Misyungu 30 - Chiyawo Bible

Maloŵe ga Aguli

¹ Aga ni maloŵe ga Aguli, mwanace jwa Yake: “Mlungu nganaŵa ni une, Mlungu nganaŵa ni une, Mwakuti jwangali cikamucisyo cilicose.

² Nditu, une ndili mundu jwakuloŵela kupunda ŵandu wosope, jwangali lunda lwakupikanicisya yindu cenene mpela mwakutendela ŵandu ŵane.

³ Nganinalijiganya kuti manyilile kuti lunda ni cici, soni nganingola umanyilisi wakwamanyilila AMBUJE* Ŵaswela ŵala.

⁴ Ana nduni juŵakwesile kwinani ni kuwujako? Nduni juŵajipakete mbungo m'myala? Nduni juŵaŵijilile mesi m'cakuwala? Nduni juŵatamilisye mtepa wosope wa cilambo capasi? Lina lyakwe nduni, soni lina lya mwanagwe nduni?

⁵ “Maloŵe galigose ga Mlungu gali gakuwona; jwalakwe ali cakulicinjilicisya kwa ŵandu wosope ŵakusatilila kwa jwalakwe.

⁶ Mkasimjonjecesyaga cilicose pa maloŵe gakwe, kogopela kuti amta kumjamuka, ni mtakusimanikwa kuti mli jwa unami.”

Misyungu jine

⁷ AMBUJE, une ngumŵenda yindu yiŵili, kasimunjima yeleyo mkanimbwe:

⁸ Mundyocesye kwa une kuŵa mundu jwa unami kapena jwa mabosa, kasimumba usawuci kapena kusicila mnope, nambo lisiku ni lisiku mundisyeje cakulya cakuŵajilana ni une.

⁹ Kogopela kuti ndakwikuta mnope ni kutanda kwakana ŵalakwe, njitiji kuti, “AMBUJE ni ŵani soni?” Kogopela soni kuti ndakuŵa jwakulaga, ni kutanda kwiŵa, pakuti kutenda myoyo kuli kulisakasya lina lya Mlungu jwangu.

¹⁰ Mkasimumlambucisya jwamasengo kwa ambujegwe, kogopela kuti atakumlwesa, ni m'mwejo mtakusimanikwa kuti mli ŵakulemwa.

¹¹ Pana ŵandu ŵane ŵakusiŵalwesaga baba ŵawo, soni ngakusiŵajaliwasya mama ŵawo.

¹² Pana ŵandu ŵane ŵakusaliŵajisya kulitenda mpela ŵaswela mtima, nambo citamileco nganaswejesyedwe ku yakusakala yawo.

¹³ Pana ŵane ŵakusalikwesya kwabasi, akusaliŵajisya kulitenda mpela ŵambone mnope.

¹⁴ Pana ŵandu ŵane ŵele meno gawo gali mpela mawupanga, soni meno gawo gali mpela yipula, kuti ŵalye ŵandu ŵakulaga kwatyosya pa cilambo capasi, soni kuti ŵatyosye ŵandu ŵakulaga pasikati pa acimjawo.

¹⁵ Lisundo likwete ŵanace ŵacakongwe ŵaŵili, ŵanacewo akusatamila kulila acitiji, “Mtupe camti, mtupe camti!” Pana yindu mcece yangayikusati kuti, “Basi tujikwite”:

¹⁶ Malembe, ŵakongwe ŵajumu, cilambo cejumu cacikusosa ula, ni moto wakwambaga kulikolelela uli mkuja pasogolo.

¹⁷ Mundu jwalijose jwakusiŵasekaga babagwe, kapena kunyosya pangapikanila mamagwe, akwenela kuti makungulu gakwitinji gamkolotole meso, kapena galilidwe ni matumbusi.

¹⁸ Pana yindu yitatu yayikusasimonjesya kwabasi, yindu mcece ngangusayipikanicisya cenene:

¹⁹ Mucikusagulucila cijuni ca nyanga mwinani, mulikusajendela lijoka pa lwala, mulikusajendela liboti pa nyasa jakusokoka mnope, soni litala lya jwamlume pati atemi ni mwali.

²⁰ Amu ni mwakusatendela jwamkongwe pati atesile msangu, akusati mkulyamo ni kupukuta pakamwa, ni kuŵecetaga kuti, “Pangali cakulemwa cindesile.”

²¹ Pana yindu yitatu ciyikusatetemela nayo cilambo: pana yindu mcece yele cilambo ngaŵa mkupakombola kupilila nayo.

²² Kapolo pati asyucile mwenye, ni cisilu pati cijikwite.

²³ Jwamkongwe jwakunyosyeka pati alombedwe, soni pati mwali jwamasengo asumwile liŵasa lya ambujegwe.

²⁴ Pana yindu mcece yayinandinandi pa cilambo capasi, nambo yili yakalamuka kwakupundanganya:

²⁵ Mbamba sili mpela ŵandu ŵangali macili, nambo sikusalinganyicisya cilepe yakulya yakwe m'cawu.

²⁶ Njecele sili mpela ŵandu ŵangali macili, nambo sikusalinganya nyumba syakwe mkati mwa maganga.

²⁷ Sombe nganijikola mwenye, nambo syosope sikutama m'mipingo pakwenda.

²⁸ Pulundwe komboleka kumkamula m'myala, nambo akusatama m'majumba ga ayimwene.

²⁹ Pana yindu yitatu yayikusajenda mwamacili, cinyacinya: pana yindu yitatu yayikusajenda mwakupocela:

³⁰ Lisimba lyalikwete macili kupunda yinyama yosope, soni ngalikusatila cinyama cilicose.

³¹ Tambala jwakwenda mwamacili, cinyacinya, ni tonde, soni mwenye jwakwenda mtima uli m'malo pasikati ja ŵandu ŵakwe.

³² Naga mŵele mli mkuliloŵesya mwasyene ni kulikwesya, pane mŵele mli mkuganicisya yakusakala, mtande kaje kwima, mganicisye cenene!

³³ Pakuti pakuminya mkaka, mawuta gakusajenjeka, pakuminya lupula, miasi jikusakopoka, soni pakukoposya ukali, njojo sikusawoneka.