligu, finyo, ni mawuta ga olifi* ku yipinda yakusunjilamo katundu ya ku Nyumba ja AMBUJE.

¹³ Nasagwile ŵandu ŵakuyicisyaŵa kuti aŵe ŵakusunga yipanje: Jwakutaga mbopesi Shelemiya, Sadoki mwalimu jwa malamusi ni Pedaya jwa ci Lefi. Hanani mwanace jwa Sakuli soni cisukulu ca Mataniya ŵaliji mkamusi jwawo. Nakulupilile ŵandu ŵeleŵa, nipo masengo gawo galiji gakwagaŵila acalongo acimjawo yakulya.

¹⁴ Lili lipopelo lyangu kuti Mlungu takumbucile masengo gambone gele ginigatesile pa nyumba jejino ni pa kumtumicila.

¹⁵ Pandaŵi jelejo naweni ŵandu ŵa ku Yuda ali mkuminya mipeleya pa lisiku lyakupumula.* Ŵane ŵaliji mkuwunjika tiligu malo gamo ni kumtwicilaga pa acibulu ŵawo, ŵane ŵajigalaga tiligu, finyo, mipeleya, nguju ni yindu yine pa acibulu ŵawo ni kwikaga nayo ku Yelusalemu pa lisiku lya sabato. Myoyo une nakalamwisye jemanjajo kuti akasasumisyaga yakulya pa lisiku lyakupumulalyo.

¹⁶ Ŵandu ŵane ku Taya ŵiŵaliji mkutama ku Yelusalemu ŵayikaga ni somba ni katundu jwine ni kuyisumisyaga pa lisiku lyakupumula kwa ŵandu ŵa ku Yuda, ni ku Yelusalemu.

¹⁷ Papopo najamwice acimlongola ŵa Ayuda ni kwawusya kuti, “Ana ngamkumanyilila kuti mkulisakasya lisiku lyakupumula ligongo lya yakusakala yimkutendayi?

¹⁸ Ana Mlungu nganatupa uwe cilango pamo ni msinda awuno ligongo lyakuti nombe nawo acinangolo ŵetu ŵatesile yindu iyiyi? Nambotu jemanja mkusaka kuti lutumbilo lwa Mlungu luŵe pa Aisalaeli pa kulisakasya lisiku lyakupumulali.”

¹⁹ Sambano ngulamula kuti, patikusweje mkanilitande lisiku lyakupumula awugaleje yipata yosope ya mu Yelusalemu, nipo ayiwuguleje lili limasile lisiku lyakupumula. Naŵisile ŵamasengo ŵangu ŵane ŵakulolela pa cipataco kuti katundu jwalijose akasajinjila mu msindamo pa lisiku lyakupumula.

²⁰ Ŵandu ŵakusumisya malonda ŵagonaga kusa kwa msinda wa Yelusalemu kaŵili kapena katatu.

²¹ Nambo une nakalamwisye jemanjajo ni kwawusya kuti, “Ana ligongo cici mkugona kusa kwa msinda? Naga mkuwilisya soni kutenda yeleyi tinjimtaŵa.” Kutyocela lisiku lyelelo mpaka masiku gane ga msogolo mwakwe, ŵanduwo nganayikaga soni pa lisiku lyakupumula.

²² Nalamwile Alefi kuti aliswejesye acimsyene nipo ayice ku kulondela pa yipata kuti lisiku lyakupumula liŵeje lyakusagulika. AMBUJE ŵangu akumbucile soni yeleyi pakusalalila une mtima, nipo asunje une ligongo lya cinonyelo cawo cangamala.

²³ Pandaŵi jelejo nasimene soni kuti acalume ŵajinji ŵa Ciyuda alombele acakongwe ŵa ku Ashidodi, ku Amoni, ni ku Mowabu.

²⁴ Hafu ja ŵanace ŵawo wosope ŵaŵecetaga ciŵeceto ca ku Ashidodi, mwakuti nganapakombolaga kuŵeceta ciŵeceto cetu ca Cihebeli.

²⁵ Najamwice jemanjajo, mwakuti nalwesile, naputile ŵane mwa jemanjajo ni kwacuŵa umbo. Kaneko nasalile jemanjajo kuti alumbile mu lina lya Mlungu naga ngasiŵalombekanya ŵanace ŵawo ŵacakongwe ni ŵacalume kwa ŵandu ŵa yilambo yine.

²⁶ Nasalile soni jemanjajo kuti, “Acakongwe ŵa cilendo ni ŵiŵamtendekasisye Mwenye Solomoni kuti alemwe. Jwalakweju jwaliji mwenye jwamkulungwa mnope kwapunda ayimwene wosope ŵa mitundu jine. Mlungu ŵamnonyelaga mnope jwalakwejo, nipo ŵamtesile kuti aŵe mwenye jwa Aisalaeli wosope. Nambotu acakongwe ŵa cilendowo ni ŵiŵamlemwekasisye jwalakwejo.

²⁷ Ana uweji tupikaneje soni kuti jemanja mtesile yakusakalayi yakumsakalisya Mlungu pakulombela acakongwe ŵa cilendo?”

²⁸ Yehoyada mwanace jwa Eliyashibu jwamkulungwa jwa ŵakutaga mbopesi* ŵakwete mwanace juŵalombele mwanace jwamkongwe jwa Sanibalati ŵa ku Holoni. Ali ni ligongo lyakwe natopwesye ŵelewo kuti atyoce ku Yelusalemu.

²⁹ AMBUJE akumbucile mwasakacisye jemanjajo umbopesi wawo ni muŵanyocesye cilanga* ca wawo ciŵatesile nawo ŵakutaga mbopesi ni Alefi.

³⁰ Naswejesye ŵanduwo ni kwatyocesya cilicose cicaliji ca cilendo pasikati pawo, nipo napele masengo ŵakutaga mbopesi ni Alefi kuti jwalijose agamanyilile cenene masengo gakwe.

³¹ Nakolosisye soni ya ŵandu ŵakuti ayiceje ni sasu pa malo gakupelecela mbopesi lisiku ni lisiku ni yisogosi yandanda kukomala ku Nyumba ja AMBUJE. AMBUJE, angumbucile une pa yindu yambone yosope yimbanganyisye.