Nehemiya 12 - Chiyawo Bible

Mena ga ŵakutaga mbopesi ni Alefi

¹ Ŵakutaga mbopesi ni Alefi ŵiŵawusile kutyocela ku ukapolo pamo ni Selubabele mwanace jwa Sheyatiyele ni jwakutaga mbopesi Yeswa ŵaliji aŵa: Selaya, Yelemiya, Esala,

^2-7 Amaliya, Maluki, Hatushi, Shekaniya, Lehumu, Melemoti, Ido, Ginetoyi, Abiya, Mijamini, Madiya, Biliga, Shemaya, Yoiyalibu, Yedaya Salu, Amoki, Hilikiya ni Yedaya. Jemanjaji ŵaliji acimlongola sikati ja ŵakutaga mbopesi ni acalongo acimjawo mu ndaŵi ja Yeswa. Ŵakuyicisyaŵa ŵaliji ŵakulongolela nyimbo syakutogolela: Yeswa, Binuyi, Kadimiyele, Shelebiya, Yuda ni Mataniya. Jemanjaji pamo ni acalongo acimjawo ŵaliji ŵakulolela ya nyimbo syakumtogolela Mlungu.

Alefi:

⁹ Bakibukiya ni Uno, pamo ni Alefi acimjawo ŵajimbaga nyimbo syakutogolela mwakupokolana pa ndaŵi ja mapopelo.

Yisukulu ya Yoswa jwamkulungwa jwa ŵakutaga mbopesi

¹⁰ Yeswa ŵaliji babagwe Yoiyakimu, angangagwe Eliyashibu soni ambujegwe Yoiyada.

¹¹ Yoiyada ŵaliji babagwe Yonatani soni angangagwe ŵa Yaduwa.

Acimlongola ŵa maŵasa ga ŵakutaga mbopesi

^12-21 Pandaŵi jele Yoiyakimu piŵaliji jwakutaga mbopesi, ŵakutaga mbopesi ŵakuyicisyaŵa ŵaliji acimlongola ŵa maŵasa gawo: Jwakutaga Mbopesi Liŵasa Melaiya liŵasa lya Selaya Hananiya liŵasa lya Yelemiya Meshulamu liŵasa lya Esala Yehohanani liŵasa lya Amaliya Yonatani liŵasa lya Maluki Yosefe liŵasa lya Shebaniya Adina liŵasa lya Halimu Helikayi liŵasa lya Melayoti Sakaliya liŵasa lya Ido Meshulamu liŵasa lya Ginetoni Sikili liŵasa lya Abiya Pilitayi liŵasa lya Mowadiya Shamuwa liŵasa lya Biliga Yehonatani liŵasa lya Shemaya Matenayi liŵasa lya Yoiyalibu Usi liŵasa lya Yedaya Kalayi liŵasa lya Salayi Eba liŵasa lya Amoki Hashabiya liŵasa lya Hilikiya Netanele liŵasa lya Yedaya

Jwakutaga Mbopesi Liŵasa Mena ga maŵasa ga ŵakutaga mbopesi ni Alefi

²² Mu ndaŵi ja Eliyashibu, Yoiyada, Yohanani, ni Yaduwa ŵiŵaliji acakulungwa ŵa ŵakutaga mbopesi, palembedwe mena ga acimlongola ŵa maŵasa ga Alefi ni ŵakutaga mbopesi, mpaka pa ndaŵi jiŵalamulilaga Mwenye Daliyasi jwa ku Pelesiya.

²³ Alefi ŵiŵaliji acimlongola ŵa maŵasa ŵalembesye mena gawo mu buku ja Mbili mpaka mu ndaŵi ja Yohanani cisukulu ca Eliyashibu.

Kugaŵa kwa masengo ga ku Nyumba ja AMBUJE

²⁴ Hashabiya, Shelebiya, Yoswa mwanace jwa Kadimiyele, pamo ni acalongo acimjawo ŵakamusyanaga kwimba nyimbo syakumlumba Mlungu ni kumtogolela, mpela muŵalamulile jemanjajo Mwenye Daudi* mundu jwa Mlungu. Ŵalamwile jemanjajo kuti makuga gakwimba nyimbogo gapocelanganaga.

²⁵ Acilonda ŵakuyicisyaŵa ŵalondelaga ku nyumba syakusunjilako katundu ciŵandika ni pa yipata ya ku Nyumba ja AMBUJE: Mataniya, Bakibukiya, Obadiya, Meshulamu, Talimoni ni Akubu.

²⁶ Jemanjaji ni ŵiŵapali pa ndaŵi ja Yoiyakimu mwanace jwa Yeswa soni cisukulu ca Yehosadaki, soni mu ndaŵi ja bwanamkubwa Nehemiya ni mu ndaŵi ja Esala, jwakutaga mbopesi juŵaliji soni mwalimu jwa Malamusi.

Kupeleka kwa lipupa lyakucinjilicisya msinda

²⁷ Ŵandu piŵatiga kuti apelece lipupa lya msinda ŵa Yelusalemu, ŵaŵilasile Alefi wosope kutyocela kulikose kuŵatamaga kuti ayice ku Yelusalemu kukutenda msyungu wakupeleka lipupalyo mwalukondwa, mwakutogolela soni pakwimba nyimbo ni micekece ni yida yakwimbila ya ngonji.

²⁸ Maŵasa ga ŵakwimba ŵa ci Lefi gasongene malo gamo kutyocela ku malo gosope gakusyungulila msinda wa Yelusalemu ni ku misi ja Netofa,

²⁹ Beti Giligala, Geba ni Asimafeti.

³⁰ Ŵakutaga mbopesi ni Alefi ŵatesile msyungu wakuliswejesya acimsyene, ŵandu, yipata ni mapupa ga msinda.

³¹ Une nayice nawo acakulungwakulungwa ŵa ku Yuda, nipo nakwesile nawo penani pa lipupa lya msindawo. Mwa jemanjajo nasagwile makuga gaŵili kuti gajendeje mwakuwusyungulila msindawo kwineku ali kumtogolela Mlungu. Likuga lyandanda lyajesile kumlyo penani pa lipupalyo mpaka kuja kwika ku Cipata ca Yiswani.

³² Hoshaya ŵayikaga panyuma pa jemanjajo pamo ni hafu ja acakulungwakulungwa ŵala.

³³ Kaneko ŵayice ŵakutaga mbopesi ŵakuyicisyaŵa ŵiŵagombaga malipenga, ŵiŵajendaga mwakwakuya: Asaliya, Esala, Meshulamu,

³⁴ Yuda, Benjamini, Shemaya ni Yelemiya.

³⁵ Kaneko ŵayice Sakaliya mwanace jwa Yonatani, soni cisukulu ca Shemaya. (Acinangolo ŵakwe ŵaliji kupwatika Mataniya, Mikaya, ni Sakuli jwa mwiŵasa lya Asafu.)

³⁶ Ŵapali acalongo acimjakwe aŵa: Shemaya, Asalele, Milalayi, Gilalayi, Maai, Netanele, Yuda ni Hanani, jemanjaji ŵajimbaga yida ya Mwenye Daudi, mundu jwa Mlungu. Esala, mwalimu jwa Malamusi ni jwele juŵalongolelaga jemanjajo.

³⁷ Kutyocela ku Cipata ca Uliŵa jemanjajo ŵakwesile pa masitepe gakwawula ku msinda wa Daudi, pa litala lyakukuluma ni lipupa ca kumkuli kwa nyumba ja Daudi mpaka ku Cipata ca Mesi ca kungopoko lyuŵa.

³⁸ Likuga line lya ŵandu ŵiŵamtogolelaga Mlungu lyajile ku mciji, nipo nakuyisye jemanjajo, pamo ni hafu jine ja acimlongola ŵa ku Yuda. Twajesile mpaka kucipunda Sanja ja Ufuni mpaka twajile kwika ku Lipupa Lyetambasukuce.

³⁹ Kutyocela kweleko twajesile mpaka ku Cipata ca Efelemu, Cipata ca Kala, Cipata ca Somba, Sanja ja Hananele, Sanja ja Licila, ni ku Cipata ca Ngondolo. Pambesi pakwe twajimi pa Cipata ca Alonda.

⁴⁰ Myoyo makuga gaŵili gosopego gajile kukwima ciŵandika ni Nyumba ja AMBUJE pamo ni une ni hafu ja acakulungwakulungwa ŵiŵaliji ni une ŵala.

⁴¹ Mu likuga lyangu mwaliji mwana ŵakutaga mbopesi ŵakuyicisyaŵa ŵiŵagombaga malipenga: Eliyakimu, Maaseya, Miniyamini, Mikaya, Eliyoyenayi, Sakaliya, ni Hananiya.

⁴² Ŵapali soni ŵakutaga mbopesi ŵakuyicisyaŵa, ŵiŵalongolelaga ŵakwimba nyimbo: Maaseya, Shemaya, Eliyesa, Usi, Yehohanani, Malikiya, Elamu ni Esele. Yesilahiya ni juŵalongolelaga ŵakwimba nyimbowo.

⁴³ Pa lisiku lyelelo ŵandu ŵapelece mbopesi syejinji, nipo ŵasengwile mnope, pakuti Mlungu ni juŵasengwesye jemanjajo. Nombe nawo acakongwe pamo ni ŵanace ŵakwe ŵasengwile. Nipo kusengwa kwa ŵandu ŵa ku Yelusalemu kwapikanice kwakutalika.

Kupeleka yindu yakamucisya pa mapopelo ku Nyumba ja AMBUJE

⁴⁴ Pandaŵi jelejo ŵandu ŵasagulidwe kuti aŵe acilonda ŵa ku nyumba syakusunjila yakupeleka ya ku Nyumba ja AMBUJE, yisogosi yandanda kukomala, ni ca calikumi.* Ŵanduwo ŵasongenye yakupelekayo pakukuya Malamusi ga Mose gakuti yeleyo ayipeleceje kwa ŵakutaga mbopesi ni kwa Alefi kutyocela ku migunda ja m'misi josope. Ŵandu wosope ŵa ku Yudako ŵaliji ŵakusengwe ni ŵakutaga mbopesi ni Alefi ŵaŵatumicilagawo,

⁴⁵ ligongo lyakuti jemanjajo ŵatendaga yiŵalamwile Mlungu mnopemnope msyungu wakuswejesya yindu ni misyungu jine. Ŵakwimba nyimbo, nambo soni alonda ŵa ku Nyumba ja AMBUJE nombe nawo ŵakamulaga masengo gawo pakukuya lilamusi lya Daudi ni lya Solomoni mwanace jwawo.

⁴⁶ Mu ndaŵi jakala ja Daudi ni Asafu jwapali mlongola jwa ŵandu ŵakwimba nyimbo, soni syapali nyimbo syakumlumba ni kumtogolela Mlungu.

⁴⁷ Mu ndaŵi ja Selubabele ni Nehemiya ŵandu ŵa mcilambo cosope ca Isalaeli ŵapelekaga mituka lisiku ni lisiku kwa ŵandu ŵakwimba nyimbo ni acilonda ŵa ku Nyumba ja AMBUJE. Ŵaŵikaga soni padela mbuwa ja Alefi, nombe nawo Alefiwo ŵaŵikaga padela mbuwa ja ŵakutaga mbopesi.