Misyungu 31 - Chiyawo Bible

Maloŵe ga Lemuele

¹ Aga ni maloŵe ga Lemuele jwa ku Masa giŵamjiganyisye mamagwe.

² Ana cici, mwanangu? Ana cici, mwanace jwa mlutumbo mwangu? Cici, mwanangu junampatile mwakwaŵenda AMBUJE* pakutenda cilanga.*

³ Mkasim'malila macili genu mwa acakongwe, mwanangu Lemuele, mkasimjendaga nawo jemanjaji pakuti akusiŵajonanga atamose ayimwene.

⁴ M'mwe Lemuele mwanangu, mwenye ngamkuŵajilwa kumwa finyo, ŵakulamula akasakumbilaga yakumwa ya ukali.

⁵ Kogopela kuti atakuliŵalila malamusi ga cilambo, ni kutanda kulamula mwakwaliŵatila ŵandu ŵakulaga.

⁶ Mundu jwali ciŵandika kuwa, mumpeje cakumwa ca ukali, soni mundu jwali pa yisawusyo yakogoya, mumpeje finyo.

⁷ Amwe kuti aliŵalile ulanda wakwe, akasakumbucila soni kulaga kwakwe.

⁸ “Mwaŵeceteleje ŵandu ŵangapakombola kuliŵecetela acimsyenepe, soni mwaŵeceteleje mtendele wawo wa ŵandu ŵa masije.

⁹ Mŵeceteje ni kulamula mwa cilungamo. Mwacenjeleje ŵandu ŵakulaga ni ŵa ulanda.”

Jwamkongwe jwa ndamo syambone

¹⁰ Ana nduni jwampaka apakombole kumsimana jwamkongwe jwambone? Ali jwamtengo wakwe kupunda maganga ga mtengo wa penani mnope!

¹¹ Mtima wa ŵamkwakwe ukusiwumkulupilila, soni jwamlumejo ngasasoŵa yindu pa umi wakwe.

¹² Jwamkongwejo akusiŵatendela ŵamkwakwe yindu yambone, ngaŵa yakusakala, masiku gosope ga pa umi wakwe.

¹³ Akusaja kukusosasosa manyunya ni litonji, soni akusakamula masengo ni yala yakwe mwangadandawula.

¹⁴ Akusaja kujigala yakulya yakwe kwakutalika, mpela mwagakusatendela maboti ga ŵandu ŵa malonda.

¹⁵ Akusajimuka kumasikusiku, mkanikuce, kutanda kulinganya yakulya ya ŵandu ŵa mwiŵasa lyakwe, soni kwagaŵanya masengo aciŵali ŵamasengo ŵakwe.

¹⁶ Akusaganicisya ya mgunda, ni kuwusuma, akusalima mgunda wa mpeleya kutyocela ku mbiya syakulipatila msyene pejo.

¹⁷ Akusakamula masengo gakwe mwakulimbangana, ngakusatenda yala lende pakukamula masengo.

¹⁸ Akusamanyilila kuti malonda gakwe tapindule nago, mwamti nyali jakwe ngajikusasima cilo cosope.

¹⁹ Akusalilucila litonji msyene jika, soni akusalipanganyicisya nguwo msyene jika.

²⁰ Ŵandu ŵakulaga akusiŵatendelaga canasa, soni akusiŵapaga cikamucisyo.

²¹ Pati kusisime mnope, ngakusadandawula kose ya ŵandu ŵa pa liŵasa lyakwe, pakuti akusamanyilila kuti wosopewo awete yakuwala yakutukutila mnope.

²² Akusalipanganyicisya msyene jika yakuliwunicila, soni jwalakwejo akusawala yakuwala ya bafuta, soni ya mtengo wa penani mnope.

²³ Ŵamkwakwe akusaŵa ŵakumanyika mnope ku nganya sya m'misinda, pati atemi pasikati ja acakulungwakulungwa ŵa cilambo.

²⁴ Jwele jwamkongweju akusalinganyaga yakuwala ya bafuta ni kuyisumisyaga, akusapeleka soni mipango kwa ŵandu ŵa malonda.

²⁵ Macili ni ucimbicimbi yikusaŵa mpela cakuwala cakwe, akusaganicisya yakusogolo mwakusangalala.

²⁶ Akusaŵeceta mwa lunda, soni akusiŵajiganya ŵandu ni maloŵe gambone.

²⁷ Akusalolela cenene ndamo sya ŵandu ŵa mwiŵasa lyakwe, soni ngakusatenda ulesi amta panandi.

²⁸ Ŵanace ŵakwe akusampocela ni kumkolangaga kuti jwana upile. Ŵamkwakwe nombe nawo akusamlumba.

²⁹ Akusati, “Elo apali acakongwe ŵajinji ŵakusicilila kwabasi, nambo m'mwe mkwapunda wosopewo.”

³⁰ Ngope jakusangalala jikusaloŵesya, soni kusalala kwangalila ugali, nambo jwamkongwe jwakwajogopa AMBUJE ni jwakuŵajilwa kumlomba.

³¹ Mumcimbicisyeje ligongo lya yitendo yakwe, masengo gakwe gampeje ucimbicimbi ku nganya.