Misyungu 24 - Chiyawo Bible

Kuŵeceta kwa 20

¹ Mkatendelaga wiwu ŵandu ŵakusakala, pane kumbila kuti mpikangananeje nawo.

² Ligongo mitima jawo jikusaganicisya ya ndewo, soni ngomo syawo sikusaŵeceta ya unami basi.

Kuŵeceta kwa 20

³ Nyumba jikusataŵidwa ni ŵandu ŵalunda, soni jikusatamilicika ni ŵandu ŵa mtima wakwapikanicisya cenene yindu.

⁴ Kupitila mu umanyilisi mundu mpaka apakombole kugumbasya yipinda yakwe, ni cipanje cosope cakusosekwa mnope ni ca mtengo wapenani.

Kuŵeceta kwa 21

⁵ Mundu jwalunda ali jwamacili, kupunda mundu jwamangolomela, mundu jwamlijiganye akusampunda mundu jwamacili.

⁶ Pakuti kupitila mwa msyungu wa lunda lwambone, mpaka mpakombole kuputa ngondo, naga atupile apungu, kupunda kukusaŵa papopo.

Kuŵeceta kwa 22

⁷ Lunda luli lwakutalicila camnope kwa cisilu, mu nganya ja magambo, ngakusawunukula kose pakamwa kuŵeceta cilicose.

Kuŵeceta kwa 23

⁸ Mundu jwakusaganicisya kutenda cindu cakusakala tacikolanjidwa jwakwimucila.

⁹ Ganicisya kutenda yakusakala uli ulemwa, soni mundu jwakunyosya akusiŵanyalaya ŵandu.

Kuŵeceta kwa 24

¹⁰ Naga ukwasa mtima pati usimene ni yisawusyo, ni kuti ugwejo macili gakwe gakunandipa.

Kuŵeceta kwa 25

¹¹ Mwakulupusye ŵandu ŵakujigalidwa kuti akape. Ŵele ŵakujigalidwa kuti akawulajidwe, mkasimleka kwacenjela.

¹² Naga mkuti, “Uwe nganitumanyililaga yeleyi,” Ana jwakusamulika ya mu mtima, ngakuyiwona yeleyi? Ana jwakusalolela umi wenu ngakumanyilila? Ana ngasamwucisya mundu yitendo yakwe malinga ni masengo gakwe?

Kuŵeceta kwa 26

¹³ Mwanangu, yikani mlyeje uci, pakuti uli wambone, soni mesi gakusulula m'masyega gakusanong'a kwabasi kugapasya.

¹⁴ M'manyilile kuti lunda luli lwambone ku umi wenu; naga mlusimene, yindu tiyicimjendela cenene msogolo.

Kuŵeceta kwa 27

¹⁵ Mkasimjuŵilila nyumba ja mundu jwambone, kutenda ya ciswamba mpela mwakusatendela mundu jwakusakala, kasimputa kose ngondo pa nyumba jakwe.

¹⁶ Mundu jwambone akusagwa kasano ni kaŵili ni akusajimuka soni, nambo ŵandu ŵakusakala yisawusyo yikusiyagwila.

Kuŵeceta kwa 28

¹⁷ Mkasimsengwaga naga m'magongo jwenu asimene ni yisawusyo, mtima wenu kasiwusangalalaga pati akuŵele jwalakwejo.

¹⁸ Naga mkutenda myoyo AMBUJE taciwona ni kunyalayidwa nayo, ni tacileka kumtumbilila m'magongo jwenujo.

Kuŵeceta kwa 29

¹⁹ Mkasimlagasikaga mu mtima mwenu ligongo lya ŵandu ŵakutenda yakusakala, mkasimdandawula nawo ŵandu ŵakusakala.

²⁰ Pakuti mundu jwakusakala pangali yitiyicimjendela pasogolo pakwe, umi wa ŵandu ŵakusakala taciwusimisya mpela nyali.

Kuŵeceta kwa 30

²¹ Mwanangu, mwajogopeje AMBUJE nambo soni mwenye, mkasimkamulana nawo ŵandu ŵakusaka kwajimucila.

²² Pakuti AMBUJE nambo soni mwenye tacagwicisya jemanjajo yisawusyo mwangajembecela. Soni, ana nduni jwakumanyilila kogoya kwa conasiko campaka cagwisye ŵaŵiliŵa?

Yakuŵeceta yine yejinji ya lunda

²³ Aji soni jili misyungu ja ŵandu ŵalunda; kutenda lusagu pakulamula magambo nganiciŵa cindu cambone.

²⁴ Jwalijose jwakumsalila mundu jwakusakala kuti, “M'mwe nganimlemwa,” ŵandu tacimlwesa, nambo soni ngosyo syosope sya ŵandu tisicimtumbilila.

²⁵ Nambo ŵakulamula ŵakwajamuka ŵandu ŵakusakala mwangalola ngope, tiyicajendela cenene, mwamti upile ga AMBUJE tigaciŵa pa jemanjajo.

²⁶ Mundu jwakusajanga yakuwonawonape, ni jwakusalosya umbusanga usyesyene.

²⁷ Mtande kupanganya cilepe masengo genu gosope, ni mlolecesye soni kuti mgunda wenu uli welinganye cilepe, panyuma pakwe sambano ni mtandeje kutaŵa nyumba jenu.

²⁸ Mkatendela umboni wakumsisya mjenu pali pangali ligongo, soni mkasimŵecetaga ya unami ni ngomo syenu.

²⁹ Mkasimŵecetaga kuti, “Tinjimtendela yiŵatite jwalakwe pakundendela une, tinjiliwucisya kwa jwele mundujo pa yindu yakusakala yiŵandendele une.”

³⁰ Najesile mungulugulu mgunda wa mundu jwaulesi, mungulugulu mgunda wa mpeleya wa mundu jwangali lunda,

³¹ M'migunda josope mwagambile kumela miŵa palipose, cajila cosope cawutele ni msonde, soni lipupa lyakwe lya maganga lwaliji ali alugwisisye.

³² Pelepo ndili ndolite myoyo, natandite ganicisya ni kuliwusya namsyene pa yele yinayiweniyo, ni ndili ndolite, napatilepo lijiganyo.

³³ Naga mkuti, “Nimkwe ngoneko panandi, ngambe gwesela panandi,” pane “Ngambe kupinda makono panandi kuti mbumule.”

³⁴ Ulanda tiwucimsimana mpela jwawiyi, soni kulaga tikucimsawusya mpela jwaciswamba.