Misyungu 28 - Chiyawo Bible

Ya mundu jwakusakala mtima

¹ Mundu jwakusakala mtima akusagamba kutila jika, atamose pali pangali jwakumtoposya, nambo ŵakulungama ali ŵakulimba mtima mpela lisimba.

² Naga cilambo citesile yakwimucila, nombe ŵakucilamulila akusatupa, nambo naga ŵandu ali ŵakupikanicisya yindu cenene ni ŵakumanyilila yindu, cilamboco cikusatamilicika pa mtendele mu ndaŵi jelewu.

³ Mundu jwakulaga jwakusiŵatendela ngalwe ŵandu ŵakulaga acimjakwe, ali mpela ula jejinji jajikusagamba konanga yakulya.

⁴ Ŵandu ŵangakusapikanila malamusi, akusanonyela kwalumba ŵandu ŵakusakala mtima, nambo ŵandu ŵakugakuya malamusi akusasisyana nawo.

⁵ Ŵandu ŵakusakala mtima ngakusapikanicisya cenene kuti cilungamo ni cici, nambo ŵandu ŵakusatenda lisosa lya AMBUJE* akusacipikanicisya cilungamo kusyesyene.

⁶ Mundu jwakulaga jwakusajenda mwakulungamika ali cenene, kupunda mundu jwakusicila nambo ali jwangakulupicika.

⁷ Mundu jwakusagakuya malamusi ali mwanace jwalunda, nambo mundu jwakusajenda ni ŵandu ŵakutunduka, akusiŵatesya soni babagwe.

⁸ Mundu jwakusajonjecesya kusicila kwakwe pakongosya yipanje yakwe mwakatapila, akusagamba kwasunjila cipanje ŵandu ŵitacatendela canasa ŵandu ŵakulaga.

⁹ Mundu naga ali mkana kugapikanila malamusi, atamose lipopelo lyakwe lyene likusilyanyalaya AMBUJE.

¹⁰ Mundu jwakusiŵasokonesya ŵandu ŵambone kutenda yakusakala, tacigwa mwisimbo lyakwe lyene, nambo ŵandu ŵamkanakola magongo, tacipocela mbote jambone kutyocela kwa Mlungu.

¹¹ Mundu jwakusicila akusalitenda jwalunda, nambo mundu jwakulaga jwakupikanicisya yindu cenene, akusamkopocela.

¹² Pati ŵandu ŵambone apundile, ŵandu akusasangalala mnope, nambo ŵandu ŵakusakala pati apatile ulamusi, ŵandu akusatama mwa woga.

¹³ Mundu jwakusasisa ulemwa* wakwe ngasapata upile, nambo mundu jwakusapesya ulemwa ni kuwuleka, tacitendeledwa canasa.

¹⁴ Jwana upile mundu jwakusaŵa jwakwajogopa AMBUJE ndaŵi josope, nambo mundu jwakujumusya mtima wakwe tacigwa mu yisawusyo.

¹⁵ Mpela mwalikusatendela lisimba lyakubangula, pane cilombo cakogoya, ni myoyo peyo soni mwakusatendela mcimwene jwakusakala mtima kwa ŵandu ŵakulaga.

¹⁶ Mundu jwakulamula jwakakusapikanicisya cenene yindu, akusaŵa jwa ngalwe kwakogoya, nambo mundu jwakusaŵengana ni cinyengo tacilamula kwa ndaŵi jelewu.

¹⁷ Mundu jwaleŵile magambo ga kuwulaga mundu mjakwe, alisolele msyene pejo lilembe, taciŵa jwakutilatila umi wakwe wosope mpaka ciwa cakwe.

¹⁸ Mundu jwakusajenda mwakulupicika tacikulupuka, nambo mundu jwangatenda mwagoloka tacigwa mwisimbo.

¹⁹ Mundu jwakulima mu mgunda wakwe tacikola yakulya yejinji. Nambo mundu jwakwamba kuya yindu yangali mate, tacilaga kwakogoya.

²⁰ Mundu jwakulupicika tacikola upile gejinji, nambo mundu jwakupunda kusacilila mnope kusicila mwacitema, ngasalepela kupocela cilango.

²¹ Nganiciŵa cindu cambone kulosya lusagu, pakuti ŵandu ŵane akusalemwa, ligongo lya kaduswa kamnono ka mkate.

²² Mundu jwa ubayili akusapunda mnope kusacilila kuti asicile mwacitema, nambo ngakusamanyilila kuti ulanda tiwucimsimana.

²³ Mundu jwakusamjamuka mjakwe, panyuma pakwe taciŵa jwakunonyelwa mnope ni mjakwejo, kulekangana ni mundu jwa maloŵe gakanyengano.

²⁴ Mundu jwakusiŵajiŵila babagwe ni mamagwe, acisalaga kuti kutenda myoyoko nganikuŵa kulemwa, jwalakwejo ali mjakwe jwa mundu jwakonanga.

²⁵ Mundu jwakusuka akusatandisya njojo, nambo mundu jwakusiŵakulupilila AMBUJE tacisicila.

²⁶ Mundu jwakusagamba kupikana yajikape basi ali cisilu, nambo mundu jwakusakuya yalunda yakusamsalila acimjakwe tacikulupuka.

²⁷ Mundu jwakusapeleka cikamucisyo kwa ŵandu ŵakulaga, ngasasoŵa kandu, nambo mundu jwakusisa ngope jakwe melepe ni kulolaga kumbali jine kuti akawona ŵakulagawo, ŵandu ŵajinji tacimlwesa.

²⁸ Ŵandu ŵakusakala pati apatile ulamusi, ŵandu akusajuŵa ligongo lya woga, nambo ŵandu ŵakusakalawo pati ajonasice, ŵandu ŵambone akusatupa ni kusimana cenene.