Misyungu 13 - Chiyawo Bible

¹ Mwanace jwalunda akusapikanila malamusi ga babagwe, nambo mwanace jwakunyosya ngakusapikanila ali kumjamuka.

² Mundu jwambone tacilya yambone malinga ni yisogosi yakuwuma mkamwa mwakwe, nambo ŵandu ŵakunyenga akusagambaga kumbila ya ndewo.

³ Mundu jwakusawugala pakamwa pakwe akusasunga umi wakwe, nambo mundu jwakusagamba kuwugula pakamwa pakwe mwangajimicila akusalijonanga msyene.

⁴ Mundu jwaulesi akusakumbila yindu nambo ngayipata kose, nambo mundu jwamtawu pa masengo akusagambaga kusicililape.

⁵ Mundu jwakunonyela Mlungu akusaŵengana ni ya unami, nambo yakutenda ya ŵandu ŵakusakala yikusasakalisya nipo yikusatesya soni.

⁶ Cilungamo cikusamcenjela mundu jwambone, nambo ungalumbana ukusamgwisya mundu jwakusakala.

⁷ Mundu jwine akusaliwanicisya mpela jwakusicila nambo mkinakola kalikose. Jwine akusalitenda jwakulaga, kutendaga ali akwete cipanje cejinji mnope.

⁸ Cipanje ca mundu jwakusicila ni cikusakulupusya umi wakwe, nambo mundu jwakulaga nganakola litala lyakuti alikulupucisye.

⁹ Lilanguka lya ŵandu ŵakulungama likusalanguka mnope, nambo nyali ja ŵandu ŵakusakala tijicisima nditu.

¹⁰ Cipongwe ca ŵandu ŵa mwano cikusatandisya njojo, nambo ŵandu ŵakusapikanila msyungu wa acimjawo ni ŵakwete lunda.

¹¹ Cipanje cakucipata mwacitemacitema nombe naco soni cikusamala mwacitecimape, nambo cakucipata mwapanandipanandi cikusaŵa cili mkutupilatupilape.

¹² Cindu cakucijembeceya pati cilepelece, cikusapwetesya mtima, nambo cindu cakucikumbila pati ucipatile, umi wakwe ukusaŵa wakusengwa.

¹³ Mundu jwakunyosya msyungu akusalijonanga msyene pejo, nambo jwakusapikanila lilamusi akusapocela mbote.

¹⁴ Majiganyo ga ŵandu ŵalunda gali mpela uliŵa wa umi, gakusakamucisya ŵandu kuti akasatanjila mu citega ca ciwa.

¹⁵ Mundu jwa nganisyo syambone ŵandu akusamsalalila mtima, nambo mundu jwangakulupicika, kwakwe ni konasika basi.

¹⁶ Mundu jwakalamuka akusatenda yindu yakwe yosope mwa lunda, nambo cisilu cikusalosya pakulanguka usilu wakwewo.

¹⁷ Jwamtenga jwakusakala akusiŵagwicisya ŵandu m'yisawusyo, nambo ndumetume jakulupicika jikusayikasya mtendele.

¹⁸ Mundu jwakunyosya msyungu tacilaga, soni tacinyosyedwa, nambo mundu jwakupikanila camuko, akusacimbicisidwa.

¹⁹ Cindu cakucikumbila pati citendekwe, cikusasangalasya mtima. Nambo kuleka kutenda yindu yakusakala cili cindu cakusakalisya kwa ŵakuloŵela.

²⁰ Mundu jwakwenda ni ŵandu ŵalunda nombe najo akusaŵa jwalunda, nambo jwakwenda ni yisilu nombe najo tacijonasika.

²¹ Yakusakala yikusiyalondalonda ŵandu ŵa ulemwa, nambo mundu jwakutenda yindu ya cilungamo akusapocela yindu yambone.

²² Mundu jwambone akusayilecela yisukulu yakwe cipanje cakuti tapocele, nambo cipanje ca mundu jwakusakala ŵakusacipocela ni ŵandu ŵakulungama.

²³ Mu mgunda wegonele wa mundu jwakulaga mukusasogola yakulya yejinji, nambo ŵandu ŵangali cilungamo akusasumula yakulyayo.

²⁴ Mundu jwakusamlecelela mwanagwe ngamkwapula, ni kuti ngakusamnonyela mwanacejo, nambo jwakusamnonyela mwanagwe ngakusalecelela pakumwunda ni cilango.

²⁵ Mundu jwambone akwete yakulya yakwanila yamti ni kwikuta, nambo mlutumbo mwa mundu jwakusakala mukusaŵa muli mwa sala.