Misyungu 15 - Chiyawo Bible

¹ Kwanga kwakufasa kukusasisimisya kutumbila, nambo maloŵe gakwela gakusakolecesya ukali.

² Maloŵe ga ŵandu ŵalunda gakusapeleka soni lunda, nambo pakamwa pa ŵandu ŵakuloŵela pakusakoposya ya usilu.

³ Meso ga AMBUJE* gali posepose, gakusigalola ŵakusakala ni ŵambone ŵakwe.

⁴ Maloŵe gakufasa gakusaŵa mpela citela cakupeleka umi, nambo maloŵe gakusakala gakusapweteka mu mtima.

⁵ Cisilu cikusanyosya malamusi ga babagwe, nambo mundu jwakalamuka akusapikana camuko.

⁶ M'nyumba mwa mundu jwakulungamika mukusimusimanikwa cipanje cejinji, nambo yindu yakusapindula mundu jwakusakala, yikusamgwisya m'yisawusyo.

⁷ Pakamwa pa ŵandu ŵalunda pakusajenesya lunda, nambo mitima ja yisilu ngajikusati myoyo.

⁸ Mbopesi ja ŵandu ŵakusakala jikusijanyalaya AMBUJE, nambo lipopelo lya ŵandu ŵakulungama likusilyasangalasya.

⁹ AMBUJE akusaŵengana nayo yitendo ya ŵandu ŵakusakala, nambo akusamnonyela mundu jwakusatenda ya cilungamo.

¹⁰ Jwakuleka litala lyambone, tacipocela cilango cakogoya; mundu jwakusaŵengana ni camuko taciwa.

¹¹ Malembe ni conasiko yosopeyo yili mbalambanda pameso pa AMBUJE, kuli uli nambi sambano ni mitima ja ŵandu!

¹² Mundu jwakunyosya jwanganonyela kumjamuka; ngakusaja kuŵenda msyungu kwa ŵandu ŵalunda.

¹³ Mtima wakusangalala ukusalosya ngope jakondwa, nambo umi ukusapweteka ni yipwetesi ya mu mtima.

¹⁴ Mtima wa mundu jwakupikanicisya cenene yindu ukusasosa nditu kumanyilila yejinji, nambo mkamwa mwa ŵandu ŵakuloŵela mukusajikutila ni ya usilu.

¹⁵ Masiku gosope ga mundu jwakulagasika gakusaŵa gakusakala, nambo mtima wakusangalala ukusaŵaga wakondwa ndaŵi josope.

¹⁶ Kuli kwambone kola yakunandipa uli mkwajogopa AMBUJE, kulekangana ni kola cipanje cejinji ni kusimanaga ni yisawusyo.

¹⁷ Kulya liponda pali pana cinonyelano kuli kwambone, kupunda ni kulila nyama ja ng'ombe jakwimbala pali pana uŵengani.

¹⁸ Mundu jwakupya mtima citema akusatandisya njojo, nambo mundu jwakuwusimana mtima akusayikasya mtendele.

¹⁹ Matala ga mundu jwaulesi gali gamawutale ni miŵa, nambo litala lya mundu jwakulungama lili mpela msewo wagoloka watyatyatya.

²⁰ Mwanace jwalunda akusiŵasangalasya babagwe, nambo mwanace jwakuloŵela akusiŵanyosya mamagwe.

²¹ Usilu ukusiwumsangalasya mundu jumkinakola lunda, nambo mundu jwakupikanicisya cenene yindu akusajenda mwagoloka.

²² Pakusoŵa msyungu nganisyo syakwe sikusajonasika, nambo pati atupile apungu, yakuyiganicisya kuyitenda yikusakomboleka kusyene.

²³ Kwanga mwakwenela kukusikumsangalasya mundu, nambo soni maloŵe gambone gakuŵecetedwa pa ndaŵi jambone gakusasangalasya.

²⁴ Ŵandu ŵalunda akusajenda litala lyalikusilyayicisya ku umi, kuti agaŵambale malembe kusi kwakweko.

²⁵ AMBUJE akusapasula nyumba ja mundu jwakupoka, nambo akusasamalila malile ga kacilambo ka jwamkongwe jwamasije.

²⁶ Nganisyo sya ŵandu ŵakusakala sikusisyanyalaya AMBUJE, nambo maloŵe ga ŵandu ŵakulungama gakusigamsangalasya.

²⁷ Mundu jwakusasosa kupindula mu matala gangakulupicika, akusalilagasya liŵasa lyakwe; nambo mundu jwakuŵengana ni mbote sya cilo tacisimana cenene.

²⁸ Mtima wa mundu jwambone ukusiwuganicisya yakwanga, nambo mkamwa mwa mundu jwakusakala mukusimugamba kopoka maloŵe gakusakalape basi.

²⁹ AMBUJE akusaŵa kwakutalicila ni ŵandu ŵakusakala, nambo akusapikana lipopelo lya ŵandu ŵakulungama.

³⁰ Kumulika kwa meso kukusikusangalasya mtima, soni utenga wambone ukusiwumlimbikasya mundu.

³¹ Mundu jwakwete mapikanilo gagakusapikana camuko, tacitama mwikuga lya ŵandu ŵalunda.

³² Mundu jwakusaganyosya malamusi akusagamba kulinyosya msyene jika, nambo jwakusajiticisya camuko akusapindula pakupikanicisya cenene yindu.

³³ Kwajogopa AMBUJE kukusikumjiganya mundu lunda, soni kulinandiya ni kucimbicisya, kulinandiya ni kuli kwakupunda mnope kuŵa pasogolo.