Misyungu 5 - Chiyawo Bible

Akalamuce najo jwamkongwe jwacigwagwa

¹ Mwanangu mpikanicisye cenene ya lunda yingumsalilayi, nambo soni mtejele mapikanilo genu ku maloŵe gangu ga umanyilisi.

² Pelepo timcimanyilila ni kuganisya mwakukalamuka soni pakamwa penu tipaciŵeceta yalunda.

³ Pakuti jwamkongwe jwa cigwagwa jwana pakamwa pakulyolyopela mpela uci, soni maloŵe gakwe gakusaŵa gakuŵeŵa mnope kupunda mawuta.

⁴ Nambo mbesi jakwe jili jakuŵaŵa mnope mpela ndulu, jakutema kosekose mpela upanga

⁵ Sajo syakwe sikuselelecela ku ciwa, jwalakwe pakwenda sajo syakwe sikulondola litala lya ku malembe.

⁶ Ngakusasamala ya litala lyakuja ku umi, matala gakwe gali gakupindikapindika nambo msyenejo ngakusayimanyilila kose.

⁷ Sambano ŵanacemwe mumbikanile une, soni kasimliŵalila maloŵe ga mkamwa mwangu.

⁸ Mtalikangane najo jwamkongwe jwamti myoyojo! Atamose kuŵandicila kwene ku mlango wa nyumba jakwe, mkasimŵandicila.

⁹ Pakuti naga mkutenda myoyo, ŵandu ŵane tacimsumula ucimbicimbi wenu umwakwete pandanda, soni mtakuwila m'myala mwa ŵandu ŵangalwe mli ŵacinandipile.

¹⁰ Mwine soni acalendo atakwikuta ni cipanje cenu, soni citukuta ca masengo genu atakulya mundu jwa cilendo.

¹¹ Ni pa mbesi pa umi timcilila mwa ulanda, cilu cenu cosope cili cimasile kwene.

¹² Ni timciti kuti, “Ana ligongo cici naliji jwakuŵengana ni kuwundidwa, mtima wangu nganiwukundaga yakuti jwine mundu anjamuce pa yitendo yangu.

¹³ Nganinapikanila aciŵalimu ŵangu ŵiŵaliji mkunjiganya, nganindejela kose lipikanilo kwa ŵandu ŵiŵambaga misyungu.

¹⁴ Soni panandipe, ngaliji ndili njonasice kwene pasikati pa mpingo wosope.”

¹⁵ M'mweje mesi ga mcisima cenucenupe ni mesi gagogopego gakujilima mu uliŵa wenuwenupe.

¹⁶ Ana ŵanace ŵenu agambeje kuti mbwee posepose, mpela sulo sya mesi gakwamba kwenda m'misewu?

¹⁷ Ŵanacewo aŵe ŵenu jikape, ngaŵa soni aŵeje ŵagaŵana ni acalendo ŵakutama namwe iyayi.

¹⁸ Myoyo ŵamkwenu aŵe ŵa upile, soni mjikutileje ni kusangalala nawo ŵakongwe ŵa ku ucanda wenu.

¹⁹ Jwalakwejo ali jwakusalala mpela mbaŵala, soni jwana ngope jakucimbicika mpela ndandala. Mjikutileje ni maŵele gakwe ndaŵi josope, msangalaleje naco cinonyelo cakwe pa umi wenu wosope.

²⁰ Mwanangu, cakujigalicila ni jwamkongwe jwa cikululu ni cici? Cakumnonyela ni cici kwakumbatila ŵakongwe ŵasyene?

²¹ Pakuti AMBUJE akusalola yitendo yosope ya mundu, jwalakwe akusalolecesya matala gakwe gosope.

²² Yakusakala ya mundu jwakusakala yikusaŵaga citega kwa msyene pejo. Tacitaŵidwa ni ngonji sya ungalumbana wakwe.

²³ Akusawa ligongo lyangapikanila msyungu. Akusajasika ligongo lya usilu wakwe msyene pejo.