Misyungu 23 - Chiyawo Bible

Kuŵeceta msano ni kamo

¹ Pati mtemi pasi kulya ni mwenye, mkumbucile cenene kuti nduni jwele jwamli najojo.

² Naga mli mundu jwakunyela, mwusimane mtima kuti mkasimtenda kulosya lukowo.

³ Mkasimkumbila yakulya yakwe yakunong'a pakuŵa yakulya yakweyo kuŵa mkomboleka kuti yili yakwamba kumlinga nayo basi.

Kuŵeceta kwa msano ni kaŵili

⁴ Mkasimlipesya mwasyene kusosasosa cipanje, mlijiganye kutenda yindu mwa lunda soni kuwusimana mtima.

⁵ Pakwamba kupisya panandipe, basi tiwusimane kuti cipanje cipite, pakuŵa cikusatenda mpela cigambile kumela mapapiko mwacisisimucisya, ni kutanda kuguluka ulendo wa kwinani mpela nyanga.

Kuŵeceta kwa msano ni katatu

⁶ Mkamlya cakulya kwa mundu jwa usuci, ni kumbila kose kasimkumbilaga yakulya yakwe yakunong'a.

⁷ Pakuŵa jwalakwe akusagambaga kutamila ganicisya ya mtengo wa yindu, akusakusalila kuti, “Myice, kwende mlyeje, soni m'mweleje!” Citamileco kutendaga mu mtima mwakwemo ali ngakusosa.

⁸ Timcitapika syele mbamu simlilesyo, ni maloŵe genu gosope gakuyamicila tigacipita pacabe.

Kuŵeceta kwa msano ni mcece

⁹ Mkasimŵecetaga mundu jwakuloŵela ali mkupikana, pakuŵa taciganyosya maloŵe genu galunda gakugapikanago.

Kuŵeceta kwa likumi

¹⁰ Mkasimlundila malile kutyosya cimanyisyo ca mpika wa kalakala, kapena kuja kwinjilila migunda ja ŵanace ŵa masije.

¹¹ Pakuŵa mkulupusyo jwawo ali jwamacili, tacacenjela pa magambo gawo ni m'mwejo.

Kuŵeceta kwa 11

¹² Mtima wenu uŵe pa malamusi ni kugakamulicisya masengo, soni mapikanilo genu gapikanileje yindu ya lunda.

Kuŵeceta kwa 12

¹³ Kasimleka kumjamuka ni kumwunda mwanagwenu, pakuŵa atamose mumkuŵite ni cikoti, ngasawa.

¹⁴ Naga kumputa ni cikoti, timcikulupusya umi wakwe ku ciwa.

Kuŵeceta kwa 13

¹⁵ Mwanangu, naga mtima wenu ukuŵa wa lunda, nombe une mtima wangu tiwuciŵa wakusangalala.

¹⁶ Mtima wangu tiwucisangalala, patinjimpikana mli mkuŵeceta yindu yakamula mtima.

Kuŵeceta kwa 14

¹⁷ Mtima wenu ukasiwutenda wiwu ni ŵandu ŵa ulemwa,* nambo mpitilisye kwajogopa AMBUJE* ndaŵi ni ndaŵi.

¹⁸ Yisyene nditu, cembeceyo cenu cakusogolo cipali, soni cikulupi cenu ngasiciŵa cacabe.

Kuŵeceta kwa 15

¹⁹ Mpikane mwanangu, soni mkole lunda, mtima wenu mwujendesye mwitala lyambone.

²⁰ Mkatama pasikati pa ŵandu ŵakusakolelwa, pane pasikati ja ŵandu ŵakusalya nyama mwakunyela.

²¹ Pakuŵa ŵandu ŵakolelwa ni ŵandu ŵakunyela taciŵa ŵakulaga, soni mundu jwaulesi tacisyuka jwakulwala yiwisa.

Kuŵeceta kwa 16

²² Mwapikanile baba ŵenu ŵiŵamŵelece, soni mkasimwanyosyaga mama ŵenu ligongo lyakuti acekulwipe.

²³ Sumani cakuwona, ni mkasimcisumisya soni, msume lunda, misyungu nambo soni umanyilisi.

²⁴ Baba ŵa mwanace jwakulungama taciŵa ŵakusangalala mnope. Jwakuŵeleka mwanace jwalunda tacisangalala najo mwanacejo.

²⁵ Baba ŵenu ni mama ŵenu aŵe ŵakusangalala, mama ŵenu ŵiŵamŵelece m'mwejo aŵe ŵakondwa.

Kuŵeceta kwa 17

²⁶ Mwanangu, mtima wenu ungulupilile une, meso genu galolecesye matala gangu.

²⁷ Jwamkongwe jwacikululu ali mpela lisimbo lyakusokoka, jwamkongwe jwa cigwagwa ali mpela cisima cakanganika.

²⁸ Akusajuŵilila kwembeceya mpela jwaciswamba, soni ligongo lya jwalakwejo, acalume ŵajinji akusatupilatupila kuŵa ŵangakulupicika.

Kuŵeceta kwa 18

^29-30 Nduni jwakwete likungu? Nduni jwakwete canasa? Nduni jwali pa ukangani? Ana nduni akudandawula? Nduni jwakwete maŵanga gangamanyika kugatyocele? Nduni jwakwete meso gakucejela? Ni ŵele ŵakusatamilisya pa malo pajuli finyo, ŵele ŵakusamwa nawo finyo jwewanganye.

³¹ Mkasimjigalika mtima ni kucejela kwa finyo, pakusatenda mpela kusemula m'cikapu ni kunong'a pakwinjila ku ngulo.

³² Pa mbesi pakwe finyo jukusaluma mpela lijoka, soni ni kutamukula mpela lipili

³³ Meso genu tigacilola yindu ya cilendo, soni nganisyo syenu ni maloŵe genu ngasiyiŵa yagoloka.

³⁴ Timciŵa mpela mundu jwagonile kwala sikati ja nyasa, pane mpela mundu jwagonile pa songa jisyesyene ja wato.

³⁵ Timciŵeceta kuti, “Ŵambutile likofi, nambo nganambweka. Ŵanguŵite, nambo une pangali cinapikene. Ana une ngingwimuka ligongo cici? Ngusosa finyo jwine soni.”