Misyungu 9 - Chiyawo Bible

Lunda ni kuloŵela

¹ Lunda lutaŵile nyumba jakwe, soni lujimice njalamila syakwe msano ni siŵili.

² Luwuleje nyama jakwe, lulinganyisye finyo jwakwe, ni kujigala cenene pa tebulo jakwe.

³ Lutumile ŵamasengo ŵakwe ŵacakongwe, kuti akatamile ca pa malo gakwela mnope mu msinda, kuti akajenesye kuti:

⁴ “Jwalijose jwali mundu wamba, ayice akuno!” Soni kwa mundu jwangali lunda lukusatiji,

⁵ “Myice mlye cakulya cangu soni m'mwele finyo julinganyisye.

⁶ Mlece kugulugusya kwenu, kuti mkole umi, soni mjendeje mwitala lya umanyilisi.”

⁷ Mundu jwakusalinga kuti akolosye pa kumjongolela mundu jwakunyosya, akusagamba kulitesya soni msyene. Soni mundu jwakusamjamuka mundu jwakusakala, akusagamba kulipwetekasya msyene pejo.

⁸ Kasimumjamuka mundu jwakunyosya, tagambe kuŵengana namwe, nambo naga mkumjamuka mundu jwalunda, tacimnonyela.

⁹ Mumwunde mundu jwalunda, ni tacijendeleceya kuŵa jwalunda mnope. Naga mkujiganya mundu jwakulungama, tacijonjecesya kulijiganya kwakweko.

¹⁰ Ndandililo ja lunda ni kwajogopa AMBUJE,* soni naga ukum'manyilila Jwamswela jula ni kuti ukwete umanyilisi.

¹¹ Pakuti kupitila mwangune, masiku genu tigacitupa soni yaka tiyicijonjecesyedwa pa umi wenu

¹² Naga mli ŵalunda, lunda lwenulo tilucimpa mbote; nambo naga mli ŵakwanyosya ŵandu ŵane, ŵatimcilaga ni m'mwejo jika.

¹³ Jwamkongwe jwakuloŵela akusaŵa jwalisegwe, jwakuwawata nambo soni jwangapikanicisya yindu.

¹⁴ Akusatama pa mlango wa nyumba jakwe, pa malo gane gakwela, pakuwonecela cenene mu msinda,

¹⁵ mkutimo myoyo ni kwaŵilangaga ŵandu ŵakupitila jele mbalijo, ŵakwamba kulijendela mwangaganicisya yakusaka kusepuka.

¹⁶ Ni akusati, “Msepucile akuno, ŵandu wamba m'mwe!” Soni kwa ŵandu ŵangali lunda akusati,

¹⁷ “Mesi gawiyi gakusanong'a, soni mkate wakulya mwakusisa ni jukusanong'a mnope.”

¹⁸ Nambo acalumewo ngakusamanyilila kuti kweleko ni kucili ciwa, soni kuti acalendo ŵa jwele jwamkongwejo ali kala m'malembe gakusokoka.