Misyungu 19 - Chiyawo Bible

¹ Mundu jwakulaga jwakusajenda mwagoloka, akusampunda mundu jwakuloŵela jwakusaŵeceta ya unami.

² Ngaŵa yambone mundu kuŵa jwangali umanyilisi, pane kwenda mwakwanguya ni kusokonecela litala.

³ Usilu wakwe wa mundu ukasajonanga umi wakwe, eti umi wakwe ni kwatumbililaga AMBUJE.

⁴ Cipanje cikusamtendekasya mundu kola acimjakwe ŵajinji, nambo mundu jwakulaga acimjakwe akusamtilaga.

⁵ Mboni ja unami ngasijilepela kupocela cilango, soni jwakuŵeceta ya unami ngasakulupuka kose.

⁶ Ŵandu ŵajinji akusasaka kuti mundu jwakupeleka ŵasalalileje mtima, mundu jwakoloŵa m'myala akusaŵa m'mbusanga jwa ŵandu ŵajinji.

⁷ Naga mundu jwakulaga akusaŵenjedwaga ni acalongo acimjakwe ŵene, nambi kuli uli mwakusamŵambalila acimjakwe, mwakusamŵambalila!

⁸ Mundu jwakusapata lunda ni akusalisosela yindu yambone msyene pejo, mundu jwakusapikanicisyaga yindu cenene, yindu tiyicimjendela cenene.

⁹ Mboni ja unami ngasijilepela kupocela cilango, mundu jwakuŵeceta ya unami tacijonasika.

¹⁰ Cisilu ngacikuŵajilwa kutama ni umi wa yipanje, atamose kuti kapolo ŵalamuleje alukosyo.

¹¹ Lunda lukusamtendesya mundu kuŵa jwangatumbila citema, ucimbicimbi wakwe ugonile pangayikosya ya cipongwe yakusamtendelaga ŵandu.

¹² Kutumbila kwa mwenye kuli mpela kutwamula kwa lisimba, nambo kusalala mtima kwawo kuli mpela mangame pa manyasi.

¹³ Mwanace jwakuloŵela akusaŵa likungu kwa babagwe, soni jwamkongwe jwakuŵecetaŵeceta akusapesya mpela ula ja kawombe.

¹⁴ Nyumba ni yipanje komboleka kupata mundu kutyocela kwa acinangolo, nambo jwamkongwe jwalunda akusatyocela kwa AMBUJE.*

¹⁵ Ulesi ukusagonesya lugono lwakuwa nalo, myoyo mundu jwaulesi taciwa ni sala.

¹⁶ Mundu jwakusagapikanila malamusi akusalisunjila umi wakwe, nambo mundu jwangakusamalila matala gakwe taciwa nditu.

¹⁷ Mundu jwakusiŵasalalila mtima ŵandu ŵakulaga, akusaŵa mpela akwakongosya AMBUJE, ligongo AMBUJEWO ni ŵitacimwucisya jwalakwe pa yindu yakwe yamboneyo.

¹⁸ Mumjamuce mwanagwenu cembeceyo cili cipali mwanacejo mkanakule, soni mkanapelenganye konasika; mkakola mtima wakusaka kumjonanga mwanagwenu.

¹⁹ Mundu jwaukali jwakupya mtima mnope tacipocela cilango, pakuti naga kumlecelela mundu jwamti myiyi, yindu tiyicijonasika kupunda pandanda.

²⁰ Mpikanileje msyungu wakusampa ŵandu, kuti timŵe ŵalunda pasogolo pakwe.

²¹ Nganisyo sya mu mtima wa mundu sikusaŵa syejinji, nambo cakulinga ca AMBUJE ni tiyicitendekwa.

²² Cakusosekwa mnope kwa mundu ni kusalala mtima kwakwe, kuli kwambone kuŵa jwakulaga kulekangana ni kuŵa jwa unami.

²³ Kwajogopa AMBUJE kukusapeleka umi, soni jwakusajogopajo akusaŵa pambone.

²⁴ Ŵandu ŵane ali ŵaulesi wakulepelaga atamose kunyakula mbamu jose kuti aŵice pakamwa pawo.

²⁵ Mumtimbe mundu jwa mwano, kuti yisilu yine yipatilepo lunda, naga mkumjamuka mundu jwakupikanicisya cenene yindu, jwalakwe tacipata lunda.

²⁶ Mundu jwakusatenda ndewo ni babagwe soni kwatopola mamagwe, ali mwanace jwakutesya soni nambo soni jwakutesya ucimbicimbi.

²⁷ Mwanangu, naga mkuleka kugapikanila malamusi, ni kuti msokonecele ni kulilekanganya ni lunda.

²⁸ Mboni ja unami jikusanyosya cilungamo, pakamwa pa ŵandu ŵakusakala pakusawucisya cindu cakusakala.

²⁹ Yilinganyidwe kalape kuti ŵandu ŵakusakala gawujile magambo, soni cikoti cakuputila pa mgongo pa ŵandu ŵakuloŵela cili cile.