Misyungu 2 - Chiyawo Bible

Umbone wa lunda

¹ Mwanangu, myikuye yingumjiganya ni kugasunga malamusi gangu.

² Mtejeleje cile mapikanilo genu ku yindu yayili ya lunda soni mlipeleceje ni mtima wenu wosope kulinga kupikanicisya lundalo.

³ Ngumsalicisya kuti mŵende mtima wakombola kumanyilila ni kupikanicisya cenene yindu.

⁴ Mlusosejesoseje lundalo mpela yimkusati pakusosasosa silifa* kapena cipanje cine cakusoŵa.

⁵ Naga mkutenda myoyo timcipikanicisya gopolela kwakwe kwa kumjogopa Mlungu.

⁶ Pakuŵa AMBUJE* ni ŵakusapeleka lunda; umanyilisi ni kupikanicisya, yikusatyocela kwa jwalakwejo.

⁷ Mlungu akusapeleka lunda lusyesyene kwa ŵandu ŵa cilungamo, soni jwalakwejo ali mpela cida cakwacenjelela ŵandu ŵakusajenda matala gagoloka.

⁸ Jwalakwe ni jwakusalondela matala ga kulungamika, jwalakwe ni jwakusagacenjela matala ga ŵandu ŵaswela mtima.

⁹ Mwamti timcipikanicisya ya kulupicika ni cilungamo, ya ungali lusagu ni ya litala lili lyose lyambone.

¹⁰ Lunda tilucijinjila mu mtima mwenu, soni kumanyilila yindu tikucimsangalasya.

¹¹ Ganicisya cilepe ya msogolo tikucimsunga m'mwejo soni kupikanicisya cenene yindu, tikucimcenjela.

¹² Lundalu tulucimkulupusya ku matala gakusakala. Tulucimcenjela ku ŵandu ŵakwanonyela ya unami.

¹³ Ŵele ŵakusaleka matala ga kulungamika ni kwendaga m'matala ga mcipi.

¹⁴ Jemanjajo akusasangalala pakutenda yindu yakusakala soni akusanonyela yindu yangalungamika.

¹⁵ Ŵandu ŵamti ngaŵa mkwakulupilila soni nginaŵa ŵa matala gagoloka.

¹⁶ Lunda tilucimkulupusya ku jwamkongwe jwacigwagwa, jwakusalinga kumnyenjelela m'mwejo ni maloŵe gakuweŵa.

¹⁷ Jwakusaŵa jwangakulupicika mpaka kwakopocela ŵamkwakwe ŵene ŵa ku ucanda wakwe, soni akusaliŵalila cilanga* ciŵatesile pameso pa Mlungu.

¹⁸ Naga mkwawula ku nyumba ja jwele jwamkongwejo, mkwenda litala lyakuja ku ciwa. Kwawula kweleko ni kucitanda melepe cilambo ca ŵandu ŵawe.

¹⁹ Pangali atamose mundu jumo jwakusajawula kweleko ni kuwujako ali jwa cijumi. Ngakusapata soni matala ga umi.

²⁰ Myoyo m'mwe mjendeje matala ga ŵandu ŵambone, soni msunje ni kugakuya matala ga ŵandu ŵakulungamika.

²¹ Pakuŵa ŵandu ŵakulungama ni ŵitacitama pa cilambo cino, soni ŵandu ŵakulupicika ni ŵitacisigalila kutamilicika mwelemo.

²² Nambo ŵandu ŵangalumbana, Mlungu tacasinga kwatyosya pa cilambo cino, ŵandu ŵakunyenga tacacuŵa kwakoposya mcilambomo.