Misyungu 21 - Chiyawo Bible

¹ Mtima wa mwenye uli mpela lusulo lwa mesi m'myala mwa AMBUJE,* akuwujongolela ku yakusaka jwalakwejo.

² Matala ga mundu gakusaŵa gakulungamika, m'meso ga msyenepejo, nambo AMBUJE ni ŵakusalola yayili mu mtima.

³ Kutenda yakulungama ni yakulupicika yikusiyanonyelesya AMBUJE kulekangana ni kupeleka mbopesi.

⁴ Meso gakupoka jili mtima wakulikwesya, soni nyali ja ŵandu ŵakusakala jili ulemwa.

⁵ Nganisyo sya mundu jwa mtawu sikusapindula, nambo mundu jwakusatenda yakwe mwakuwutuka mkanaganicisye cenene, mbesi jakwe jikusaŵa kulaga.

⁶ Cipanje cakucipata mwawiyi, cili mpela lipundugulu lyakwendajenda, soni citega ca ciwa kwa mundu.

⁷ Ndewo sya ŵandu ŵakusakala tisisyajonanga, ligongo akusakana kutenda yindu yacilungamo.

⁸ Litala lya ŵandu ŵakusakala nganiliŵa lyagoloka, nambo ndamo ja ŵandu ŵaswela mtima jili jakulungamika.

⁹ Kuli kwambone kutama penani pa msakasa, kulekangana ni kutama m'nyumba ni jwamkongwe jwa lisegwe.

¹⁰ Umi wa mundu jwakusakala ukusakumbila yindu yakusakala, ngakusatenda kose canasa mu mtima mwakwe pakumwona mjakwe jwakulaga.

¹¹ Pati apocele cilango mundu jwakusakala, mundu jwakuloŵela akusapatapo lunda, pakumwunda mundu jwalunda, jwalakwe akusajonjecesya umanyilisi.

¹² Jwakulungama akusalolecesya ni ganicisya yayikutendekwa ku nyumba ja mundu jwakusakala, kuti ŵandu ŵakusakala akusiŵagwicisya ku conasiko.

¹³ Mundu jwakusawugala m'mapikanilo gakwe ngakusapikana kulila kwa ŵandu ŵakulaga, lisiku line nombe najo tacilila ni ngasapagwa ŵakukupikana kulila kwakweko.

¹⁴ Mtuka wamcisyepela ukusalekasya ukali, soni cakwapa camcisyepela cikusamasya atamose macili ga ukali wakogoya.

¹⁵ Pati cilungamo citendekwe, ŵandu ŵambone akusasangalalaga, nambo yikusiyajogoya ŵandu ŵali acitambwali.

¹⁶ Mundu jwakusalekaga litala lya ŵandu ŵalunda, tacisimanikwa mwikuga lya ŵandu ŵawe.

¹⁷ Mundu jwakusanonyela yakusangalasya taciŵa mundu jwakulaga, Jwalijose jwakunonyelwa finyo ni mawuta, ngasasicila.

¹⁸ Ŵandu ŵakusakala taciŵa cida cakwawombolela ŵandu ŵakulungama, soni ŵandu ŵangakulupicika taciŵa cida cakwawombolela ŵandu ŵa mtima wambone.

¹⁹ Kuli kwambone kuja kutama mcipululu, kulekangana ni kutama ni jwamkongwe jwa lisegwe ni jwakupya mtima citema.

²⁰ M'nyumba ja mundu jwalunda mukusaŵa katundu jwakulekanganalekangana jwakusosekwa pa umi wa mundu, nambo mundu jwakuloŵela akusajonanga citema kalikose kapatile.

²¹ Mundu jwakusakuya cilungamo ni canasa, tacijaliwa ni umi, cilungamo ni ucimbicimbi.

²² Mundu jwalunda mpaka apakombole kuwupunda pa ngondo msinda wa ŵandu ŵamacili, ni gwisya mapupa gakulimba gakusagakulupilila ŵandu ŵa mu msindamo.

²³ Mundu jikusataŵa pakamwa pakwe ni kusamalila yakuŵeceta yakwe, ngaŵa mkusimana ni yakusawusya.

²⁴ Mundu jwakupoka ni jwakulikwesya lina lwakwe ni “Jwakunyosya” ligongo akusatenda yindu mwa lilama ni mwa cipongwe.

²⁵ Kumbila kwa mundu jwaulesi tikucimwulaga, pakuŵa akusagamba kuti yala lende, ngakamula masengo.

²⁶ Lisiku lyosope lyamtundu ŵandu ŵakusakala pangali cakusatenda akaŵe kumbila yindu basi, nambo ŵandu ŵambone akusapeleka, soni mwangajumulila.

²⁷ Mbopesi ja ŵandu ŵakusakala jikusijanyalaya AMBUJE, mnopemnope pati ajipelece ni cakulinga cakusakala.

²⁸ Mboni ja unami tijicijonasika, nambo maloŵe ga mundu jwakupikana, tigacipikanika mpaka kalakala.

²⁹ Mundu jwakusakala akusasaka kulilosya mpela jwakulimba mtima, nambo mundu jwagoloka akusaganicisya cenene yitendo yakwe.

³⁰ Pangali lunda, pangali kupikanicisya yindu cenene, pangali soni atamose msyungu, yampaka yikombole kwapunda AMBUJE.

³¹ Haci akusajiŵicila cile mkaniliyice lisiku lya ngondo, nambo kupunda kosope pa ngondo kuli m'myala mwa AMBUJE.