Misyungu 17 - Chiyawo Bible

¹ Kuli kwambone kulya mkute wejumu pali pana mtendele, kulekangana ni kutenda cindimba m'nyumba mwegumbale ni ukangani.

² Kapolo jwakutenda yindu mwa lunda tacilamulila mwanace jwa mlukosyo jwakusatenda yakutesya soni.

³ Golidi* ni silifa* yikusalinjidwa ni moto, nambo AMBUJE* ni ŵakasajilinga mitima ja ŵandu.

⁴ Mundu jwakutenda yakusakala akusapikanila maloŵe gakusakala, mundu jwa unami akusapikanila yayikusakopoka mkamwa mwakunyenga.

⁵ Mundu jwakusiŵanyosya ŵandu ŵakulaga, akusamnyosya Mlungu juŵapanganyisye jemanjajo.

⁶ Yisukulu ni ucimbicimbi wa ŵandu ŵacekulupe, soni ucimbicimbi wa ŵanace ni acinangolo.

⁷ Kukusaŵa kwakusimonjesya kuti cisilu ciŵecete yambone, myoyo soni kuti ngomo sya mwenye siŵe sya unami.

⁸ Mbote ja cilo jili mpela liganga lya upile kwa jwakusajipelekajo, kulikose kwakusajawula, akusasicila.

⁹ Mundu jwakusakululucila cileŵi akusalimbikasya cinonyelo, nambo mundu jwakusasunga ngani ku lukosi akusawulaga ulongo.

¹⁰ Mundu jwalunda akusapikanaga kampepe, kulekangana ni cisilu camti atamose acipute camtuli ngacikusapikana.

¹¹ Mundu jwakusakala akusagamba kusosa yakwimucila basi, nambo tacimtumicisya ndumetume ja ngalwe.

¹² Kuli kwambone kusimangana ni cilombo cicisumulidwe ŵanace ŵakwe, kulekangana ni kusimana ni cisilu mu usilu wakwe.

¹³ Mundu jwakusawucisya cindu cakusakala m'malo mwa cambone, yisawusyo ngasiyityoka pa liŵasa lyakwe.

¹⁴ Ndande ja ukangani jili mpela mesi gakwiticila, myoyo mtukuceje pa malopo ndewo mkanijitande.

¹⁵ Mundu jwakusalamula mwagalawusya, mundu jwakusakala mtima kuŵa jwangali cileŵi, ni jwa cilungamo kuŵa jwakulemwa, jwele mundujo AMBUJE akusanyalayisidwa najo.

¹⁶ Ligongo cici cisilu cikuŵajilwa kola mbiya, kutendaga mtwe wakwe ukakwenda cenene soni akakusaka kupata lunda?

¹⁷ M'mbusanga akusakunonyela ndaŵi ni ndaŵi, soni mlongo mjakwe ŵapagwile kuti atukamucisye pa ndaŵi ja yisawusyo.

¹⁸ Mundu jwangali lunda akusapeleka cilanga* cakumlipilila mjakwe ngongole, myoyo akusasyuka kuŵa cikole kwa mjakwejo.

¹⁹ Mundu jwakusasangalala ni yakulemwa ya acimjakwe akusanonyela ndewo, Mundu jwakusaŵeceta mwakupoka ni kulikwesya akusaliŵilanjila conasiko.

²⁰ Mundu jwa mtima wakusakala yakwe ngayikusamjendela cenene, soni mundu jwapakamwa pakusakala akusagwa m'yisawusyo.

²¹ Mwanace jwakuloŵela akusiŵatesya canasa babagwe, soni babagwe cisilu akusaŵa ŵangali lukondwa.

²² Mtima wakusangalala uli mtela wambone pa umi wa mundu, nambo mtima wa gasabu ukusajumusya cilu.

²³ Mundu jwakusakala akusapocela mbote ja cilo jamcisyepela, kuti apindisye cilungamo ca magambo.

²⁴ Mundu jwakupikanicisya yindu cenene nganisyo syakwe akusasiŵika pa lunda basi, nambo cisilu cikusagambaga kuti meso mwalamwala pa cilambo cosope.

²⁵ Mwanace jwakuloŵela akusiŵatesya babagwe canasa, soni akusiŵapwetesya mtima mamagwe ŵiŵamŵelece.

²⁶ Kumlipikasya magambo mundu jwangali cileŵi kwakusakala, soni ngaŵa yambone kwakwapula ŵandu ŵambone ligongo lya cilungamo cawo.

²⁷ Mundu jwakusasunga pakamwa pakwe ni jwakumanyilila yindu. Mundu jwakuwusimana mtima ni jwakupikanicisya cenene yindu.

²⁸ Atamose cisilu pati citemi jii, cikusaŵa mpela mundu jwalunda naga ciwunicile pakamwa pakwe ŵandu akusapelaga mundu jwalunda.