Nahumu 1 - Chiyawo Bible

¹ Awu ni utenga wakuŵeceta ya msinda wa Ninefe. Utengawu ukusala yindu yiŵayiweni Nahumu jwa ku Elikoshi m'mesomkulola.

Lutumbilo lwa AMBUJE pa Ninefe

² AMBUJE Mlungu ali ŵa wiwu soni akusawucisya, akusapeleka cilango soni ali ŵaukali. AMBUJE akusiŵawucisya amagongo ŵakwe soni akusiŵatumbilila amagongo ŵakwe.

³ AMBUJE ŵangatumbila mwacitema, nambo ali ŵamacili mnope soni ŵangakunda mundu jwalemwisye kuti aŵe jwangapocela cilango. Palipose pakwenda AMBUJE, pakusatendekwa cimbunga camacili, mawunde gakusaŵa luwundu lwele lukusatendekwa ni sajo syakwe.

⁴ Naga akujilamula nyasa, jikusajumula, akusajumusya soni sulo syosope. Yakumela ya ku Bashani ni ku Kalimeli yikusajumula, soni maluŵa ga ku Lebanoni gakusanyala.

⁵ Matumbi gakusatenganyika pameso pawo, soni matumbi gamwana gakusanyelenyenduka. Cilambo capasi cikusatetemela pameso pa AMBUJE, cilambo ni ŵandu ŵakwe wosope yikusatetemela.

⁶ Ana ŵani ŵampaka apakombole kwima pameso pa AMBUJE ali atumbile? Ana ŵani mpaka apakombole kupimilila ukali wawo? Ukali wawo ukusakolela mpela moto, malwala gakusakasika ni kuŵa luwundu pameso pawo.

⁷ AMBUJE ŵambone, akusiŵacinjilicisya ŵandu ŵakwe mu ndaŵi ja yisawusyo; akusiŵasamalila ŵandu wosope ŵakusamkulupilila jwalakwejo.

⁸ Nambo mpela mesi ga cikumba tacajonanga amagongo ŵawo, nipo tacajawusya ku malo gacipi.

⁹ Ana mkukosecela kwatendela ciswamba ca mtunduci AMBUJE? Tacimjonanga kwakogoya kusyene. Ngasaganisya soni yakwawucisya kaŵili amagongo ŵakwewo.

¹⁰ Tacimjoca kwakogoya mpela miŵa jakutambalala nambo soni mpela manyasi gejumu, jemanja ŵakolelwa.

¹¹ Ku Ninefe kwatyocele mundu jwine jwa nganisyo syangalumbana, juŵasosaga kwatendela ciswamba AMBUJE.

¹² Yakuŵeceta AMBUJE nayi: “Atamose kuti Asiliya ali ŵamacili soni ŵajinji, tacijonasika ni kumala kwangawoneka soni. Ŵandu ŵangu namlagasisye, nambo ngisinimlagasya soni.

¹³ Sambano ngumasya macili ga Asiliya pa jemanja soni ngukutulanya ma unyolo giŵamtaŵilego.”

¹⁴ Yalamwile AMBUJE kwa Asiliya nayi: “Ngasakola yisukulu yitiyiciŵilanjidwa ni mena gawo. Tinjijonanga milungu jawo jakupanganya ŵandu jajili m'majumba mwawo ga milungu jawo. Ngusola lilembe lya Asiliya — ngakuŵajilwa kuŵa ni umi!”

¹⁵ Mlole, jwa mtenga akwika kutyocela ku matumbi ni ngani syambone! Jwalakwe ali mwitala gombelesya ya kupunda! Ŵandu ŵa ku Yuda, msangalalile cindimba cenu ni kumpa Mlungu yele yimwalumbilile kuti timcimpa jwalakwe. Ŵandu ŵakusakala ngasamputa soni. Jemanjajo ali ŵajonasice kusyesyene!