Nahumu 2 - Chiyawo Bible

Kugwa kwa Ninefe

¹ Jemanja ŵa ku Ninefe, ŵandu ŵane akwisa kukuputa ngondo ni kum'mwasanya jemanja! Mŵice asilikali ŵa ngondo m'mapupa gakulicenjelela! Mlondeleje misewu! Mliŵicile cile kuputa ngondo ni kuŵa ŵakulimbangana!

² (AMBUJE asigele panandi kutamilisya ucimwene wa Isalaeli, mpela muwaŵelele kala amagongo wakwe mkinamjonanje.)

³ Yakucijila ya asilikali ŵa ngondo ŵawo yili yecejewu nipo asilikali ŵawo awete yakuwala yecejewu. Akuliŵicila cile kwawula kuputa ngondo! Yigeleta yawo yikunyesimila mpela malamba ga moto! Mahaci gawo gagambaga kusumba mwinani kwineku gali mkunyakula ngongolo mwinani!

⁴ Yigeleta yapitaga mwakuwutuka m'misewu, yagambaga kuti kupitikupiti aku nakuku m'maluŵala. Yaliji ŵaliŵali mpela yenjelele yepambe moto. Yaliji mkumesyamesya mpela njasi.

⁵ Acakulungwa ŵenu ŵa ngondo aŵilanjidwe; akwika ali mkukuŵala. Amagongo ŵawo akuwutucila ku mapupa ni kwimika cakulicinjilicisya cakulicenjelela.

⁶ Yipata ya ku lusulo yawugwice; nyumba ja mwenye jigumbele ni woga.

⁷ Mwenye jwamkongwe ajigelwe ukapolo; ŵakutumicila ŵakwe akulila mpela ngunda soni akuliputa pa cidali mwakulitesya canasa.

⁸ Ninefe ali mpela litanda lyele mesi gakwe gakujilimila kusa. Ŵane akugumila kuti, “Mjime! Mjime!” Kulila kukupikanika nambo pangali atamose jumo jwakuwujila.

⁹ Mjigale silifa!* Mjigale golidi!* Msindawo ugumbele ni yipanje!

¹⁰ Msinda wa Ninefe ujonasice, uli masame, soni wangali ŵandu! Mitima jasamile ligongo lya woga; malungo gakutetemela, macili gamasile; ngope syacenjile ni woga.

¹¹ Ana sambano msinda uli kwapi uwaliji mpela mbanga ja masimba, malo giŵalicisyaga masimba gamwana, kwele masimba gosope gatamaga mwangali woga.

¹² Lisimba lyalilume lyawulagaga nyama jakwanila lisimba lyalikongwe ni ŵanace ŵakwe; lyagumbasyaga mbanga jakwe ni nyama jepaculanyepaculanye.

¹³ AMBUJE Ŵamaciligosope akuti, “Une ndili m'magongo jwenu!” Tinjimjocela mageleta genu. Asilikali ŵenu taciwulajidwa ku ngondo, nipo tinjijigala yindu yosope yimwajigele kutyocela kwa ŵandu ŵane. Ŵamitenga ŵenu ngasapikanila soni maloŵe gawo.