Misyungu 25 - Chiyawo Bible

Misyungu jine ja Solomoni

¹ Aji soni jili misyungu ja Solomoni jiŵalembile ŵandu ŵa Hesekiya, mwenye jwa ku Yuda.

² Uli ucimbicimbi wa AMBUJE* kusisa yindu, nambo ucimbicimbi wa ayimwene ugonile pa kuyisosasosa yinduyo ni kuyilondesya cenene.

³ Mpela yila mukuŵelele kwiwunde kutalika, ni muciŵelele cilambo capasi kusokoka, ni musiŵelele soni nganisyo sya mwenye, ngasikusamanyika kose.

⁴ Mtyosye yakusakala mu silifa,* pelepo fundi tamanyilile yitajile pakupanganya cida.

⁵ Mwatyosye apungu ŵakusakala mu nganya ja mwenye, pelepo wele ucimwenewo tiwucitamilicika pa cilungamo.

⁶ Mkasimlikwesyaga naga mtemi pameso pa mwenye, pane kutama pa malo ga ŵandu ŵa penani.

⁷ Pakuti kuli kwambone kusalilidwa kuti, “Myice, mtame penani pano,” kulekangana ni kuti atende kukutulusya pasi ligongo lya mundu jwine jwapenani jwakupunda ugwejo.

⁸ Yimyiweni ni meso genu, mkasimjanguya kuja nayo ku nganya ja magambo, ligongo timcitenda uli pambesi pakwe, naga mjenu jwakwimbana najo magambojo cikole umboni wakumsisya mwakutesya soni.

⁹ Naga mli mkwete magambo ni mjenu, ŵecetanani najo mjenujo mwasyene, kasimlumukula kose yindu ya asili ya mundu jwinepe,

¹⁰ kogopela kuti jwine jwakugapikana maloŵe genu, atakumtesya soni, pelepo mbili jenu jakusakala ngasijimala.

¹¹ Maloŵe gampepe gakuŵecetedwa mwakwenela, gali mpela yakusalalicisya ya golidi* mciselo ca silifa.

¹² Kwa mundu jwakupikanicisya cenene, kwamuka mwalunda kuli mpela mbete ja golidi, pane cakusalalicisya cine cambone mnope ca golidi.

¹³ Mpela mesi gakusisima cenene pa ndaŵi ja citukuta, yalumo soni ali jwamtenga jwakulupicika kwa ŵandu ŵamtumile, elo, akusasisimisya umi wa acambujegwe.

¹⁴ Mpela mawunde ni mbungo pangali ula, yalumo soni ni mundu jwakupocela mtuka wangakusawupeleka kose.

¹⁵ Mtawu ni kupilila yikusamkanganicisya jwakulamula kupembeceka kuti akupikanile, soni maloŵe gakuweŵa gakusatemangula liwupa.

¹⁶ Naga msimene uci, mlye nambo ngaŵa mwakupelenganya mpimo, kogopela kuti mtakululilwa nawo ni kutanda kutapika.

¹⁷ Ku nyumba kwa ajenu mpitejeko mwakamokamo, kogopela kuti atakupela namwe, ni kutanda kuŵengana namwe.

¹⁸ Mundu jwakumtendela mlongo mjakwe umboni wa unami, ali mpela simbo, pane upanga kapena mpamba wakutema.

¹⁹ Kulupilila mundu jwangakulupicika mu ndaŵi ja yisawusyo, kuli mpela kulya ni lino lwakupweteka pane kwenda ni lusajo lwakutundajila.

²⁰ Mundu jwakusamjimbila nyimbo mundu jwamsitopelwe mu mtima mwakwe ni canasa, ali mpela mundu jwakuwula malaja pa mbepo, soni mpela kutaga finyo jwamcesuce peŵanga.

²¹ Naga m'magongo jwenu jimkwete sala, mumpani yakulya, naga jimkwete njota, mumpani mesi gakumwa.

²² Pakutenda myoyo timcimtesya soni, nipo AMBUJE tacimpa mbote.

²³ Mbungo ja mpoto ni jikusayikasya ula, myoyo soni msece ukusayicisya kutumbila.

²⁴ Kuli kwambone kutama pa ndumba penani pa msakasa, kulekangana ni kutama m'nyumba pampepe ni jwamkongwe jwa lisegwe.

²⁵ Mpela mesi gakusisima kwa mundu jwajimkwete njota, myoyo soni utenga wambone wakutyocela ku cilambo cakutalicila.

²⁶ Mpela uliŵa wawugumbele ni matope, kapena cisima ca mesi gesakala, myoyo soni ni mundu jwambone jwakusakunda yakusaka ya ŵandu ŵakusakala.

²⁷ Ngaŵa yambone kulilisya mnope uci wejinji, myoyo mkalamuce nago maloŵe gakuyamicila.

²⁸ Mundu jwangawukamula mtima wakwe, ali mpela msinda wepasulidwe ni amagongo ni kuwuleka uli wangali mapupa gakucinjilicisya.