Misyungu 22 - Chiyawo Bible

¹ Mbili jambone jili jakusosekwa kupunda cipanje cejinji, soni kwasalalila mtima acimjakwe kuli kwambone kupunda silifa* ni golidi.*

² Ŵakusicila ni ŵakulaga akulandana, pakuŵa AMBUJE* ni ŵaŵapanganyisye wosopewo.

³ Mundu jwakalamuka pati aciweni cindu cakogoya akusajuŵaga, nambo mundu jwakuloŵela akusagambaga kupelenganya ni kutanda kuligamba panyuma pakwe pati asimene ni yisawusyo.

⁴ Mbote jakulinandiya ni kwajogopa AMBUJE ni cipanje, ucimbicimbi ni umi.

⁵ Mwitala lya mundu jwangalungama mwana miŵa ni yitega, nambo mundu jwakuligosa cenene taciyiŵambala yosopeyo.

⁶ Mumjiganyani cile mwanace litala lyambone lyakuti ajendemo, ni kuti atamose pati acekulwipe ngasatyoka mu lyele litalalyo.

⁷ Mundu jwakusicila akusamlamulila mundu jwakulaga, soni mundu jwakongola yindu akusaŵa kapolo jwa jwakongosyajo.

⁸ Mundu jwakusapanda ungalungama tacigowola yisawusyo, nambo soni simbo ja ukali wakwe tijicitemanguka.

⁹ Mundu jwakwete liso lya canasa, AMBUJE tacimpa upile, pakuŵa akusagaŵana yakulya yakwe ni ŵandu ŵakulaga.

¹⁰ Mumtopole mundu jwakunyosya, timwone kuti ukangani tiwutyoce, soni ndewo ni kunyosyana tiyicityoka.

¹¹ Mundu jwakusanonyela kuŵa jwakuswejela mtima, soni kuŵeceta yambone, taciŵa m'mbusanga jwa mwenye.

¹² Meso ga AMBUJE gakusigalolela cenene ŵandu ŵakumanyilila yindu, nambo akusagagwisya maloŵe ga ŵandu ŵangakulupicika.

¹³ Mundu jwaulesi akusati, “Ee, kwana lisimba kusako, naga ngopoce kuja ku masengo, lisimba tilikambaculanye mu msewomo.”

¹⁴ Pakamwa pa jwamkongwe jwacikululu pali mpela lisimbo lyakusokoka, mundu jwatumbililidwe ni AMBUJE tacigwila mwisimbomo.

¹⁵ Mwacipago mtima wa mwanace ukusiwuŵa wa umwanace, nambo cikoti cakwamucila cikusicityosya wanace ni kuloŵela kosope.

¹⁶ Mundu jwakusiŵatendela ngalwe ŵandu ŵakulaga ni cakulinga cakuti ajonjecesye yipanje yakwe, soni jwakusagamba kupeleka mituka kwa ŵasicile kala, wosopewo taciŵa ŵakulaga acimsyene jika.

Kuŵeceta kwa lunda kwa 30

¹⁷ Mtejele mapikanilo genu, mpikane maloŵe ga ŵandu ŵalunda, ni mtima wenu ukamulicisye masengo yakwiganya yangu kuti mpate umanyilisi.

¹⁸ Tiyiciŵa yakusangalasya naga mkuyisunga mu mtima mwenu, ni kuŵa ŵakuliŵicila cile kuyiŵeceta mu ndaŵi jakwe jakusosekwa.

¹⁹ Nim'manyisye yeleyi lelo jino, kuti m'mwejo mŵice cikulupi cenu mwa AMBUJE.

²⁰ Ana une nganinamlembela malamusi gakwanila makumi gatatu, yakumcenjela ni yakumpa lunda?

²¹ Malamusi gakum'manyisya yayili ya cilungamo ni yakuwona, kuti mkapakombole kwajanga yakuwona ŵele ŵaŵamtumile?

Kuŵeceta kwandanda

²² Mkasimumjiŵila mundu jwakulaga, ligongo lyakuti jwalakwejo ali jwakulaga, ŵandu ŵakulaga mkisimwatendelaga ngalwe ku nganya sya magambo.

²³ AMBUJE tacaŵecetela magambo gawo, soni tacasumula umi ŵandu ŵakusasumula yindu yayili yawo.

Kuŵeceta kwaŵili

²⁴ Kasimtenda najo ubwanawe mundu jwakwanguya kupya mtima, mkajendaga najo mundu jwaukali.

²⁵ Kogopela kuti mtakulijiganya ndamo jakwe jakusakalajo, ni kulitega mwasyene jika mcitega.

Kuŵeceta kwatatu

²⁶ Mkaŵa jumo jwa ŵandu ŵakusajanguya kupeleka cilanga* kwa ŵandu, ŵele ŵakusatendela umboni ngongole ja ŵandu ŵane.

²⁷ Naga nganimkola cakuti mlipe pa kuwusya ngongolejo, tacimsumula atamose cindanda cenu.

Kuŵeceta kwa mcece

²⁸ Mkasimlunda malile gakalakala pakusumba malile, gele giŵaŵisile acinangolo ŵenu.

Kuŵeceta kwa msano

²⁹ Ana mkumwona mundu jwakutenda masengo gakwe mwa ufundi? Jwalakwe tacatumicila acayimwene, ngasatumicila ŵandu wamba.