Nahumu 3 - Chiyawo Bible

¹ Likungu kwa msinda wakuwulaga ŵandu, wegumbale ni unami ni ya wiyi soni wangaleka konanga!

² Mpikane kulila kwa yikoti, mkokomo wa yigudumu, lukutulukutu jwa mahaci, ni masegwe ga mageleta!

³ Ŵakwela mahaci ŵatowelaga, mawupanga galiji ŵaliŵali, mapanga galiji nyesinyesi! Ŵandu ŵajinji awile, mitembo jili jejinji jangaŵalanjika — mwakuti ŵandu akujikuŵala.

⁴ Ninefe ŵapocele cilango ligongo lya winji wa yakusakala yakwe. Ŵakopaga ŵandu ni ŵakwete yilisi yakuwulaga. Ŵanyenjelelaga ŵandu ŵa mitundu josope ni kwatendesya ukapolo.

⁵ AMBUJE Ŵamaciligosope akuti, “Tinjimpa cilango m'mwe, Ninefe! Ŵandu ŵa mitundu josope taciwuwona umakonope wenu, timcitenda soni pameso pa yilambo yosope.

⁶ Tinjimtaga yakunyalaya ni kumnyosyaga nipo tinjimtendesya kuŵa cindu citacicisekaga ŵandu.

⁷ Ŵandu wosope ŵitacimwona tacimtila. Tacitiji kuti, ‘Ninefe aŵele masame! Ana ŵani ŵampaka amtendele canasa? Ana ŵani mpaka asose kumtulasya mtima jwalakwejo?’ ”

⁸ Ana m'mwe Ninefe mli ŵakupunda Tebesi, msinda wekulungwa wa ku Iguputo? Ana ngaŵa msinda welewu waliji mungulugulu Lusulo lwa Nayilo ni kusyungulilidwa ni mesi. Mesigo galiji mpela lipupa lyakwe lyakuwucinjilicisya.

⁹ Msindawo ŵalamulilaga Ifiyopiya ni Iguputo, macili gakwe galiji gangali malile; Aputi ni Alibiya ni ŵiŵakamulanaga nawo.

¹⁰ Nambo ŵandu ŵa ku Tebesi ŵajigalidwe ukapolo. Ŵanace ŵawo ŵaputile mpaka kuwa m'misewu josope ja mu msindamo. Ŵagaŵene pakutenda cisango nipo acalume ŵakupikanika ŵataŵile ma unyolo.

¹¹ M'mwe Ninefe nomwe ŵakwe timcikolelwa ni kusyungulila mtwe! Timcilinjilila kutila kwa amagongo ŵenu.

¹² Mapupa genu gosope gakulicinjilicisya tigaciŵa mpela yitela ya nguju syejiwu: naga kuyipukunya yitelayo, ngujusyo tisigwile mkamwa mwenu!

¹³ Asilikali ŵenu ŵa ngondo ali mpela acakongwe, cilambo cenu cigambile kuŵa cangali citetelo kwa amagongo ŵenu. Moto tiwucijonanga mipilingiso ja pa cipata cakwinjila.

¹⁴ Mtecele cile mesi pakwembecela ndaŵi jitacimsyungulila amagongo ŵenu, ni kulimbisya mapupa gakulicinjilicisya. Mwunye litaka kuti mgumbe njelwa, ni kuliponya mu cikomboli!

¹⁵ Atamose mtende uli, tacimjoca mpaka kuwa kapena timciwulajidwa ku ngondo. Timcimala mpela m'mela wakulidwa ni sombe. Mŵelekane mpela sombe!

¹⁶ Mwaculwiye ŵandu ŵenu ŵa malonda kupunda ndondwa sya mwinani. Nambo sambano apite, mpela sombe sikwete mapapiko ni guluka.

¹⁷ Nduna syenu sili mpela sombe syasikusatula m'mapupa ndaŵi jakusisima. Nambo naga lyuŵa likopwece, sikusaguluka, nipo pangali atamose jumo jwakusamanyilila kwele kusipite!

¹⁸ M'mwe mwenye jwa ku Asiliya, nduna syenu siwile, nipo acakulungwakulungwa ŵenu awile! Ŵandu ŵenu apwilinganile ku matumbi, nipo pangali soni atamose jumo jwakwasonganya kuti awujile soni ku musi.

¹⁹ Pangali mtela wa peŵanga lyenu, nipo maŵanga genu ngaŵa mkupola. Wosope ŵakusapikana ya ngani jenu ja conasiko akusakwata m'myala mwa lukondwa. Ana apali mundu juŵasiŵambele ngalwe syenu syangamalasi?