Misyungu 12 - Chiyawo Bible

¹ Mundu jwakunonyela ndamo jambone akusasaka kumanyilila yindu, nambo mundu jwakuŵengana ni camuko ali jwakuloŵela.

² Mundu jwambone akusapata upile kutyocela kwa AMBUJE,* nambo mundu jwaganicisya yakusakala, Mlungu akusampa cilango.

³ Mundu ngasatamilicika cenene pakutenda yakusakala, nambo yilimbilimbi ya ŵandu ŵakulungama ngasicitenganyika kose.

⁴ Jwamkongwe jwambone ali mpela cisoti ca ucimbicimbi kwa ŵamkwakwe, nambo jwamkongwe jwakutesya soni ali mpela cilonda ca uwowu kwa ŵamkwakwe.

⁵ Nganisyo sya mundu jwambone sili syagoloka, nambo msyungu wa ŵandu ŵakusakala uli wa unami.

⁶ Maloŵe ga ŵandu ŵakusakala gali gakuwulajisya, nambo maloŵe ga ŵandu ŵambone gali gakwakulupusya ŵandu.

⁷ Ŵandu ŵakusakala mtima akusagwisidwa ni akusaliŵalicika, nambo liŵasa lya ŵandu ŵakusampikanila Mlungu ngasilipasuka.

⁸ Mundu akusamtogolelaga mwakulingana ni lunda lwakwe, nambo mundu jumkinakola mtima wagoloka akusanyosedwa.

⁹ Mundu wamba jwakusalilimbicila kamula masengo, ni kulipatilaga yakusosekwa, ali pambone, kulekangana ni mundu jwakusagamba kulikwesya mkinakola ni cakulya cose.

¹⁰ Mundu jwakulungama akusasamalila umi wa yilangwa yakwe, nambo mundu jwakusakala mtima yitendo yakwe yikusaŵa ya ngalwe basi.

¹¹ Mundu jwakusalima mu mgunda mwakwe mwakulimbicila, akusapata yakulya yejinji, nambo mundu jwakuya yangali mate jwangali lunda jwelejo.

¹² Sanja jakulimba ja ŵandu ŵakusakala mtima jikusajonasika, nambo yilimbilimbi ya mundu wambone ngicikusatenganyika.

¹³ Mundu jwakusakala akusalitanjisya ni maloŵe ga msyene jika, nambo mundu jwambone akusakulupuka ku yakusakala.

¹⁴ Mundu ukusapocela mbote jambone malinga ni maloŵe gakusakopoka mkamwa mwakwe soni yitendo yakwe.

¹⁵ Ŵandu ŵakuloŵela ndaŵi syosope akusaganisyaga kuti akutenda yindu yambone, nambo ŵandu ŵalunda akusapikanila msyungu wa ŵane.

¹⁶ Mundu jwakuloŵela naga atumbile jwangakaŵa kumanyika, nambo mundu jwalunda jwangayikosya yacipongwe.

¹⁷ Mundu jwakusaŵeceta yakuwona, ngakusapeleka umboni wa unami, nambo mboni ja unami jikusaŵeceta ya unami.

¹⁸ Mundu jwakusaŵeceta mwangasamalila, maloŵe gakusasoma mpela upanga, nambo maloŵe ga mundu jwalunda gakusaposya mitima ja ŵandu ŵane.

¹⁹ Ngomo syakusala yakuwona sikusatamilicika, nambo lulumi lwa unami lwangali masiku amta panandi.

²⁰ Mu mtima mwa ŵandu ŵakupangana yakusakala mwana unami, nambo ŵandu ŵakusaganisya yambone, mu mitima jawo mukusaŵa mwana lukondwa.

²¹ Pangali cakusakala citicimgwila mundu jwakulungama, nambo mundu jwakusakala ngayikusamtyoka yakusawusya.

²² AMBUJE akusaŵengana ni mundu jwa unami nambo akusasangalasidwa ni ŵandu ŵakusatenda yindu mwakulupicika.

²³ Ŵandu ŵalunda akusasisa lunda lwawo, nambo ŵakuloŵela akusalosya pamtetete ligongo lya kuloŵela kwawo.

²⁴ Ŵandu ŵakukamula masengo mwakulimbicila tacilamula, nambo ŵaulesi taciŵa acikapolo.

²⁵ Ligongo lya mundu likusaŵa mpela msigo wausito mu mtima mwakwe, nambo maloŵe gambone gakusamsangalasya.

²⁶ Mundu jwakulungama akusiŵalongolela acimjakwe, nambo litala lya mundu jwakusakala likusasokonesyaga.

²⁷ Mundu jwaulesi ngakusayipata yindu yakusayikumbila, nambo mundu jwamtawu akusapata cipanje ca mtengo wa penani.

²⁸ Litala lyacilungamo likusakuyicisya ku umi, nambo matala gakusakala gakusakujigalila ku ciwa.