Misyungu 14 - Chiyawo Bible

¹ Jwamkongwe jwalunda akusataŵa liŵasa lyakwe, nambo jwamkongwe jwakuloŵela akusalipasula ni makono gakwe.

² Jwakwenda mwagoloka mtima akusamjogopa AMBUJE, nambo jwakwenda mwa unami akusamnyosya jwalakwejo.

³ Kuŵeceta kwa cisilu kukusaliŵilanjila simbo pa mgongo pakwe, nambo maloŵe ga mundu jwalunda gakusamcinga ku yisawusyo.

⁴ Kwakuli kwangali ng'ombe kukusaŵa soni kwangali macinga, nambo kusili ng'ombe syamacili kukusapagwaga soni yakulya yejinji.

⁵ Mboni jakulupicika jangalambusya, nambo mboni jakunyenga jikusaŵeceta ya unami.

⁶ Jwakwanyosya acimjakwe akusalusosasosa lunda ngalupata kose, nambo mundu jwakupikanicisya cenene yindu akusayimanyilila yindu mwacitema.

⁷ Mtalikangane naco cisilu, pakuti pacili calakweco ngimpata kose maloŵe ga lunda.

⁸ Lunda lwa mundu jwakalamuka lugonile paganicisya cenene matala gakwe, nambo yisilu yikusaliloŵesya yisyene ni usilu wawo.

⁹ Yisilu ngayikusakosya kuti yipesye ulemwa wawo, lisosa lyambone likusapatikanaga mwa ŵandu ŵakulungama basi.

¹⁰ Mtima ukusamanyilila usyenepe yakupweteka yakwe, soni pangali jwine jwampaka amanyilile lukondwa lwakwe.

¹¹ Nyumba ja mundu jwakusakala tijicipasuka, nambo tenti ja jwakulungama tijicitamilicika.

¹² Pana litala line lyalikusawoneka mpela lyambone kwa mundu, nambo mbesi jakwe jili ciwa.

¹³ Atamose pakuseka mtima kuŵa uli mkupweteka, nambo pambesi jakusangalala canasa cikusawuja.

¹⁴ Mundu jwakuganisya mu mtima mwakwe yakuwujilila munyuma pa cikulupi, tacipocela yakuŵajilwa ni masengo gakwe, nambo mundu jwambone tacipocela mbote ja masengo gakwe.

¹⁵ Mundu jwakuloŵela akusakulupilila cilicose, nambo mundu jwakalamuka akusalolecesya mwakwendela.

¹⁶ Mundu jwalunda ali jwakalamuka soni akusagaŵambala matala gakusakala, nambo cisilu cikusagamba kuwutucila yindu mwangaganicisya kose.

¹⁷ Mundu jwakupya mtima citema akusatenda yindu mwakuloŵela, mundu jwa ndamo ja unami, ŵandu akusaŵengana najo.

¹⁸ Ŵandu ŵakuloŵela kwawo ni kuloŵela, nambo ŵandu ŵakalamuka jawo ni mbote jakumanyilila yindu.

¹⁹ Ŵandu ŵakusakala tacalamucila ŵandu ŵambone, ŵandu ŵakusakalawo tacitenda cikamucisyo kwa ŵandu ŵambone.

²⁰ Mundu jwakulaga atamose acimjakwe ngakusamnonyela, nambo mundu jwakusicila akusakola acimjakwe ŵajinji.

²¹ Mundu jwakusamnyosya mjakwe ali jwakulemwa, nambo jwana upile mundu jwakusiŵasalalila mtima ŵandu ŵakulaga.

²² Ana mundu jwakusaganicisya malindi gakutenda yakusakala ngakusalemwa? Nambo ŵandu ŵakusaganicisya yindu yayili yambone, ŵandu akusiŵasalalila mtima soni akusiŵacimbicisya.

²³ Masengo gali gose gana malipilo gakwe, nambo kuŵecetaŵeceta kukusapeleka kulaga.

²⁴ Mbote ja ŵandu ŵalunda ni lunda lwawo pelo, nambo ŵandu ŵakuloŵela malipilo gawo ni kuloŵela kwawo peko.

²⁵ Mboni jakulupicika jikusijakulupusya ŵandu, nambo mboni ja unami jikusijawulagasya ŵandu.

²⁶ Mundu jwakwajogopa AMBUJE* jwana cikulupi ca macili, soni ŵanace ŵakwe tacikola pakutilila.

²⁷ Kwajogopa AMBUJE uli uliŵa usyesyene wa umi wa mundu, kukusakuŵambasya ku yitega ya ciwa.

²⁸ Citipwindi ca ŵandu ni ucimbicimbi wa mcimwene, nambo naga ŵandu ali mkinapagwa, ucimwene ukusajonasika.

²⁹ Mundu jwangapya mtima mwacitema, akusapikanicisya yindu mnope, nambo mundu jwakwanguya kupya mtima akusalosya usilu wakwe wosope.

³⁰ Mtima wambone ukusapeleka umi wambone ku cilu ca mundu, nambo wiwu ukusawosya mawupa.

³¹ Mundu jwakusiŵatendela ngalwe ŵandu ŵakulaga, akusamnyosya Mlungu juŵampanganyisye jemanjajo, nambo mundu jwakusiŵasalalila mtima ŵandu ŵakulaga, akusamcimbicisya Mlungujo.

³² Ŵandu ŵakutenda yakusakala akusiŵagwisya, nambo ŵandu ŵakutenda yambone akusacenjeledwa.

³³ Lunda lukusaŵaga m'mitima ja ŵandu ŵakusapikanicisyaga cenene yindu, nambo m'mitima ja yisilu ngalukusamanyika kose.

³⁴ Cilungamo cikusakwesya mtundu wa ŵandu, nambo ulemwa ukusatesya soni ku mtundu uliwose.

³⁵ Mwenye akusakondwa ni ndumetume jajikusatenda yindu mwa lunda, nambo jikusamtumbilila mundu jwakusatenda yindu mwakutesya soni.