Misyungu 8 - Chiyawo Bible

Umbone wa lunda

¹ Ana lunda ngalukuŵilanga? Ana umanyilisi ngawukugumila mwakukwesya maloŵe gakwe?

² Lunda lukusatama pa yikwesya mungulugulu msewo, elo, lukusaja kwima m'malekano.

³ Lukusagumila ciŵandika ni kumeso kwa msinda pa yipata yakwinjilila mu msindamo.

⁴ “Ngumŵilanga jemanja, ŵandu wosopemwe.

⁵ Jemanja ŵimkakumanyilila yindu, mlijiganyeje lunda kwa une, jemanja ŵakuloŵela, mjile jii mpikanicisye.

⁶ Mpikanicisye, pakuŵa nguti namsalile yindu yakusosekwa mnope; soni ngomo syangu tisikoposye yindu yakulungama.

⁷ Pakuti yitimbecete yili yakuwona; une ngusaŵengana ni unami.

⁸ Yosope yingusaŵeceta yili yakuwona; mu yosope yayikusakopoka mkamwa mwangumu pangali ca unami.

⁹ Maloŵe gangu gali gakuwona kwa mundu jwakupikanicisya, gali gakulungama kwa ŵandu ŵakumanyilila yindu.

¹⁰ Mpocele majiganyo gangu m'malo mwa silifa,* soni msagule kumanyilila yindu ngaŵa kuwutucila golidi* jwambone.

¹¹ Pakuŵa lunda luli lwambone kupunda maganga ga mtengo mnope. Yosope yene yakuti mpaka myikumbile ngaŵa mkulandana ni lunda.

¹² Une, lundane, ngusatama mwakalamuka, soni ngusapata kumanyilila yindu nambo soni ngusaganisya cenene.

¹³ Kogopa AMBUJE ni kuŵengana ni yakusakala; Kupoka ni kulikwesya, ngusaŵengana nayo, soni yitendo yakusakala ni kuŵeceta ya kunyenga ngusaŵengana nayo soni.

¹⁴ Ngwete msyungu, soni ngwete nganisyo syambone. Ngusapikanicisya cenene yindu, soni ngwete macili.

¹⁵ Jungisinakamucisya ayimwene kulamulila cenene ni une, ŵakulamula jungisinakamucisya ni une kuti apalamule cenene mwangajimila mbali.

¹⁶ Une ni jungusinasikamucisya nduna sya mwenye pakulamula, Ni une jungisinakamucisya acakulungwakulungwa pakulamulila mcilambo.

¹⁷ Ngusinanonyela ŵakusanonyela une, Soni ŵandu ŵakusosasosa une mwakulimbika, tacisimana.

¹⁸ Yipanje ni ucimbicimbi yili ni une, ni cipanje cangamala, soni kusicila kwakwambaga kusicililasicilape.

¹⁹ Cisogosi cangu cili cambone kupunda golidi jwambone mnope, soni yambone kupunda silifa jwambone mnope.

²⁰ Ngusatenda yindu ya cilungamo, ngangusatyoka pane kuleka kwenda m'matala gagoloka.

²¹ Ngusinapa yipanje ŵandu ŵakusanonyela, ni gumbasya majumba gawo gakusunjila yipanje.

²² “AMBUJE* ŵambanganyisye une ni lunda kundanda kwene kwa masengo gawo. Mwa masengo gakwe gosope gakalakala jwakutandilila jwakwe naliji une.

²³ Ŵambanganyisye kalakala kwene, pa ndandililo jisyesyene, cilambo capasi mkanicipanganyidwe.

²⁴ Nyasa syakusokoka mnope mkanisipanganyidwe, pitwaliji kuli kwangali ma uliŵa ga mesi, ni kuti une naliji ndili mbagwile kalakala.

²⁵ Matumbi mkanigagumbidwe, Elo matumbigo mkanigapanganyidwe, une naliji ndili mbali.

²⁶ Mkanapanganye cilambo capasi ni migunda jakwe, mkanilupagwe luwundu lwandanda lwa cilambo capasi.

²⁷ Une naliji ndili mbali kala, piŵayitamilicisyaga Mlungu yosope ya kwinani m'malo mwakwe, piŵalembaga msela wa malile ga nyasa jakusokoka,

²⁸ Piŵaŵikaga lipananga m'malo gakwe kwinani, soni piŵawugulaga uliŵa ŵa m'nyasa jakusokoka mnope.

²⁹ Piŵaŵikaga malile ga nyasa, kuti mesi gakwego gakusapunda malilego, piŵaŵikaga yilimbilimbi ya cilambo capasi.

³⁰ Pa jele ndaŵijo ni kuti ndili capambalipo mpela m'misili jwakwe. Naliji mkumsangalasya ndaŵi ni ndaŵi, ni kuŵa jwakondwa pameso pakwe ndaŵi syosope.

³¹ Kusangalala mcilambo cawo cakutama ŵandu, soni kusengwaga nawo ŵanace ŵa ŵandu.

³² “Ni sambano, ŵanace ŵangu, mumbikanile une pa yingumsalilayi. Ŵana upile ŵandu ŵakusasunga malamusi gangu.

³³ Mjikuyeje misyungu jangu kuti mŵe ŵana lunda; mkasiganyosyaga maloŵe ga mkamwa mwanguga.

³⁴ Mundu jwakusambikanila une taciŵa jwakondwa, jwele jwakusatamaga pa mlango wangu lisiku ni lisiku, kwembeceya pa mlango wakwinjilila ku nyumba jangu.

³⁵ Pakuŵa mundu jwakusimana une, asimene umi, soni akusapata upile kutyocela kwa AMBUJE.

³⁶ Nambo mundu jwakakusimana une akulipweteka msyene; wosope ŵakuŵengana ni une, akusanonyela ciwa.”