Misyungu 3 - Chiyawo Bible

Msyungu kwa ŵanace

¹ Mwanangu, mkaliŵalila majiganyo gangu, nambo mgasunje malamusi gangu mu mtima mwenu.

² Pakuti naga mkutenda yeleyi, masiku ni yaka ya umi ŵenu tiyicitupa, soni timcitama ni umi wambone mnope.

³ Ndamo ja kulipeleka ni kulupicika kasimkunda kuti yimtyocele, ndamo syelesi mjendeje nasyo mpela yila mwakusamtendelaga ni cuma ca pa lukosi lwenu.

⁴ Naga mkuyitenda yeleyi, Mlungu ni ŵandu taciŵa ŵakusangalala namwe soni timcikola mbili jambone.

⁵ Mwakulupilileje AMBUJE ni mtima wenu wosope, mkasimgambaga kulupilila pa lunda lwenupe mciganisyaga kuti mkusamanyilila.

⁶ Myindu yosope yamkusitenda, mkumbucileje kwiticisya kuti kusa kuno kwana Mlungu, jwalakwejo ni jutacigagolosya matala genu.

⁷ Mkasimganisyaga mwasyene kuti mli ŵalunda kupundanganya ni mumŵelele, mwajogopeje AMBUJE* soni myiŵambaleje yindu yakusakala, ngayitenda.

⁸ Naga mkutenda yeleyi, timciŵa mpela mtela wambone wakuposya ni kupeleka umi wambone ku cilu cenu nambo soni kutyosya kupweteka ni kulimbikasya mawupa genu.

⁹ Mwacimbicisyeje AMBUJE ni yipanje yenu soni ni yisogosi yandanda kugowola mu mgunda mwenu yosope.

¹⁰ Naga mkuyitenda yeleyi, ngokwe syenu tisicigumbala ni yindu yejinji, nambo soni timcikola finyo jwejinji jwakusoŵa pakutaga.

¹¹ Mwanangu, mkasimcinyosya cilango ca AMBUJE, soni mkapela ni camuko cakwe.

¹² Pakuŵa AMBUJE akusamwunda mundu jwele jwakusamnonyela, mpela mwakusatendela baba pakumwunda mwanagwawo jwakusamnonyela.

¹³ Jwana upile mundu jwapatile lunda, jwapatile lunda lwakupakombola kupikanicisya cenene yindu.

¹⁴ Pakuŵa mbote ja lunda jili jakupunda mbote ja silifa,* soni jili jakupindulisya mnope kwenumwe kupunda golidi.*

¹⁵ Lunda luli lwakupunda maganga ga mtengo wa penani, pangali cindu cakucikumbila m'mwejo cakulandana ni lunda.

¹⁶ Lunda lukusapeleka umi welewu, nambo soni cipanje ni ucimbicimbi.

¹⁷ Lunda lukusamlongolela m'matala gakusangalasya, ni kumjendesya mu mtendelepe basi.

¹⁸ Lunda luli mpela citela cakupeleka umi kwa ŵandu ŵakusalukamulisya masengo. Ŵana upile ŵele ŵakusalukamulisya masengo mnope lundalo.

¹⁹ AMBUJE ŵapanganyisye cilambo capasi ni lunda, piŵapanganyisye cilambo cakwinani ŵalosisye lunda lwa kupikanicisya cenene yindu.

²⁰ Kutyocela kwakusokoka kusi kwene kwa cilambo jwalakwe ŵagawulisye mesi, nombe nago mawunde gagwisisye ula. Pakuyitenda yeleyi, ŵalosisye lunda lwakumanyilila yindu.

²¹ Mwanangu, mlusunje lunda lusyesyene nambo soni ndamo jenu jwakupakombola ganicisya cenenepe ya kusogolo. Mkakunda kuti yele yindu yiŵiliyi yimtile.

²² Yeleyi tiyicimpa umi, tiyicimpa umi wakusangalasya ni wakondwa.

²³ Pelepo timcijenda mwitala lyenu mwangajogopa soni ngasimkuŵala kose.

²⁴ Ndaŵi jimkutama pasi, ngasimtenda woga; pa ndaŵi jimkuja kukugona, timcigona lugono lwakunong'a.

²⁵ Mkasimjogopaga yindu yakogoya yakwika mwacisisimucila, atamose yakusakala yayikusiyayicilila ŵandu ŵakusakala, mkasimtendaga nayo woga.

²⁶ Pakuti AMBUJE ni ŵitacimlimbikasya m'mwejo, soni taciliŵambasya lusajo lwenu kuti lukatanjila.

²⁷ Mkasimleka kwatendela yambone ŵele ŵali ŵakuŵajilwa kupocela yambone, pa ndaŵi jimkwete macili gakuti mpaka mpakombole kuyitenda yeleyi.

²⁸ Mkasimumsalila mjenu kuti, “Pepani, mkawuje soni malaŵi tinjimpa” nambo kutendaga pa jele ndaŵijo ni mli mkwete yindu yakuti nikumkamucisya nayo mjenujo.

²⁹ Mkasimumtendelaga wiwu pane malindi mnasi jwenu jwakusatama ciŵandika mwakumkulupilila m'mwejo.

³⁰ Mkasimkangana ni mundu pangali ligongo, pali pangali cakusakala cilicose camtendele m'mwejo.

³¹ Mkasimlagaga najo mu mtima mwenu mundu jwa ciwawa, soni kasimlinga kujigalila ndamo syakwe.

³² Ligongo AMBUJE akusaŵengana ni mundu jwakusakala, nambo ŵandu ŵakulungama akusiŵaŵika m'likuga lya ŵandu ŵakwe ŵakusiŵakulupilila.

³³ AMBUJE akusalwesa nyumba ja ŵandu ŵakusakala, nambo akusapeleka upile malo gakutama ŵandu ŵakulungama.

³⁴ Jwalakwe akusiŵanyosya ŵandu ŵakunyosya, nambo ŵandu ŵakulitulusya, akusiŵasalalila mtima.

³⁵ Ŵandu ŵalunda tacipocela ucimbicimbi, nambo yisilu taciyitesya soni.