Misyungu 26 - Chiyawo Bible

¹ Mpela matalila pa ndaŵi ja cuku kapena ula mu ndaŵi jakugowola, myoyo soni ucimbicimbi ukusiwumlundukwa mundu jwali cisilu.

² Mpela mucikusatendela cijuni ca mpelenganya paguluka, mpela mucikusatendela ciŵaleŵale pakwambaga kuti syungulisyunguli, myoyo soni ni mukusaŵela kulwesa kwakuli kwangali ligongo, myoyo pangali ca mpaka kutenda kulwesako.

³ Cikoti cikuŵajilana ni kujikwapulila haci, soni cisyano cikuŵajilwa mkamwa mwa bulu, ni myoyo peyo soni kuti simbo jili jakuŵajilana ni kwapulila pa mgongo pa yisilu.

⁴ Mkacijangaga cisilu mu usilu wakwe, kogopela kuti mtakulandana naco.

⁵ Nambo mcijanje cisilu mwangacisisila usilu wakwewo, kuti cikasiciganisyaga kulitenda jwalunda.

⁶ Mundu jwakusacituma cisilu kuja kusala utenga, akusatenda mpela kulikata lusajo lwakwe, soni akusaliŵilanjila yisawusyo.

⁷ Mpela ngongolo sya mundu jwamlemale, sikusaŵa syangali masengo, ni myoyo soni mwawukusaŵela msyungu mkamwa mwa yisilu.

⁸ Mpela mundu jwakusataŵilila liganga m'ciwunu, myoyo peyo soni mundu jwakusacicimbicisya cisilu.

⁹ Mpela mujikusatendela miŵa jajisomile m'myala mwa mundu jwakolelwa, myoyo soni ni muwukusaŵela msyungu mkamwa mwa cisilu.

¹⁰ Jwele jwakusamlemba masengo mundu jwakuloŵela jwagambaga kulijendela kapena jwakukolelwa. Ali mpela mundu jwakusasoma mpamba jwele jwakusagamba kwasoma wamba ŵandu.

¹¹ Jwakuloŵela jwakusawilisyawilisya yakuloŵela yakwe ali mpela m'mbwa jajikusawujawuja soni kuja kulya matapisi gakwe.

¹² Ana mum'weni mundu jwakusaliwanicisya kuŵa jwalunda nambo ali jwangamanyilila, bola soni cisilu mwine kuŵa mkola cembeceyo kulekangana ni jwele mundujo.

¹³ Mundu jwaulesi akusati, “Eee! Kwana lisimba kusako, kwana lisimba likwamba kwendajenda mu msewomo.”

¹⁴ Mpela litanga likusagalawucila aku naku m'mayinjesi gakwe, myoyo peyo soni ni mwakusatendela mundu jwaulesi, akusagambaga kutamila kuligalawusya pa cindanda cakwe.

¹⁵ Jwaulesi pati apisisye mkono wakwe mu mbale, ukusamsitopa kulepela kuti awucisye uyicile kukamwa kwakwe.

¹⁶ Mundu jwaulesi akusalinyenga kulitenda jwalunda, kupunda ŵandu msano ni ŵaŵili ŵampaka apakombole kwanga mwakalamuka.

¹⁷ Mundu jwakusagamba kwinjilila nawo mu ndewo jamkanijimŵandika kose, ali mpela mundu jwakwamba kulijigalila m'mbwa jajigamba kulijendela pakujiwutaga mapikanilo.

^18-19 Mpela mundu jwa masoka jwakusagamba kuponya malamba gamoto pane mipamba jakogoya, ni myoyo peyo soni mwakusaŵela mundu jwakwanyenga acimjakwe pakutiga, “Iyayi, ngambileje kwelegula!”

²⁰ Moto ukusasima naga sasu sisoŵile, myoyo soni ku malo kwele kuli jwa unami kukusaŵa kwangali ya ndewo.

²¹ Mpela mwagakusaŵela makala pa moto wakutuka, ni myoyo peyo soni mwakusaŵela mundu jwandewo pakutandisya unami.

²² Maloŵe ga mundu jwa mabosa gali mpela yakulya yakunong'a, yikusatulucila m'matumbo yosope mwacitemacitema.

²³ Mpela mwacikusaŵela ciŵiga cemale mwakucinyesimisya cenene, ni m'momo pemo soni mwagakusaŵela maloŵe ga unami, gakusasisa ngalosya mtima wakusakala.

²⁴ Mundu jwa uŵengani pakamwa pakwe pakuŵeceta yindu yambone, nambo mu mtima mwakwe muli mwana ya unami.

²⁵ Mundu jwamti myoyo pati aciŵecetaga mwakunonyelesya maloŵe, mkamkulupilila kose, pakuŵa mu mtima mwakwe mugumbele yakusakala msano ni yiŵili.

²⁶ Atamose asise uŵengani wakwe mwakalamuka camtuli, nambope kusakala kwakweko tikuciwonecela pakulanguka pasikati ja ŵandu.

²⁷ Mundu jwakusasola masimbo tacigwilamo msyene pejo, soni mundu jwakusatandisya kwatutila ŵane liganga, licimnyikata msyene pejo.

²⁸ Mundu jwa unami akusaŵengana ni ŵele ŵandu ŵakusiŵalambucisyawo, soni pakamwa pakuŵeceta maloŵe gakunyenjelela pakusajonanga.