Misyungu 20 - Chiyawo Bible

¹ Ŵandu ŵakukolelwa finyo akusiŵanyosya acimjawo, ŵandu ŵakumwa ya ukali akusatandisya njojo, jwalijose jwakusokonecela ni yeleyi jwangali lunda.

² Kutumbila kwa mwenye kuli mpela kutwamula kwa lisimba, mundu jwakusakutanda melepe kutumbilako, akusajasa umi wakwe.

³ Cili cindu cakupeleka ucimbicimbi kwa mundu kuŵambalaga ya ndewo, nambo yisilu yosope yikusagambaga kangana.

⁴ Mundu jwaulesi ngakusalimila cile mu ndaŵi jambone, mu ndaŵi jagungula tacipita mcisosasosa nambo ngasapata kandu kalikose.

⁵ Nganisyo sya mu mtima wa mundu sili mpela mesi ga mcisima cakusokoka, nambo mundu jwalundape ni jwampaka apakombole kusikoposya.

⁶ Ŵandu ŵajinji akusaŵeceta yakulupicika kwawo, nambo nduni jwampaka amsimane mundu jwakulupicika kusyesyene?

⁷ Mundu jwambone jwakusajenda mwakulungama, Mlungu akusapeleka upile kwa ŵanace ŵakuya panyuma pakwe.

⁸ Pati mwenye atemi pa citengu cawo ca ucimwene kulamula magambo, akusiŵamanyilila ŵandu wosope ŵakusakala pakwamba kwalola ni mesope basi.

⁹ Nduni jwampaka aŵecete kuti, “Une sambano mtima wangu ŵaswela, nganingola ulemwa* uliwose.”

¹⁰ Masikelo ni milingo jakulinjila yindu naga yili yakanyengano, yosopeyo yikusiyanyalaya AMBUJE.*

¹¹ Atamose mwanace akusamanyika ni masengo gakwe, naga yakusatendayo yili yambone ni yakulungamika.

¹² Mapikanilo gakusigapikana, meso ni gigakusalola, AMBUJE ni ŵiŵayipanganyisye yosopeyo.

¹³ Mkasimnonyela mnope lugono kogopela kuti mtakulaga; tamani mesope, ni timcikola yakulya yejinji.

¹⁴ Mundu pakusuma cindu akusati, “Cangali mate kose celeci,” ni kuli kulambusya; nambo pati asumile ni kutyokapo, akusaja kutanda kulikwesya.

¹⁵ Pana golidi* ni maganga gamajinji ga mtengo wapenani, nambo ngomo syasikusaŵeceta maloŵe galunda, sili syamtengo wa penani kupunda yosopeyo.

¹⁶ Msumule cakuwala ca mundu jwele jwakutendela umboni wa ngongole mundu jwa cilendo, soni mumkamule msyenepejo naga akumpelecela cikole mlendo jwangamanyika.

¹⁷ Cakulya cakupata mwawiyi cikusaŵa cakunong'a kwa mundu, nambo panyuma pakwe cikusaŵa gumbala mkamwa mwakwe mpela amisile maganga.

¹⁸ Pamkusaganicisya kutenda yindu ya msogolo, mtandeje kuwusya, mkanimtande kuputa ngondo, mtandeje kuja kuŵenda msyungu wambone.

¹⁹ Mundu jwakusaja kutenda ya unami, akusapita mcilumukula ya asili, ni ligogo lyakwe kasimkamulanaga naco cisilu camti myoyoco.

²⁰ Naga jwine akwalwesa babagwe pane mamagwe, umi wakwe tiwuciŵa mpela nyali jesime mcipi camti bii.

²¹ Cipanje cakucipata mwacitema pandanda, pambesi pakwe ngasiciŵa cana upile.

²² Kasimŵecetaga kuti, “Tinjiwucisya cele cakusakalaci.” Mwakulupilile AMBUJE, ŵele ni ŵitacimkamucisya.

²³ Milingo jakulekangana jikusijanyalaya AMBUJE, soni sikelo syakwajiŵila nasyo ŵandu nganisiŵa syambone.

²⁴ Matala ga mundu jwakusagalamulila ni AMBUJE, Sambano mundu mpaka amanyilile litala lyakwe camtuli?

²⁵ Mganicisye cenene mkanimtende cilanga* cakupeleka mbopesi kwa Mlungu, ligongo mwine mtakucenga nganisyo syenu panyuma pakwe kutendaga mli mlumbile kala.

²⁶ Mwenye jwalunda akusiŵamanyilila ŵandu ŵakusakala, soni akusiŵapa cilango cakogoya mwangatendela canasa.

²⁷ Msimu wa mundu uli nyali ja AMBUJE, jikuwungunya yiŵalo yosope ya mkati mwa mundu.

²⁸ Kusalala mtima ni kulupicika ni yiyikusamsunga mwenye, soni cilungamo ni cacikusalimbikasya ucimwene wakwe.

²⁹ Ucimbicimbi wa acacanda ugonile pa macili gawo, nambo ucimbicimbi wa ŵacekulupe ugonile pawuli syawo.

³⁰ Yipwetesi yakogoya yikusakamucisya kutyosya yakusakala, yikoti yikusakamucisya kuswejesya ya mkati mwa mundu.