Misyungu 27 - Chiyawo Bible

¹ Mkapocela ya malaŵi, pakuŵa ngamkuyimanyilila yitiyicitendekwa pa lyele lisikulyo.

² Mwaleceni ŵandu ŵane amlumbe, ngaŵaga m'mwe mwasyene jika ni pakamwa penu, bola mundu jwamkakumanyigana najo amlumbe, nambo ngaŵa mwasyene jikape.

³ Liganga likusasitopa, nombe nawo mcenga ukusasitopa kwabasi, nambo makani ga cisilu gakusasitopa kupunda yosope yana yiŵiliyo.

⁴ Kutumbila kukusakutendekasya ugwe kuŵa jwa ngalwe, kupya mtima kukusakutendekasya yindu yakogoya.

⁵ Kumjamuka mundu pambalambanda kuli kwambone, kulekangana ni kusisa cinonyelo ciwukwete.

⁶ Kuli kwambone kukujamuka acimjakwe ligongo lyakukunonyela atamose yikupwetece, kulekangana ni cinyengo ca m'magongo jwakwe jwakukukomasya pa ngomo.

⁷ Mundu jwajikwite, atamose uci ukusiwum'nyalaya, nambo kwa mundu jujimkwete sala, ni yakuŵaŵa yose yikusalyolyopela.

⁸ Cisawu cijuni cakusokonecela kwakutalika ni kwacili cisusi cakwe, myoyo peyo soni ni mundu jwasokonecele kwakutalika ni kumangwakwe.

⁹ Mawuta gakununjila gakusigasangalasya umi wa mundu, nambo umbone wa m'mbusangagwe ugonile pa msyungu wambone wakusakupa.

¹⁰ Mkamjasa mjenu, ni ajawo ŵa baba ŵenu, soni mkasimjawula ku nyumba ja mlongo mjenu kukuŵenda cikamucisyo pa lisiku lya yisawusyo yenu. Mjenu jumkutama najo pakuŵandika ali jwakusosekwa kupunda mlongo mjenu jwali kwakutalika.

¹¹ Mwanangu, mŵe ŵalunda, ni msangalasye mtima wangu, kuti nipakombole kumjanga jwele mundu jwakusanyosya unejo.

¹² Mundu jwakalamuka akusati mkuciwona cindu cakogoyamo akusajuŵa, nambo jwakuloŵela akusagamba kupelenganya ni akusasimana ni yipwetesi ni kuligamba.

¹³ Mumsumule cakuwala ca mundu jwakumtendela umboni wa ngongole mundu jwa cilendo, soni mumkamule msyenepejo naga akumpelecela cikole mlendo jwangamanyika.

¹⁴ Mundu jwakumkomasya mjakwe mwagumila kundaŵindaŵipe, ŵandu taciganicisya kuti atenda kumlwesa.

¹⁵ Jwamkongwe jwa lisegwe ali mpela ula ja kawombe.

¹⁶ Kumlekasya jwamkongwe jwamti myoyojo, kuli mpela kulinga kujilekasya mbungo.

¹⁷ Cisyano cikusaŵatika cisyano cijakwe, myoyo soni nombe najo mundu akusasyana mundu mjakwe.

¹⁸ Mundu jwakusacisamalila cenene citela ca mkuju, tacilya yisogosi yakwe, myoyo peyo soni mundu jwakusiŵalolela cenene ambujegwe tacipocela ucimbicimbi.

¹⁹ Cisawu ciwilili ca ngope ja mundu cikusawoneka m'mesi, myoyo peyo soni mtima wa mundu ukusamanyika ni yitendo yakwe.

²⁰ Ciwa ni malembe yangajikuta, nombe nago soni meso ga mundu ngigakusajikutila.

²¹ Golidi* ni silifa* yikusalinjidwa ni moto, nambo mundu akasamanyika cenene malinga ni mbili jakwe.

²² Cisilu atamose kucitwa ni mwisi mwituli pampepe ni yimanga, nambo kuloŵela kwakwe ngasikutyoka kose.

²³ Msimanyilile cenene ngondolo syenu musiŵelele, nambo soni myisamalile cenene yilangwa yenu.

²⁴ Pakuŵa cipanje cikusamala. Ana ucimwene ngawukusasamala mpaka mipago josope ja pasogolo?

²⁵ Pati manyasi gamasile, msonde ni kusipuka, soni ŵandu ali acuŵile manyasi gosope ga ku matumbi.

²⁶ Ŵanace ŵangondolo tacimkamucisya kumpa cakuwala kutyocela ku manyunya gakwe, soni pakusumisya mbusi timcipata cakusumila mgunda.

²⁷ Timcikola mkaka wejinji wa mbusi kuti m'mweje, m'mwejo ni liŵasa lyenu, soni ni ŵamasengo ŵenu wosope.