Misyungu 6 - Chiyawo Bible

Kasimŵa ŵakuloŵela

¹ Mwanangu, naga mtesile cilanga* cakumlipilila mjenu ngongole, naga mlangene yakuti timumlipilile mlendo ngongole jakwe;

² mlitanjisye ni maloŵe ga pakamwa penu, mkamwilwe ni maloŵe ga mkamwa mwenu.

³ Sambano pakuti mlipelecele kala m'myala mwa jwele mundujo, mtende ayi mwanangu kuti mlikulupusye mwasyene, mjawule mwakulinandiya kwa mjenujo ni mkamdandawulile kuti amgopole.

⁴ Kasimkunda meso genu gona lugono, kapena kwikunda gwesela yikoloŵa yenu.

⁵ Mlikulupusye mwasyene mpela mujikusalikulupucisya ndandala kwa jwakusakula nyama, mpela mukucisalikulupucisya cijuni kwa ŵakusakula.

⁶ Mjawule mkajilole mbamba, m'mwe waulesi; mkalolecesye ni kulijiganya ndamo jakwe kuti mpate lunda.

⁷ Nganijikola mwenye, nganijikola soni kapitawo atamose jwakulamula.

⁸ Nambo jikusalinganyicisya cile yakulya yakwe m'cawu, soni jikusalisonganyicisya yakulya yakweyo ndaŵi ja masika.

⁹ Ana timŵe mli cigonele pelepo mpaka cakaci, m'mwe ŵaulesi? Ana timjimuce cakaci ku lugono lwenu?

¹⁰ Pamkuti, “Ngambe gona panandipe, kwamba gwesela panandi, ngaŵa camnope.”

¹¹ Pelepo ulanda tiwucimsimana mpela mundu jwaciswamba.

¹² Mundu jwacabecabe, mundu jwakusakala, akusagambaga kwendajenda apa napopo kuja mkwenesya ya unami basi.

¹³ Akusaŵeceta ni makono gakwe ali mkusisinila soni kupalapasa pasi ni makawu gakwe.

¹⁴ Ndaŵi syosope akusagambaga ganicisya yakusakala basi mu mtima wakwe wakusakala. Akusagambaga kutamila kuwatanganya ngani pasikati pa ŵandu.

¹⁵ Ligongo lya yeleyi, likungu tilicimsimana mwacisisimucila, mwangacelewasya pa ndaŵi jamnono, timcijonanjidwa, ngasimkulupuka kose.

^16-19 Yipali yindu msano ni cimo yele AMBUJE akusaŵengana nayo, kusyesyene yindu msano ni yiŵili yikusamsakalisya kwabasi; meso gakupoka ni lulumi lwa unami, nambo soni makono gakuwulaga ŵandu ŵangalemwa kose; mtima waganicisya kutenda yindu yakusakalape, makawu gakuwutucila mwacitemape ku yakusakala. Mboni ja unami jakusongona mabosa, soni mundu jwakupanda uŵengani pasikati pa ŵandu ŵakusyoŵekana.

Akwakalamusya yakwamba cikululu

²⁰ Mwanangu, mgasunjeje malamusi ga baba ŵenu, soni kasimliŵalila yiŵamjiganyisye mama ŵenu.

²¹ Yeleyi myitaŵe mu mtima mwenu ngayijasa kose, yiŵe ni m'mwejo citaŵile pa lukosi lwenu, ngayiliŵalila.

²² Pakwenda pa ulendo, tiyicimlongolela kumlosya litala; pamkugona, tiyicimlondela, soni pamkwimuka tiyiciŵeceta namwe kumpa lunda.

²³ Pakuti malamusi gali mpela nyali, nombe nago soni majiganyo gali mpela lilanguka; Soni camuko ca msyungu ni ndamo jisyesyene pa umi wa mundu.

²⁴ Yeleyi tiyicimkulupusya kwa jwamkongwe jwakusakala, tiyicimkamucisya kuti mkajigalika ni maloŵe ga kuŵeŵa ga jwamkongwe jwa cikululu.

²⁵ Kasimkumbilaga kusalala kwakwe mu mtima mwenu, kasimjigalika nago meso gakwe gakombola kunyenjelela.

²⁶ Pakuti jwamkongwe jwacikululu akukomboleceka kusumidwa ni mkate, nambo jwamkongwe jwacijama jwamlombele akusakusumula umi wakwe wene.

²⁷ Ana mundu mpaka awumbate moto, yakuwala yakwe ni ngapya?

²⁸ Kapena mpaka mliŵate makala ga moto, sajo syenu ni ngapya?

²⁹ Yalumo soni kwa jwele mundu jwakusajinjila mwa ŵakongwe ŵasyene. Jwalijose jwakumkwaya jwele jwamkongwejo, tacilaga, ngasakulupuka kose ku cilango.

³⁰ Ŵandu ngakusamnyosya jwawiyi jwakusajiŵa ligongo lyakuti jimkwete sala.

³¹ Nambope naga jwawiyijo akamwilwe, akusalipaga kasano ni kaŵili; mpaka kusumulwa cipanje cosope ca m'nyumba jakwe.

³² Mundu jwakusatenda cikululu jwangali lunda pakuti akusagamba kulijonanga msyene.

³³ Akusagamba kuputwa ni kunyosyedwa; soni syakwe ngasisimtyoka kose mpaka kalakala.

³⁴ Pakuti wiwu ukusamtendekasya msyene jwamkongwejo kuŵa jwaukali mwamti ngasatenda kose canasa pa lisiku lyakuti amwucisye.

³⁵ Ngisakunda kulipa kulikose, ngasapembeceka atamose mli mculwiye mtuka wamti uli.