Nehemiya 1 - Chiyawo Bible

Lipopelo lya Nehemiya

¹ Aga ni maloŵe ga Nehemiya mwanace jwa Hakaliya. Pa mwesi wa Kisilefi* mcaka ca 20 pa ndaŵi jele Alitakisesi ŵaliji jwakulamulila jwa ku cilambo ca Pelesiya, une naliji mu msinda wekulungwa wa Susa.

² Hanani jumo jwa acalongo acimjangu ŵayice ni ŵandu ŵane kutyocela ku Yuda. Myoyo nawusisye jemanjajo kwambaga ya msinda wa Yelusalemu ni Ayuda ŵiŵawusile kutyocela ku ukapolo ku Babiloniya.

³ Jemanjajo ŵanjanjile kuti, “Ŵandu ŵawusile kutyocela ku ukapolo ŵala ali pa yipwetesi yekulungwa nipo sikwatenda soni. Mapupa ga msinda wa Yelusalemu gagumwice nipo yipata yakwe yapile ni moto.”

⁴ Pinapikene maloŵe gelega natemi pasi ni kutanda kulila, nalisile kwa masiku gejinji soni nalijimaga kulya ni napopelaga kwa Mlungu jwakwinani.

⁵ Natite kuti, “AMBUJE,* Mlungu jwakwinani, jwamkulungwa ni jwakogoya, jwakusasunga cilanga* cakwe ni kulosya cinonyelo cangacenga kwa ŵandu ŵakusiŵanonyelaga wawo ni kusunga malamusi ga wawo.

⁶ Atejele mapikanilo gawo, ni kuwugula meso gawo kuti apikane lipopelo lya une jwakutumicila jwawo, lyele lingusapopelaga kwa wawo musi ni cilo, kwapopelela Aisalaeli ŵali ŵakutumicila ŵawo. Ngwiticisya kuti uwe Aisalaeli twalemwecesye wawo. Yakuwona, une pamo ni acinangolo ŵangu twalemwecesye wawo.

⁷ Twatendele yakusakala yejinji, soni nganitugapikanila malamusi ni majiganyo gawo giŵapelece kwa uwe kupitila mwa Mose* jwakutumicila jwawo.

⁸ Akumbucile maloŵe giŵamsalile jwakutumicila jwawo Mose gakuti, ‘Naga jemanja Aisalaeli ngamkulupicikaga, une tinjimpwilinganya jemanja pasikati pa ŵandu ŵa yilambo yine.

⁹ Nambo naga mkuwujila soni kwa une, ni kugapikanila malamusi gangu, ni kuti une tinjasonganya jemanjajo kutyocela kumbali syosope ni kwika nawo ku malo ginasagwile kuti akalambileje une kweleko, atamose kuti ŵandu ŵenu ŵapwilingenewo aŵe kwakutalicila camtuli.’

¹⁰ “AMBUJE, jemanjaji ali ŵakutumicila ŵawo, soni ali ŵandu ŵawo ŵiŵawombwele ŵalakwe ni macili gawo gekulungwa.

¹¹ Atejele mapikanilo gawo ku lipopelo lya une jwakutumicila jwawo ni mapopelo ga ŵakutumicila ŵawo ŵane ŵakusalicimbicisya lina lya wawo. Angunde une jwakutumicila jwawo kuti yindu yinjendele cenene lelo jino, soni kuti mwenye andendele canasa.” Pandaŵi jelejo naliji jwakupelecela mgawo wa finyo kwa mwenye.