Misyungu 16 - Chiyawo Bible

¹ Yakuganisya ya mu mtima yili ya mundu, nambo yiŵeceto yakwe yili yakutyocela kwa AMBUJE.*

² Masengo gakwe ga mundu gakusaŵaga gakulungama pameso pakwe, nambo AMBUJE akusalamula pakulola ya mu mtima mwa mundu.

³ Cilicose camkutenda, mciŵice m'magasa ga AMBUJE, ni yamkuganisyayo tiyicimjendela cenene.

⁴ AMBUJE ŵapanganyisye kandu kalikose malinga ni magongo gakwe, atamose ŵandu ŵakusakala, kuti asimangane ni lisiku lya yisawusyo.

⁵ AMBUJE akusaŵengana ni mundu jwalijose jwali jwa mwano, kusyene jwele mundujo ngasalepela kose kupocela cilango.

⁶ Kupitila mkulipeleka ni kulupicika, mundu akusakululucidwa ulemwa wakwe; soni kupitila mkwajogopa AMBUJE, mundu akusayiŵambala yakusakala.

⁷ Naga ndamo sya mundu syasangalesye AMBUJE, akusiŵatendekasya atamose amagongo ŵakwe ŵene kutama najo mwa mtendele.

⁸ Kuli kwambone kola yindu yapanandi yakuyipata mwa cilungamo, kulekangana ni kola cipanje cejinji mkaniwukola cilungamo.

⁹ Mtima wa mundu ukusiwuganicisya yakutenda, nambo AMBUJE ni ŵakusajongolela matala ga mundujo.

¹⁰ Mwenye akusaŵeceta ni ulamusi wakutyocela kwa Mlungu, pakamwa pakwe ngipakwenela kwasa cilungamo pakulamula.

¹¹ AMBUJE akusasosa milingo ni masikelo gacilungamo, maganga gakulinjila gosope ga m'misaku juŵapanganyisye ni jwalakwejo.

¹² Kutenda yakusakala kukusikwasakalisya ayimwene, pakuti cilungamo ni cikusalimbanganya ucimwene.

¹³ Ngomo syakuŵeceta yakuwona sikusisimsangalasya mwenye, soni akusasangalalaga ni mundu jwakusaŵeceta ya cilungamo.

¹⁴ Kutumbila kwa mwenye uli utenga wa ciwa, nambo mundu jwalunda akusapembeka kutumbilako.

¹⁵ Kusalala mtima kwa mwenye kukusapeleka umi, kuli mpela mawunde ga ula ndaŵi ja cawu.

¹⁶ Kupata lunda kuli kwambone kupunda kupata golidi,* kupikanicisya cenene yindu kuli kwambone kupunda kukola silifa.*

¹⁷ Msewo wa mundu jwakulungama ukusaŵambala yakusakala, mundu jwakulolecesya cenene kwakuja akusasunga umi wakwe.

¹⁸ Kupoka kukusamlongolela mundu ku conasiko, soni mundu jwa mtima wakulikwesya tacigwa.

¹⁹ Kuli kwambone kola umi ŵakulitulusya pasikati pa ŵandu ŵakulaga, kupunda ni gaŵana yipanje ni ŵandu ŵakusakala.

²⁰ Mundu jwakwiticisya msyungu, yakwe tiyicimjendela cenene, jwana upile mundu jwakusiŵakulupilila AMBUJE.

²¹ Mundu jwalunda ni jwamkomangale mu nganisyo akusakolanjidwa jwakupikanicisya cenene yindu, kusangalasya kwa maloŵe gakwe kukusalimbikasya macili ga maloŵe gakwe.

²² Lunda luli uliŵa wa umi kwa ŵele ŵakwete lundalo, nambo usilu ukusaŵilasya cilango kwa ŵandu ŵakuloŵela.

²³ Mtima wa mundu jwalunda ukusamtendekasya mundujo kuŵeceta maloŵe gakalamuka ni gamakomangale, lundalo lukusakusya macili ga maloŵe gakwego.

²⁴ Maloŵe gakusangalasya gali mpela lisyega lya uci, gakusanong'a mu mtima soni gakusalimbikasya cilu.

²⁵ Pana litala lyalikusawoneka mpela lyagoloka kwa mundu, nambo mbesi jakwe lili litala lya ku ciwa.

²⁶ Sala ja mundu jwamasengo jikusamkamucisya kulimbicila masengo, pakuŵa akusasaka kumasya sala jakwejo.

²⁷ Mundu jwacabecabe akusasosasosa matala gakwajonanjila acimjakwe, soni mu ngomo syakwe mwana moto wakolelaga ŵaliŵali.

²⁸ Mundu jwakusakala akusajenesya njojo, jwa mabosa akusiŵaŵenganya ŵandu ŵa pa ulongo.

²⁹ Mundu jwa ndewo akusiŵanyenjelela acimjakwe, nipo akusiŵajendesya m'matala gakusakala.

³⁰ Mundu jwakusasisinila meso pakuŵeceta, akusaganicisya yindu yakusakala, mundu jwakusatenda msonyo akusayicisya yakusakala.

³¹ Uli sili m'cisoti ca ucimwene ca ucimbicimbi, mundu akusasipata naga atemi ni umi wacilungamo.

³² Mundu jwangatumbila citemape akusampunda mundu jwamacili mnope, mundu jwakusawusimana mtima akusapunda msilikali jwakusumula msinda.

³³ Ŵandu akulondola cisango kuti amanyilile lisosa lya Mlungu, nambo jwakusalongosola yindu yosope yene ni msyene Mlungu.