Misyungu 18 - Chiyawo Bible

¹ Mundu jwakusalityosya mwikuga lya cimjakwe akusaŵa jwakulinonyela, akusagambaga kukuya yakumnonyela jwalakwe jika.

² Cisilu cangasamala kuti kanga cikupikanicisya yindu kapena ngacikupikanicisya, nambo cikusagambaga kuŵeceta yanganisyo syakwepe basi.

³ Kusakala mtima pati kuyice, cacikusakuyicisya ni kunyosya.

⁴ Maloŵe ga lunda gakukopoka mkamwa mwa mundu gali mpela nyasa jakusokoka, Uliŵa wa lunda uli mpela lusulo lwegumbale lwakuwutuka mesi.

⁵ Nganiciŵa cindu cambone kutenda lusagu pakunonyelesya magambo ga mundu jwakusakala, kapena kuwunicila meso melepe kumtendela ngalwe mundu jwambone.

⁶ Maloŵe ga cisilu gakusatandisya njojo, nambo soni pakamwa pakwe pakusaŵilasya cikoti.

⁷ Cisilu cikusalijonanga cisyene ni pakamwa pakwe, cikusakamulwa pakulitega ni maloŵe gakwe msyenejo.

⁸ Maloŵe ga mundu jwa mabosa gakusaŵa gakunong'a kupunda cine cilicose, ŵandu ŵajinji akusanonyela kugamila gosope myuu mwangasawusya.

⁹ Mundu jwakusakamula masengo gakwe mwa ulesi, ali jwakusakala mpela mundu jwakonanga yindu.

¹⁰ Lina lya AMBUJE* lili mpela sanja jakulimbangana mnope, mundu jwakulungama akusatilila kweleko ni kulupuka.

¹¹ Cipanje ca mundu jwakusicila cili mpela msinda wakwe, cili mpela cida cakumcinjilicisya ku yisawusyo.

¹² Mundu mkanagwe, akusatanda kola mtima wakanika ni wakulikwesya, nambo ucimbicimbi ukusayika panyuma pakulinondiya.

¹³ Mundu jwakusajanguyaga kwanga ngani mkanapikanicisye, akusaloŵela ni kulitesya soni msyene jika.

¹⁴ Mtima wa mundu komboleka kupilila cilwele, nambo pati ajasile mtima, nduni jwampaka apakombole kuwulimbikasya?

¹⁵ Mtima wa mundu jwakalamuka cenene ukusaŵa cile kusosa kulijiganya yejinji, mapikanilo ga mundu jwalunda gakusasosa kupikanicisya kuti gapate umanyilisi.

¹⁶ Mtuka wa mundu ukusamwugulila litala jwali jwakupelekajo, ukusakomboleka kumŵandikanya ni acakulungwakulungwa.

¹⁷ Mundu jwakusatanda kuŵeceta pa magambo akusawoneka mpela jwakulondola ni jwalakwejo, mpaka pati mjakwejo ajinjile mluŵala kutanda kulumukula ni kuwucisya cenene.

¹⁸ Kulondola cisango kukusakamucisyaga naga mbali siŵili syamacili syakwimbana magambo sili mkulimbana, kukusakamucisya kumasya ukanganiwo.

¹⁹ Mwakamucisye acalongo acimjenu, nipo tacimkamucisya mpela lipupa lyakulimbangana lya msinda.

²⁰ Lutumbo lwa mundu lukusajikuta yisogosi ya mkamwa mwakwe, mundujo tacijikuta yakuyicisya ya pakamwa pakwe.

²¹ Lulumi lukwete macili ga pa umi nambo soni ciwa, ŵandu ŵakasalunonyela mnope tacilya yisogosi yakwe.

²² Mundu jwapatile ŵakongwe, apatile cindu cambone, soni AMBUJE amsalalile mtima jwalakwejo.

²³ Mundu jwakulaga akusacondelela mwa canasa, nambo ŵandu ŵakusicila akusajangaga mwa ukali pakumŵenda.

²⁴ Mundu jwakola maganja gamajinji akusagamba kulijonanga, nambo pana mjakwe jwine jwakusakunyambatila kupunda mlongo mjako.