Misyungu 4 - Chiyawo Bible

Mbote ja lunda

¹ Ŵanace m'mwe, mpikanile yakumjiganya baba ŵenu. Mtejele mapikanilo genu kuti mpikanicisye cenene ni mpate lunda lwakumanyilila yindu,

² pakuti une ngumpa majiganyo gambone, myoyo mgakumbucileje malamusi gangu, mkasimgaleka kose.

³ Pinaliji mwanace ndili ni baba ŵangu, naliji kamwanace kapamtima ka mama ŵangu. Napali jika, nganaŵeleka jwine.

⁴ Baba ŵanguwo ŵanjiganyisye pakusalila kuti, “Mwanangu, myikamulisyeje mnope mu mtima mwenu yangumsalilayi. Mgasunje malamusi gangu kuti mkole umi.

⁵ Mpate lunda, soni mpate umanyilisi. Mkasimgaliŵalila, soni mkasimtalikangana nago maloŵe ga mkamwa mwangu.

⁶ Mkaluleka lunda, tulucimsunga. Mlunonyeleje, tulucimcenjela.

⁷ Cindu cakupunda mnope kuti mcitende, ni kupata lunda. Mwa yindu yili yose yimkuyisosa kuyipata, patani umanyilisi.

⁸ Mlucimbicisyeje lundalo, nombe nalo tilucimkwesya. Tilucimpa ucimbicimbi pa ndaŵi kamkulukumbatila.

⁹ Tiluciŵika cisoti ca ucimbicimbi kumtwe kwenu; tilucimpa cuma cakusalala ca pa lukosi lwenu.”

¹⁰ Mwanangu, mpikanicisye ni kuyikuya yingumsalilayi, naga mkutenda myoyo, yaka ya umi wenu tiyicitupa.

¹¹ Namjiganyisye mwitala lya lunda soni namlongolele kumlosya litala lya ndamo syambone.

¹² Patimjendeje, ngongolo syenu ngasisigombana, soni naga mkuwutuka, ngasimkuŵala kose.

¹³ Ndaŵi syosope mkumbucileje yamlijiganyisye. Majiganyo genu ni umi wenu, mgasunje cenene.

¹⁴ Mkasimjenda litala lya ŵandu ŵakusakala, soni kasimliŵata sajo syenu petala lya mundu jwakusakala.

¹⁵ Mliŵambale lyele litalalyo, kasimpitamo. Galawukani, mtalikangane nalyo ni mjawuleje kupundanganya pelepo.

¹⁶ Ŵandu wakusakala ŵangagona lugono akaŵe atende cindu cilicose cakusakala basi. Ŵangagona lugono mpaka amtengusye mcilu mundu jwine ni kumkuŵasya basi, nawusimene mtima.

¹⁷ Kutenda yangalumbana ni njojo yikusaŵa mpela cakulya soni cakumwa cawo.

¹⁸ Nambo litala lya ŵandu ŵakulungama lili mpela kumasikusiku kwele kukusaŵa kuli mkulangucilalangucila mpaka palikukwela lyuŵa pa mtwe.

¹⁹ Litala lya ŵandu ŵakusakala lili mpela cipi cakogoya. Ŵandu ŵakusakala akusagwa, nambo ngakusamanyilila kuti cicakuŵesye ni cici pakuti agweje.

²⁰ Mwanangu, mpikanicisye yingumsalila, lipikanilo lyenu mlitejele ku maloŵe gangu.

²¹ Mkasimkunda kuti yangumsalilayi yityoce mu mtwe wenuwo, conde myisunje mu mtima mwenumo.

²² Pakuti yikusapeleka umi ni cilu ca mlama kwa ŵele ŵakusayipatawo.

²³ Mwujangate cenene mtima wenuwo mwakupundanganya pa yosope yamkuyisunga, pakuŵa uliŵa wa umi ukusatyoka mwelemo.

²⁴ Mlece kuŵeceta yindu yakupindika, soni mtalikangane nago maloŵe ga unami.

²⁵ Meso genu galoleje msogolo ni cikulupi cisyesyene, mloleje pasogolo ngagalawukagalawuka.

²⁶ Mganicisyeje cenene kusamalila musikupita sajo syenu, pelepo matala genu gosope tigaciŵa gangakayikasya.

²⁷ Mkasepucila kumlyo kapena ku mciji, kasimjendaga palipose pa cili cindu cilicose cakusakala.